عەبدالرحمن بامەرنی
پێدڤی ناكەت رووشنتنان لدوور مە كوردان و ئایندێ ھەرێما كوردستانێ بگێرن، ژبەركو ئەم كورد بۆ ركامنیێ د پێگوتینە و بۆیە ب ھەمی تەوازع و جامێری ڤە، بۆ سەررەقییا خوە ئەم لێبورینێ ژ جڤاكێ نێڤدەولەتی دخوازین، ئەڤێن حەزدكەن كوردستان ئارام بیت و پێشڤە بچیت.
ڤێجا خانما (جینین پلاسخارت) و دا كو رێكا تە كورت ڤەبرین، ئەڤە دوو ھوشداری وە دانەمە، كو دڤێت ئەم ناڤمالییا كوردی رێكبێخین و وەك ھەر جار ئەم ل سەر دەھـ و دوویا خوە بەردەوامین و (لولو مورتاحوینە) و ئەم خوە ب سەر ڤەنابەین، بتنێ تە رێكەكا ڤەبر یا ھەی بۆ ڤان ھوشدارییان یان باشتر بێژم بتنێ رێكەك ل بەر جڤاكێ نێڤ دەولەتی یا مای یان ھوشدارییا سیێ ژی راگەھینن و دێ ھەر ئەم ئەڤ مالە بین یان ژی ئەم كورد حەژ (دارێ چیڤی) دكەین. ژ كەرەما خوە چارەیەكێ لمە بكەن، ڤان ھەڤركییێن لناڤ مە كێم بكەن و زوونێن مە یێن (كەسك و زەر) بكەنە ئێك و حكومەتەكێ بۆ مە دروست بكەن، دڤێ حكومەتێ دا ئینتیمائا مە یا حزبی نە بیتە ئەگەر، كو ئەم ھێشتا لدویڤ شوپ و عەقلیەتا رژێما سەدامی بین و ھاولاتیێ (دەرەجە دوو) لناڤ مە ھەبیت.
راستی ئەم وەستییان، ئەم ژی مرۆڤین و خوین و گوشتین! مە دڤێت ھەست ب ھاولاتیبوونا خوە بكەین و مە دڤێت مە پرسێن مە یێن نیشتیمانی ب سەر پرسێن كومپانییا و ئەز ئەزانێ بكەڤن و كی بلند و كی كولندە. من ژبیركر بۆ تە ڤێ ژی بێژم خانما (جینین پلاسخارت)، ئەو تشتێ تو ژ كوردستانێ و عەقلیەتا مە نەزانی، ھەر ژ دێر زەمان وەرە ژبلی ركویاتیێ ئەم كورد گەلەك حەز ژ یاریەكێ ژی دكەین و ناڤێ وێ ژی دێ بو تە بێژم، ئەو ژی (كی بلندە و كی كولند)، و بۆ سەركەفتنا ڤێ یاریێ ژی، ھەمی تشت لدەف مە رێگەپێداینە، فروشتن، خیانەت، رەڤین، تیروركرن و داخستنا دەرگەھێ پەرلەمانی و ئیفلیجكرنا حكومەتێ و لیستە ژ دەولەت سەرێ ڤێ یاریێ یا درێژە.
تێبینی: شڤێدی نوونەرا نەوەیێن ئێكگرتی ل عیراقێ، بناڤێ جڤاتا ئاسایشێ، بۆ جارا دوویێ ھوشداری لدوور ھەڤنەگرتنا كوردان ل ھەرێما كوردستانێ دا و گوت: قەوارە و رەوشا ھەرێما كوردستانێ د مەترسیێ دایە.
https://www.facebook.com/photo/?fbid=10216964446623727&set=g.209899095715001
ــــــــــــــــــــــــــــــــــــــــــ
ليست هناك تعليقات:
إرسال تعليق