بحث هذه المدونة الإلكترونية

pertook

pertook

2011/01/04

هه‌رسێ برا


دبێژن رێڤنگه‌ك ل ماله‌كێ بو مێهڤان و دیت زه‌لامه‌كێ پیر و ژنه‌كا جه‌حێل د ژورڤه‌نه‌ و تشتێ سه‌رنجا وى دوێ مالێ دا راكێشاى وى زه‌لامى ژنه‌كا ده‌ق شكێن هه‌بو. زه‌لامه‌كێ سوحبه‌ت خوش بو و لێ ئاخفتنا گوتبا ژنا وی ئێكا دی لبه‌ر ده‌ڤی دا و گه‌ر گوتبا ژنكا خوه‌ هه‌ره‌ بومه‌ تراره‌كێ ئاڤێ ژی بینه‌، دا ژنكا وی بێژیتێ ئه‌و گوسك ل به‌ر ده‌رگه‌هی هندێ ڤه‌ خو تا تو پێ د وه‌رمی.
رێڤنیگی گوته‌ وی زه‌لامی ئه‌ز دبینم سه‌رێ ته‌ گه‌له‌ك یێ سپی بوی و ژنكا ته‌ هێش یا جه‌حێله‌ ئه‌ڤه‌ مه‌سه‌له‌ چبو و ته‌ بوچى زوى ژن نه‌ئینایه‌!.
زه‌لامی گوتێ نه‌ باوه‌ربكه‌ ئه‌ز و ژنكا خو ئێك ته‌مه‌نین، به‌لێ هه‌كه‌ ته‌ بڤێت مه‌سه‌لێ بزانی و كانێ بوچى ئه‌ز هنده‌ ژ ژنكا خوه‌ مه‌زتر دیار دكه‌م، هه‌ره‌ فلانه‌ گوندی دێ برایێ من ل وێرێ بینی و لێ ببه‌ مێهڤان و ڤى بابه‌تى بو بێژه‌ ئه‌و دێ بو ته‌ چیروكێ بێژیت.
رێڤنگى ژی سپێدێ خاترا خوه‌ ژێ خاست و ددلێ خوه‌ دا گوت پا دڤێت ئه‌ز ڤێ چیروكێ هه‌ر بزانم و هه‌تا ل گوندێ برایێ وى ژێ گوتى ده‌ركه‌تى و چوو لوێ مالێ بو مێهڤان.
پشتی ب خێر هاتنێ دیت برایێ دوێ  بسه‌ر و چاڤان ژ برایێ ئێكێ بچویكتره‌ و لێ هه‌ر تێ ئینا ده‌ر كو جیاوازیه‌ك دناڤبه‌را ڤى برایى و ژنكا وى ژى دا هه‌یه‌ و پشتێ شه‌ڤبێریێ و تشتێ تێ ئینایه‌ ده‌ر هه‌كو برایێ دوێ دگوته‌ ژنكا خو هه‌ره‌ بو مێهڤانێ مه‌  ئاڤێ یان فێقی بینه‌ یان هه‌ر تشته‌كێ با، دا چیت وی كاری كه‌ت به‌لێ گه‌له‌ك نه‌ ژ دل.
ئینا رێڤنگی گوتێ ئه‌ز ژبه‌ر  تشته‌كێ یێ بویمه‌ مێهڤانێ ته‌ و ئه‌و ژی من دڤێت چیروكا برایێ ته‌ یێ فلانه‌ گوندی بزانم كانێ بوچی سه‌رێ وی زویكا سپی بویه‌؟ و من پسیارا ته‌مه‌نێ وى ژێ كر كانێ بوچى گه‌له‌ك ژ ژنكا خوه‌ مه‌زتره‌ گوته‌ من هه‌ره‌بێژه‌ برایێ من و ئه‌ز دبینم جیاوازیه‌ك دته‌مه‌نێ ته‌ ژنكا ته‌ ژى دا هه‌یه‌ و ئه‌ڤ جیاوازى یه‌ هندى یا وان دیار ناكه‌ت.
وی ژی گوتێ گه‌ر ته‌ بڤێت تو چیروكێ ب دروستاهی بزانی دێ چیه‌ فلانه‌ گوندی برایه‌كێ مه‌یێ لوێرێ ئه‌و دێ بوته‌ بێژیت چیروكێ جوانتر بێژیت.
