عبدالرحمن بامەرنی
ئەڤرو ل ھەرێما كوردستانێ، دوو روودانێن گرنگ دەزگەھێن راگەھاندنێ یێن بخوەڤە مژویلكرین، ئێك پرسیارا ئێكلاكرنا سەروكێ كومارا عیراقێ دناڤبەرا ھەردوو سەرۆك حزبێن پارتی و ئێكەتی (مەسعود بارزانی و باڤێل تالەبانی)دا، كو كومبونەكا داخستی داخستی دناڤبەرا ھەردووكاندا ھاتیەكرنێ و روودانا دوویێ، توپ بارانكرنا ئەڤرو یا گوندێ (پەرەخێ) ل ناحیا دەركارێ ل زاخو، كو تێدا (8)گەشتیاران گیانێ خوە ژ دەستدایێن و (23) دی برینداربووین!
د روودانا ئێكێدا، كو چ مزگینیەكێ بۆ خەلكێ ھەرێما كوردستانێ بگشتی تێدا نابینم، ژبلی ناكوكیێن حزبی و د روودانا دوویێدا كو من مەبەستە ژێ، كو ل سالێن بوری چیایێن كوردستانێ بتنێ بوون دكەتنە بەر ھێرشێن توپبارنكرنا توركیا و ھێدی ھێدی خوە نزیكی گوندان ژی دكرن، خەلكێ سڤیل دكرنە ئارمانج و ئێدی خەلك نەدشییا قەستا رەز و باغێن خوە بكەت، نەدشییا قەستا گل و گیایێ بھارێ و چیایان بكەت و ئەڤە ھەمی ژی تێرا توركیا و ھێزێن وان یێ دوژمنكارانە و نە مرۆڤانە نەدكرن، دگەل شەرێ وان دگەل ھێزێن پەكەكێ دناڤا ئاخا ھەرێما كوردستانێدا، ئێدێ سور و ب سور خەلكێ سڤیل كرنە ئارمانج، دا گڤاشتنێ ل سەر حكومەتا ھەرێما كوردستانێ دروست بكەن، گڤاشتنێ ل سەر خەلكێ ھەرێما كوردستانێ دروست بكەن و پشتەڤانیا ئوپەراسیونێن وان بكەن ژ بۆ دەركرنا پەكەكێ و ئەڤێ ژی بگرە و ڤەكێشێن خوە یێن تایبەت ھەنە.
یا من دڤێت بێژم تایبەتە بۆ سەركردایەتییا كوردی و كێشە ژ كێشەیێ مەزنتر مە یێن ھەین، ئەوا ئەڤرو لڤی گوندی دروست بووی، گورزەكێ دییە بۆ خەلكێ دھوكێ و ئارامییا دھوكێ و كەرتێ گەشت و گوزاریا دھوكێ! دھوكێ ھەژارترین باژێرێ ھەرێما كوردستانێ یە و رێژا ھەژاریێ و بێكاریێ گەلەك لێ زێدەیە و ئەگەر لڤینەك ل باژێری ھەبیت، ئەوە یا گەشتیارێن عەرەب ئێخستیێ و ئەڤ روودانێن ھەنێ دێ وێ لڤینێ ژی راوەستینن.
روودانا ئەڤرو ئەز بتنێ مەسجەكا ژەھكری ژلایێ توركیڤا ڤە دبینم بۆ سەر بەرژەوەندیێن خەلكێ دھوكێ، كو ئێدی نە بتنێ ژیانا وان بەلكو بەرژەوەندیێن وان یێن ئابوری ژی ئێخستینە بەر گەفێن خوە و خوە گەشتیار و ھێزێن چەكدار وەكی عەسمان و عەردی ژێك جودانە...!
ــــــــــــــــــــــــــــــــــــــــhttps://www.facebook.com/photo/?fbid=10217204990677178&set=g.209899095715001
ليست هناك تعليقات:
إرسال تعليق