ئه‌ز لته ناڤه‌شێرم گه‌له‌ك جاران تو یا هاتیه خه‌ونێن من و گه‌له‌ك جاران من یا هه‌ست بڤێ چه‌ندێ كرى، دگه‌ل هه‌ر هاتنه‌كێ ژى بارگرانیه‌ك ژ سه‌ر ملێن من دهاته‌خار! باش ل بیرا منه، هه‌ر ژ روژا من ئاگه‌هـ ژ خوه بوى، موزیكه گه‌له‌ك ژ دلێ من دهات و دكویراتیا وان ئاوازان دا، ئه‌م دبوینه ئێك گیان. ژبه‌ر هندێ ژى من هه‌ر ده‌م حه‌ز ل سه‌ر گوهدانا موزیكێ هه‌بو و هه‌مى گاڤه‌كێ من تو لدوورێن خوه ددیتى یان هه‌كو ئه‌ز ل پیاسه‌كێ دگه‌ل خوه به‌رزه دبوم، من دزانى ده‌ستێ ته یێ دده‌ستێ من دا و تو یا ل بلنداهیان، من دگێرینى..
دهێته بیراته، هه‌كو بو جارا ئێكێ چاڤێن من تو هه‌مبێزكرى، ئه‌ز دگه‌ل خوه كه‌تبومه دان و ستاندنێ و من تو هێلابویه لهیڤیا زڤراندنا سلاڤێ، ته هه‌ست بمن دكر كو هاتنا ته ده‌رگه‌هێ جیهانه‌كا دى لبه‌ر من هێلا بو ل تاق، ژبه‌ركو چ جاران من تو نه دیتبوى و ده‌نگێ ته دگوهێن من دا، كه‌هى نه ببو. ژبه‌ر هندێ ژى چاڤێن ته نه دشیان، جهه‌كى ل سه‌ر وى قه‌نه‌فێ درێژێ ڤالا ببینن و ته ژ گازنده‌یێن پێن ته یێن وه‌رمتى، ئه‌وێن دوێ شمكا سورا چم بلند دا ئاسێ بوین، كو مروڤى هه‌ست پێدكر چه‌ندا ل پێن ته شدیایه و چه‌ند سه‌رو چاڤێن ته یێن سورتر لێكرین، بتنێ من و ته دزانى ئه‌و شمكا سورا سورا ره‌نگێ وێ ب دندكێن هنارێ ڤه دچیت، ئازراندنا دلایه و ته دڤێت جانیا خوه دوێ شمكێ و بچویكاتیا وێ دا به‌رچاڤ بكه‌ى، سلاڤا ته ئه‌وا هه‌مى تشت ژبیرا من برین، بو من گه‌له‌ك رامان ددان، ته گه‌له‌ك پروڤه‌كربون هه‌تا تو شیایى مێیاتیا خوه هه‌میێ دارێژیه ناڤ سلاڤا خوه و ته ب شاره‌زایانه ددانا سه‌ر مێزا لبه‌ر سینگا من، به‌لێ ته ژبیركربو كو من گه‌له‌ك شه‌ڤێن درێژ دگه‌ل وێ مێیاتیێ یێن بوراندین، هه‌ر بو وێ مێیاتیێ ژى من گه‌له‌ك په‌ر ره‌ش كرینه و شه‌ڤێن درێژ ئه‌ز و ستێر ل به‌ندا ته دماینه هشیار.
