ژ ھەولێرێ بۆ بەغدا (مونافسە) یا بەردەوامە!!

 عبدالرحمن بامەرنی

تە راستی بڤێت (مونافسە) یا خوشە، تایبەت ئەگەر مرۆڤ دگەل خوە و دەوروبەرێن خوە بكەت، ھەر چنە بیت دێ پاشی پێكھێینە ڤە و دێ ئێك و دوو حیل كەین! ڤێجا ئەو مونافسە وەكی سالێن شێستان كابانێ و كت و جوتانێ بیت سەرا مازییان یان وەكی سالێن حەفتییان شەرە كەو و شەرە دیكلانێ بیت یان وەكی سالێن ھەشتییان تەبەلانێ و كوركێ و چیڤ و پلیتانێ بیت یان ژی وەكی سالێن نوتان كرینا كادرێن حزبی بیت یان ژی وەكی سالێن دوو ھزارێ دامەزراندنا فەرمانبەران بیت یان ژی وەكی ئەڤروكە، مونافسە دناڤبەرا (ھشیار و بەرھەم)دا بیت.

گرنگ مونافسەیە و تشتێ خوش ل دەف مە كوردان، (من بەحسێ قوناغێن زارۆكینیێ یە)، كێشە نە بوو كی كولند بیت و كێ بلند بیت، كی ب سەركەڤیت و كی ژ بن بچیت و كی بكەڤیتە چینگێ و یا گرنگ، ل دووماھیا ھەر یاریەكێ دا تبلێن خوە كەینە دناڤ ئێكرا و بێژین (حیل حیل نە لمن و نە ل تە و ھەمی بۆ دوژمنێن كوردان).

بەری سەرھلدانێ ئەز باش نزانم، لێ پشتی سەرھلدانێ حزبێن مە چەندین جاران یێن رابووینە بەر سینگا ئێك و لدووماھیێ تبلێن خوە یێن قەلیچێ یێن كرینە دناڤ ئێكرا و ئێك و دوو یا حیل كری و ل ڤانە ھەمیان ژی، كورد بخوە بوونە و گورەپانا ھەڤركیێ(مونافسێ) یان بەردەرێ مالێ بۆیە، یان دناڤبەرا زارۆكێن تاخی دا بۆیە یان دناڤبەرا حزبان دابۆیە یان دناڤبەرا دەڤەران دابۆیە و یان دناڤبەرا زوناندا بۆیە و پشتی حیلكرنێ، ئەم یێن چوینە سەر و ستویێن ئێك دوو و ھەر وەكو چ چێنەبووی!.

مونافسا مە یا چوویە د قوناغەكا نویدا و پشتی شەرێ ئازادییا عیراقێ دەرگەھێ بەغدا بۆ مە كوردان ڤەبووی، (ھەرە مللەتا و بگرە عەدەتا)، ھەر باش بۆ چەند سالەكان بێدەنگیێ ڤەخاند و یا بۆ من نوكە جھێ پرسیارێ پشتی (مونافسا) دناڤبەرا (بەرھەم و ھشیار)دا و ب دەركەفتنا ئێكی ژوان و ئەگەر مە ڤییا تبلێن خوە یێن قەلیچێ بكەینە دناڤ ئێكرا، دێ ب چ رەنگ ئێك و دوو حیل كەین، ژبەركو یارییا ڤێجارێ ل سەر ئاخا مە نینە و ھندەكێن دی یێن پێش مەڤە دكەن؟!!

ـــــــــــــــــــــــــــــــــــــــــــــــــــــــــــــــــــــــ

http://www.rwangauraxna.com/ba/detail.aspx?IDNews=5398

https://www.facebook.com/photo/?fbid=10216597022238347&set=g.209899095715001