عبدالرحمن بامەرنی
هندەك تشت دناڤمەدا دبنە كەلتور و خوە ئەم نزانین، سەرەدەریەكا دروست ژی دگەلدا بكەین. بۆ نمونە، دەما كەسەك لبەر مرنێ بیت، شوونا ئەم خاترخاستنەكا جوان دگەلدا بكەین، جوان ب رێبێخین و دل بدلی بدەین و چركەیێن دووماهیێ ژ ژیێ وی چركەیێن خوش بن. خوش بوون ب واتەیا كو هەست بكەت چ تشت ل پاش نەمایە ژێ پەشیمان بیت یان هێلابیتە نیڤەروو و ئەم دەستێ وی بگرین، ژبەركو دوان چركاندا مرۆڤ پێدڤی هەر تشتەكییە دگەل مرۆڤیدا بیت، تایبەت كەسێن نزیكی مرۆڤی!
دێ رابین بخوە دادەین، پرچا خوە ڤەچرین، دێ پێ بێژین و هەیلا بۆ تە و زارۆكێن تە بۆنە ئێتیم و كی دێ چاڤێ خوە دەتێ؟ كی دێ خێزانا تە ب خودان كەت؟ كی دێ جهێ تە گریت و ئەو هەمی گری و نەخوشی و نە ئارامی و خوە ئەگەر ئەو كەسێ ل بەر مرنێ نە یێ مرنێ ژیبیت و دلێ وی هاتبیتە گرتنێ بۆ نمونە یان خوە ئەگەر مر بیت ژی، پشتی مرنا خوە روحا وی ئاگەهـ ژ وێ قەرەبالغیێ هەبیت، ئایا دێ ئەو روح چەند یا ئارام بیت و دێ بارێ وی/ وێ چەند دووقاتی گران و ب زەحمەت كەڤیت؟!!
مرن بخوە ئەم دزانین تشتەكێ ب ترسە و خوە مرۆڤ چەند تەمەنی ببەت، خوە مرۆڤ چەند یێ نەخوش بیت و مرۆڤ ژ ژیانێ بێزار ببیت و خوە هەمی تشت ل بەر چاڤێن مرۆڤی رەش ببن و مرۆڤی چ هیڤی نەمابن، لێ هەمجار مرۆڤ ژ مرنێ حەزناكەت و مرۆڤی نەڤێت ب مریت.
مرن كەسێ ناس ناكەت، سەرۆك بیت یان هەژار و بەلنگاز بیت یان پیر و گەنج و زارۆك بیت، دێ هەر مرن هێت، ئەڤە ژ وەختێ ئادەمێ باب وەرە هوسانە و كەس د ژیانێدا نامینیت، چ كەسەكێ باش بی یان یێ خراب.
مادەم مە باوەری ب مرنێ هەیە، ئەم دزانین دێ هەر مرین و دەما كەسەكێ نزیكی مە د چركەساتێن خوە یێن دووماهیێدا بیت، بوچی ئەم جوان دەستێ وی ناگرین، هیڤییا بدەنیێ كو مرن رێكەكە و ئەگەر ژڤێ دنیایێ وەغەركر ژی، ئەم ژی دێ ددوفتەرا هێین، ئەم وی پشت راست بكەین، كو خێزانا وی دێ یا پاراستی بیت.
خوە كەلتورێ مە گەلەكێ جوانە، مێهڤانەك ژی خاترێ ژ مرۆڤی بخوازیت مرۆڤ جوان ددەتە رێ، كەسەكێ نیزیك مرۆڤی بچیتە باژێرەكی یان وەلاتەكێ دی و ئەم جوان و ب حەژێكرن ددەینە رێ، نە ب قیژە قیژ و حەوارییان و ئەم سەدا سەدا دزانین یێ مرنێیە.
ــــــــــــــــــــــــــــــــــــــــــــــــــــــــــــ
https://www.facebook.com/photo/?fbid=10216609897600223&set=g.209899095715001
ليست هناك تعليقات:
إرسال تعليق