حەسەن شەریفی رەفع كر و ئەم دێ كەبس كەین

 عبدالرحمن بامەرنی

ئەڤا ئەز دێ نڤیسم چ گرێدان ب ھەڤكێشەیێن سیاسی ڤە نینە، ھندی من دڤێت ل سەر خالەكێ راوەستم، ئەم چاوان گرنگیێ ب ھونەر و چاندا كوردی بدەین و بەرەڤ پێش ببەین. د ھەیڤا پێنجا ئەڤ سالەدا، فێستیڤالا نێڤدەولەتی یا گەلاوێژ ھاتەكرنێ و وەك ھەر سال، ھونەرمەندەكێ كورد ل رێ و رەسمێن بەراھیێ و دووماھیێ یێن فێستیڤالێ سترانان دبێژیت، ئەڤە ژبلی تابلویێن ھونەری ئەڤێن دھێنە پێشكێشكرن. د ئەڤ سالە ژیدا، ھونەرمەندا كوردا رۆژئاڤایێ كوردستانێ (مزگین تاھر)، د بەرنامەیدا بوو و دڤیابا رازەمەندییا وەزارەتا ناڤخو ھەبیت، تا بشێت بھێتە ھەرێما كوردستانێ و كێمتر ژ حەفتیەكێ و پشتی (كیتابونا و كیتابوكوم،) نڤیسارا وەزارەتێ گەھشتە دەروازەی و مە شییا پێشوازیەكا بچووك لێبكەین و رەوانەی فێستیڤالێ بكەین.

ئەز بەحسا وێ ناكەم و شیانێن وێ و ل كولیژا ھونەری بۆ خوێندكارێن بەشێ موزیكێ، چەند مفا ژێ ھاتە وەرگرتن، كو ئەو بابەتێ من نینە، لێ پشتی حەفتیەكێ ژ دووماھی ھاتنا گەلاوێژێ و درێكا ڤەگەرا خوەدا بۆ دھوكێ و پاشی ژ دھوكێ بۆ قامشلوو، سپێدە زوویەكێ تەلەفونەك بۆ من ھات و شوفێرێ تەكسیێ گوت: ئەم یێ ل زالگەھا (دێگەلە) راوەستاندین و ناھێلن (مزگین تاھر) دەرباز ببیت؟ من گوتێ بابو ئەڤە سترانبێژە، نە سیاسییە؟!!

من گوتە شوفێری، تەلەفونێ رادەستێ مزگین خانێ بكە و من گوتێ ما تە كوبیا نڤیسارا وەزارەتا ناڤخوە پیشانی زالگەھێ نەكر، گوت بەلێ، لێ ناھێلن ئەم دەرباز بین. من گوتە شوفێری، ژ كەرەما خوە تەلەفونێ بدەنە ئەڤێن ل بەر زالگەھێ و من خوە بۆ دا ناسكرنێ و من بەحسا ھونەرمەندا سترانبێژ و فێستیڤالێ بۆ كر و جوامێرا، رێز لمە گرتن و رێدایێ و نوكە سترانبێژا مە ل باژێرێ خوە ل قامشلویە.

من نەڤێت زێدەتر بەحسا ڤێ سترانبێژێ بكەم و كا دێ ئەو چ ھەست بەرامبەری مە وەرگریت. لێ یا من دڤێت بێژم، دگەل ئەوا ھونەرمەندێ سترانبێژ (حەسەن شەریف)ی د پەیچێ خوە یێ سوشیال میدیایێ دا بلاڤكری و گللەیێن خوە لدوور پیتەنەدانا ب ھونەرمەندێن كورد ل سەر حسابا ھونەرمەندێن بیانی بەرچاڤكرین، چەندین دەزگەھێن دی یێن راگەھاندنێ و چالاكڤانان بابەت ئینایە پێش و ئەز بۆ ڤێ ژی رەخنێ ل كەسەكێ ناگرم! لێ یا من مەبەست پێھەی بڤێ نڤیسینێ، خوزییا مە ئاڤریەكا باشتر و چاڤدێریەكا باشتر و رێزگرتنەكا باشتر ل ھونەر و چاندا خوە دابا و ھونەرمەند و رەوشەنبیرێن خوە زێدەتر ئینابانە پێش و ئەڤ پەیاما من بۆ مە ھەمیانە بێ جوداھی، ھەر ژ وەزارەتا رەوشەنبیری و گەشت و گوزارێ بگرە و تا بگەھیە چایخانەكا بچیك، ل سەر رێكەكا گەشتیاری و دوو كورسیك ل بەر چایدانكێن خوە داناین و چایا سەر پەلان د فروشیت و مرۆڤ د بەر ڤەخارنا وێ چایێ را، گوھداریا سترانەكا كوردی بكەت.

https://www.facebook.com/photo/?fbid=10217064100395009&set=g.209899095715001

ــــــــــــــــــــــــــــــــــــــــ

http://www.rwangauraxna.com/ba/detail.aspx?IDNews=6163