دێ هزركه‌ى پشتى ڤى ته‌مه‌نێ درێژ شنوى ئه‌ز یێ ب چاڤ دكه‌ڤم یان وه‌سا ئه‌ز هه‌ست دكه‌م، كچه‌ك بو وه‌ك هه‌ر كچه‌كێ چه‌ند من هه‌ست ب بێهن ته‌نگیێ كربا من پتر نێزیكى خوه ددیت، نزانم بوچى هه‌مى ره‌فتارێن وێ بو من دگرنگ بون، هه‌ڤالێن وێ، خێزانا وێ ، خارن و ڤه‌خارنێن وێ و تا پرێڤه‌چوون و رونشتنێن وێ ژى من هزر تێدا دكرن، چه‌ند روژه‌ك دبورى ئه‌ز پتر پێڤه دهاتمه گرێدان، ئه‌ڤه پتره ژ چه‌ند بهارا خه‌ونێن من دگه‌ل بوینه راستى و هێش ئه‌ز هه‌ستێ خوه دگه‌ل وێ نزانم، حه‌ژێكرنه، هه‌ڤالینیه یان ژى راستیه كه و ژ مێژه دڤیابا كه‌سه‌كى ئه‌ڤ بوشاتیه لده‌ف من نه‌هێلابا.
ئه‌ڤه ژوێ روژا من شمكا چم سور ل پێن وێ دیتى، ئه‌ز دگه‌ل دئاخڤم و وێ دبینم و هێشتا ئه‌ز هه‌ستێ خوه به‌رامبه‌ر وێ نزانم. هه‌كو كه‌سه‌كى لده‌ف من بخرابى به‌حسێ جانیا وێ كربا ئه‌ز دشیام به‌رسینگێن وى بگرم، براستى ئه‌و چ ژ جانیێ نزانن، من دڤیا هه‌میا بو من به‌حسێ سالوخه‌تێن وێ كربان، ئه‌ڤ چه‌ندا هه بو من گه‌له‌ك گرنگ بو ژ به‌ر هندێ ژى پتر كه‌یفا من بوان دهات یێن په‌سنا جانیا وێ دكرن.
هه‌رو ل پشت ڤێ مێزێ ئێكه‌م سه‌رنجا من وێنێ وێ یه، نهێنیا عشقامه ژى، دسوراتیا شمكا وێرایه، ژبه‌ر هندێ ژى من ناڤێ ڤێ چیروكێ كریه (شمكا چم سور)، نزانم بوچى ژى ئه‌ز هه‌ست دكه‌م هه‌ر ده‌ما ئه‌ڤ چیروكه بهێته خاندن دێ گه‌له‌ك تشت ب دوماهیك هێن، به‌لێ ئه‌ز هه‌رده‌م خوه رازى دكه‌م كو خوشترین ده‌مێن ژیانا من دگه‌ل وێ بونه، هه‌ر ژبه‌ر هندێ ژى و وه‌فادارى بو وێ، ئه‌ڤه بو جارا ئێكێ یه ئه‌ز خو دهاڤێژمه ڤى جورێ نڤیسینێ، خودێ یه به‌لكى ب به‌رچاڤێن وێ بكه‌ڤیت و هنده‌ك بارگرانیێ ژ سه‌ر ملێن من سڤك بكه‌ت. ئه‌ز نابێژمه ته ئه‌ڤ نڤیسینه من یا ژخو ڤه‌كرى یان بله‌ز یا هاتیه نڤیسین، ژبه‌ركو هه‌ر په‌یڤه‌كا وێ، چیروكه‌ك یا ل پشت و ده‌مه‌كێ ژ ژینا من كوشتى، ژبه‌ر هندێ ژى ئه‌ز دێ مینمه لهیڤیا به‌لاڤكرنا وێ، ئه‌گه‌ر بو به‌لاڤكرنێ بهێته ده‌ستدان! دخازم ل كوژیه‌كێ به‌رچاڤێ روژنامێ بهێته به‌لاڤكرن.
تێبینى: مه‌رج نینه ئه‌ڤه نڤیسینا لایه‌نه‌كێ بیرهاتنێن من بن، یان ژى راستیه‌كا ژیانا من یا ڤه‌شارتى بیت، دبیت ژى خه‌یال بیت یان هنده‌كا وێ راستى بیت!
هناك تعليق واحد:
نفيسينةكا جانة و ئةز بخوة حةز ز تيكشتين بفى رةنكى دةم
إرسال تعليق