تشتێ زاروكینیا من ژ خه‌لكێن دى جودا دكه‌ت، ئه‌و نه‌خوشى نه ئه‌وێن دگه‌ل مندا مه‌زن دبن و هێژ ئه‌ز یێ باجا هنده‌كان ژوان دده‌م. دگه‌ل مه‌زنبونا من ژى وه‌ك هه‌ڤكیفه‌كێ نه ڤه‌قه‌تیایى دله‌كێ نازك ژى دقه‌فه‌سا سینگێ من دا به‌رپێن خوه فره‌ه دكه‌ت و نازكیا وى ژى ڤه‌دگه‌ریت بو ته‌حلاتیێن بچویكاتیێ و هه‌ر ئه‌و كێماتى بوینه، كو ئه‌ز كێش كریمه به‌هره‌مه‌ندیێ.
ئه‌ز ل هه‌وه ناڤه‌شێرم، به‌رى ئه‌ز فێرى زمانێ نڤیسینێ ببم و بخو بكه‌مه كار، من هه‌ولێن گه‌له‌ك كارێن دى یا داى و ئه‌ز ناڤه‌شێرم ژى هه‌ر كارێن من ده‌ست هاڤێتیێ من یا حه‌ژێكرى. بگره ژ دكانداریێ و فروتنا كه‌ل و په‌لێن ناڤ مالیێ، بازرگانى، جوتیارى و كارێ سیاسى، دیندارى و هه‌یامه‌كى مه‌لاتى و سنعه‌تكارى و هه‌ر كارێ من خوه دهاڤێتێ ژى مه‌رج نه‌بو تێدا یێ سه‌ركه‌فتیبام، ژبه‌ر كو من ژیان بو خوه دانا بو ئه‌زمونه‌ك و یا گرنگ دێ چاوان ژیانا من دگه‌ل حه‌ز و ئاره‌زوا من برێڤه‌چیت و ب ده‌ستڤه‌ئینانا پاره‌ى من بو خوه دانا بو دوماهى قوناغ، ئه‌گه‌رێ ڤێ چه‌ندێ ژى من دبیروكه‌یه‌كێ دا كار بهزرێن خوه‌دكر، ئه‌و ژى (حه‌ز ل كارێ خوه بكه، دێ پاره بدویف ته كه‌ڤیت)، ژ هینگێ وه‌ره هه‌ر تشته‌كێ من حه‌ژێدكر، ئه‌ز ژ هه‌مى دلێ خوه حه‌ژێدكه‌م و هه‌مى هێزا خوه دده‌مه سه‌ر و دلسوزیا خوه بو دئێخمه كارى، چاوان من بو كارێن خوه بیروكه‌یه‌ك هه‌یه كو مه‌رج نینه دهه‌مى تشتان دا مروڤ سه‌ركه‌فتنێ ب ده‌ستڤه‌بینیت، هه‌ر وه‌سان دحه‌ژێكرنێ ژیدا مه‌رج نینه هه‌مى هه‌ڤال دگه‌ل ته به‌رده‌وامیێ بكه‌ن و حه‌ژێكرنا وان هه‌ر وه‌كو ته بڤێت، دومێ بكێشیت.
دبیت هه‌ر ئه‌ڤ بیروكه‌یه ژى بیت، كو خو نه‌گونجاندن و نه شاره‌زاییا من دلێكدانا په‌یڤان دا، ئه‌ز توشى گه‌له‌ك شكه‌ستنان كریم، ژبه‌ركو ئه‌و خودیكا وێنێ من به‌روڤاژى دكر، ئه‌ز ملكه‌چیێ رویه‌كێ راستگویێ دكرم، دسه‌ر ڤێ ژی را، ئه‌ز یێ رژد بومه دكارێن خوه‌دا، هه‌ر زوى من خوه لسه‌ر پێن خوه گرتیه ڤه. ژێگرتنا من بو كارێ نڤیسینێ، دبیت دوماهیك پێگه‌ه بیت كو ئه‌ز تێدا دخوه بگه‌هم و ئه‌ز بشێم خاندنه‌كێ بده‌مه هه‌ر تشته‌كى و یێ سه‌رسورمان ژى نه‌به گه‌ر بێژمه ته هه‌ر گاڤا ته ڤیا فاله‌كێ بو خوه ڤه‌كه‌ى، هه‌ره ده‌ف نڤیسه‌ره‌كى و په‌حنكا ده‌ستێ خوه بكه دناڤ ده‌ستێ ویدا و به‌لێ ژبیر ژى نه‌كه‌ى، چ گاڤا ته ڤیا پاره‌كى قه‌رز بكه‌ى، خوه ژ نڤیسه‌رى دویر بێخه، ژبه‌ركو ئه‌ز نزانیت پاران كوم ڤه‌بكه‌ت؟!
ژ هینگێ هه‌كو من ئه‌ڤ بابه‌ته ژ روژنامه‌كێ قه‌وراندی، من دگه‌ل تشتێن خوه یێن بهادار هه‌لگرتى یه و من ڤیایه بزانم كا نڤیسه‌ر چ دخون و چ لبه‌رخوه دكه‌ن و چه‌ند خوشیێن ژیانێ بو خوه دكه‌نه مال! به‌لێ ببورن و لێبورینێ ژ وه، ئه‌ڤێن هوین خوه بنڤیسه‌ر دزانن دكه‌م، كو ئه‌ڤه ئه‌ز یێ بناڤ سال ڤه دچم و بتنێ ژڤى جورێ مروڤان، قه‌ره‌چان ئه‌ز دبینم (دبێ پاره، فال ڤه‌كه‌ر و خازوك)، بتنێ ئه‌و پارا بو زكێ خوه دخازن و هوین بو چاپكرنا په‌رتوكه‌كێ.
ليست هناك تعليقات:
إرسال تعليق