ئیرما بومبیك
بابێ من ھیچ كارەك نەدكر، پا بوچی تاڤی راددەی ئەز بیرییا وی دكەم؟!
دەما ئەزا زارۆك، باب ژبۆ من وەكی گلوپا ناڤ بەفرگرێ (سەلاجێ) بوو، ل ھەمی مالەكێ ژی گلوپەك دناڤ بەفرگرێ دا ھەیە و كەس ژی نزانیت، ئەو گلوپە چ كاری دكەت دەما دەرێ بەفرگرێ دھێتە داخستن.
ھەر رۆژ سپێدێ بابێ من ژ مالێ دەردكەفت و دەما ئێڤاریا دھاتەڤە، بدیتنا مە یێ كەیف خوش بوو..
ئەو بوو یێ قەباخێ بتلكێ ترشی ڤەدكر، دەما ھەمی دھاتنێ و كەس نەدشییا ڤەكەت.. ئەو ئێكانەبوو یێ بێ ترس دوێریا بچیتە سەردابێ.. دەما ریھێن خوە چێدكرن و خوە ب مووسی برینداردكر، كەس نەدچوو پێڤە ماچی بكەت یان گرنگیێ پێبدەت.. دەما ئێك ژمە زارۆكان نەخوش ببا، ئەو دچوو دەرمانخانێ ژبۆ مە دەرمان دئینان..
ھەمی گاڤا یێ بكار بوو، ئەوی شاكێن گولێن بەردەرگەھی د قوساندن و ستری ددەستێن وی دھەلچوون و ئەم ژی دناڤ دەرگەھی را دھاتین و دچووین.. ئەوی تایرێن پایسكلا من دوھندكرن دا بلەزتر برێڤەبچیت و دەما بویمە خودانا خوە و پایسكلا خوە، ئەوی برەخ منڤە ب كیلومەترا دكرە غار و ھەر چنەبیت دانەكەڤم و فێری ھاژووتنا وێ ببم.. ئەو بوو یێ نمرێن من یێن قوتابخانێ ئیمزادكرن.. وی گەلەك وێنە بۆ من كێشا بوون كوو نەھێنە ھژمارێ و بێی كو ئەو د چ وێناندا دەركەڤیت.. ھەر ئەو ژی بوو دەما رستا جلكان خاڤ دبوو وی دشداندەڤە.. ئەز ژ بابێ ھەمی زارۆكان دترسیام و بتنێ بابێ خوە نە، ئەز ژ وی نەدترسییام.. جارەكێ من چا بۆ بەرھەڤكر و بتنێ ئاڤ بوو و من شەكر كربوو دناڤدا و چا تێدا نەبوو و دگەل ھندێ ژی ل سەر كورسیا بچیك روونشتە خارێ و گوتە من، گەلەك یا خوش بوو و یێ دیار بوو گەلەك یا بدلێ وی بوو.
دەما من یاریا مالێ ب بیكا ژی دكر، من گەلەك ئەرك دكرنە بارا (بیكا دەیك) و لێ من نەدزانی ئەركێن (بیكا باب) چنە و من نەدزانی چ ئەرك بدەمێ و ژبەرھندی من دھەلگرت و پێش وێڤە من دگوت: ئەز دێ رابم چمە شولی، پاشی دا وێ بیكا من ب باب ناڤكری، ھاڤێژمە بن تەختی.
ل سپێدەھیەكێ، دەما ئەز دتەمەنێ نەھـ سالیێ دا، بابێ من ژخەو نەرابوو كو بچیتە سەر كاری، بەلكو چوو نەخوشخانێ و رۆژا پاشتر مر..
ئەز چوومە دژوورا خوەڤە و لبن تەختی ئەز ل بیكا باب گەریام و دەما من دیتی من توز ژێ داقووتا و من دانا سەر جھێ خوە.. من چ جار ھزرنەدكر، چوونا وی دێ ھوسان من ئێشینیت.. لێ چوونا وی ھێشتا یا من دئێشینیت و تا نوكە ژی ئەز بیرییا وی دكەم.
ـ ئیرما بومبیك: نڤیسەر و رۆژنامەڤانا ئەمریكی و ژ ئەگەرێ نڤیسینێن خوە یێ مللی، شیابوو خواندەڤایەكێ مەزن بخوەڤەگرێدەت.
ـ و: ع. بامەرنی
ـــــــــــــــــــــــــــــــــــــــــــــhttps://www.facebook.com/photo/?fbid=10217157664494053&set=g.209899095715001
ليست هناك تعليقات:
إرسال تعليق