وەرگێران: ع. بامەرنی
ئێك ژ سەربازان نامەك نڤیسی بوو و ژناڤ جلكێن وی ئینانەدەرێ، كو د شەری دا ھاتبوو كوشتنێ:
تێدا دبێژیت:
ئەگەر ئەز مرم، ھەر تشتی باوەرنەكەن. ئەگەر دەیكا من د بەرنامەكێ چڤێلێ تەلەفزیونەكێ دا گوتە ھەوە: وی حەژ ژ شەھیدبوونێ دكر و ھەر دەم دگوت (وەلاتێ مە زێرە و دڤێت بەرگریێ ژێبكەین..). باوەر ژێنەكەن، من ئەو ئاخفتن نەكریە و ئەز ژی وەكی ھەوە حەز ژ ژیانێ دكەم، چ جارەكێ ژی ھیڤیا مرنێ ناخوازم. بەلێ بێژەرا خوە ب سوری مكیاجكری، یا مایە پێڤە كو ڤێ ئاخفتنێ بێژیت.
ژخوە ھەڤالێ من ئەڤێ وێنێ من ل لاپەرێ خوە یێ فەیسبووكی بلاڤكری و شعرەك نڤیسی و تازی ژبەر شەھیدبوونا من دانایی. باوەر ژوی نەكەن، ژبەركو ئەو یێ دوو روویە.
سەبارەت جەنابێ وی ژی، ھیچ باوەر ژوی نەكەن، ئەو دناڤ تازیێ دا سترانا ب گیانێ شەركرنا من دبێژیت و حەژێكرنا من بۆ وەلاتی.. ئەرێ ھین بەدلێ وی یێ جوان دبینن؟ و پارێن وی بەدلەی ژ خارنا تایبەت بۆ مەدھات، یێن دزین، ئەم كورێن ھەژاران لڤی وەلاتی سوتەمەنییا شەراینە ئەڤێ ئەو ھلدكەن.
سەبارەت خوداندەستھەلاتان، ئەو یان یێ ل دەرڤەی وەلاتی گەریانێ یان ژی ل كافی و مەرقەسان دەمێ خوە دبورینن. بتنێ ئەفسەرێ من موقەدەم دبیت ژ راستان یێ دلگران بیت، ژبەركو ئەو ب كوژمەكێ پارەی زەرەرمەند بوو، كو من وەك دیاری یان رەسیدێ موبایلێ ددانێ، تا كو بشێم ھندەكێ ژ مافێن خوە بدەستڤە بینم.
ئەڤێن ژ بەر ئینانا سندریكا من گولەییان د عەسمانێ وەردكەن، ئەرێ ئەو كینە؟ من چ جارەكێ ل چ شەران نەدیتینە؟!! دیسان ئەز قارەمان نەبووم ھەر وەكو ئەو دبێژن، ئەز تشتەكی ژی ژ قارەمانیێ نزانم، یان درووشمێن حەژێكرنا سەرۆكی و نیشتیمانی، بەلێ تڤەنگ مرۆڤی بۆ خوە دكێشیت، ھەر وەكو ژن زەلامێن گەمژە بخوە ڤە دكێشن.
ئەگەر ئەز ب گولەكێ یان ب گولەیەكا توپێ یا ژ نشكەكێڤە ب رەخ منڤە كەتبیت مرمیان ئەز ژ قەھران دا بمرم ھیچ جیاوازیەك نینە.
بتنێ باوەر ژ ئاخینكێن دەیكا من بكەن، دەما ئەو بتنێ دمینیت و شكەستنا بابێ من و رۆندكەكا سڤك و خوەشك ژ خوشتڤیەكێ، كو من سوز دایێ كو ئەز دێ یێ باش بم.
گەلەك جاران ژی من ئەڤ پرسیارە ژخوە كریە، بوچی شەھید بتنێ ژ كورێن ھەژارانە، ھەر ئەون ژی بەرگریێ دكەن و وان مەترەكا عەردی نینە و بوچی مە چ جارەكێ گوھـ ل مرنا بەرپرسەكێ نابیت یان كورێ بەرپرسەكێ ژ پێخەمەت نیشتیمانی؟ ئایا من بەرسڤ پشتی مرنا خوە دیت، ببورە لمن وەلات، ئەز ژ پخەمەت تە نە مریمە، بەلكو ل سەر خاترا پاریەكێ ژیانێ ئەز یێ مریم، ل وەلاتەكێ نەشیایی پێدڤیێن یانێ بۆ من بەرھەڤبكەت.
ـــ ژ زمانێ عەرەبیێ ھاتیە وەرگێران(ejaaba.).
ـــــــــــــــــــــــــــــــــــــــhttps://www.facebook.com/photo/?fbid=10217254820562894&set=g.209899095715001
ليست هناك تعليقات:
إرسال تعليق