رێڤینگی ژی ژبه‌ر كو یا خو پێڤه‌ كری خه‌و نه‌چوو چاڤا و سپێدێ زوى خاترا خو ژوی ژی خاست و به‌ره‌ف گوندێ ناڤبری ئه‌وێ وی بو گوتی ڤه‌ چوو. ده‌ما برایێ وان یێ سیێ دیتی، دیت كو جه‌حێله‌كه‌ هێش میێن سپی نه‌كه‌تینه‌ سه‌رێ وی و ده‌ما لێ بویه‌ مێهڤان دیت ژنه‌كا كه‌یف خوش یا هه‌ی و ب له‌بێ و هه‌ردوو ب سه‌ر و چاڤان وه‌سا خویا دكه‌ن كو دئێك ته‌مه‌ن دا داوه‌تا خوه‌ یا كرى و دیت كو ئه‌ڤ برایه‌ هه‌ر ئاخفتنا دبێژیته‌ ژنكا خوه‌، بێ گیروبون بو بنه‌ جه دكه‌ت و پشتی شیڤ خارنێ ژی وی زه‌لامی گوته‌ ژنكا خو هلو هه‌ره‌ بومه‌ فێقی بینه‌؟
ژنك چوو د ژورا دیڤه‌ و شتی یه‌ك ئینا به‌ر سینگێ وی و وی زه‌لامی ده‌ستێ خوه‌  دووسێ جارا ل وى شتی دا و گوتێ ده‌نگ ژڤى شتى ناهێت و ئه‌ڤ شتی یه‌ یێ سپی یه‌ هه‌ره‌ بو مه‌ ئێكێ دی بینه‌ و درێژ ناكه‌م سێ چار جارا ئه‌و شتی وێ ژنكێ برو ئینا ڤه‌ و زه‌لامێ وێ هه‌ر دگوتێ هه‌ره‌ ئێكێ لاو بو مێهڤانێ مه‌ بینه‌.
پشتی مه‌ فێقی ژی خاری رێڤینگی گوتێ ئه‌ز ژبه‌ر تشته‌كێ یێ هاتیمه‌ ده‌ف ته‌ و ئه‌ز یێ ژ ده‌ف هه‌ر دوو برایێن ته‌ دهێم و من دڤێت چیروكا پیراتیا وان و بو چى وان زویكا ژن نه‌ئینایه‌ و ژنێن وان بچویكترن!
زه‌لامی گوتێ ئه‌وێ سه‌رێ وی گه‌له‌ك سپی ئه‌و برایێ مه‌ یێ بچویكه‌، ژبه‌ر كو ژنكا وی هندی هند نه‌ یا گوهداره‌ و هه‌می گاڤا ئاخفتنا وی دناڤ خه‌لكی دا دشكێنیت و سه‌خه‌ركا وى دبه‌ته‌ڤه‌، ژبه‌ر هندێ زوی سه‌رێ وی یێ سپی بوی.
برایێ مه‌یێ ناڤی ئه‌وێ د دیفرا تو بو یه‌ مێهڤانێ وی سه‌رێ وی نیڤ نیڤه‌ بوی، ژنكا وی یا ده‌م ده‌می یه‌ و زوى ب زوى د خورا نابینیت داخازیا ژێ یبكه‌ت و ئه‌ز برایێ وان یێ مه‌زنم و هێش میه‌كێ سپی نه‌ كه‌فتی یه‌ سه‌رێ من، ژبه‌ر كو هه‌ر تشتێ ئه‌ز دبێژم ژنكا من گوهێ خو د ده‌ته‌ من و چ جار بێ دلیا من ناكه‌ت و هه‌ر ده‌م سه‌رێ من ل ده‌ف مێهڤانێ من بلند دكه‌ت.
ئه‌ڤ شتیێ ته‌ وێگاڤێ خاری، بتنێ مه‌ ئه‌و شتی هه‌بو، به‌لێ دا رێزگرتنا ته‌ بگرین مه‌ چه‌ند جاران ئه‌و شتی گوهارت.
 ڤێجا ژن زه‌لامێ خوه‌ پیر دكه‌ت و هه‌ر ژن زه‌لامێ خوه‌ جه‌حێل دكه‌ت و بلند رادگریت.

إرسال تعليق