عبدالرحمن بامەرنی
ئەز بەحسا جوداهییا دناڤبەرا كور و كچاندا ناكەم، كانێ دەیبابان دڤێت ببنە دایك و بابێن كوران یان ژی كچان! ئەڤە بۆ وان ڤەدگەریت و تێگەهشتنا وان بۆ ئایندێ وان و كاریگەرییا داب و نەریتان ل سەر وان و بخوە ئەڤە بابەتەكێ ب سەرێ خوەیە و ب كورتە گوتارەكێ، ئەز ژ دەرحەق دەرناكەڤم...! لێ یا من مەبەست پێهەی، چاوان تو بۆ كورێ خوە ل هەڤژینەكێ دگەری، دڤێت ب هەمان پیڤەر، تو بۆ كچا خوە ژی ل هەڤژینەكی بگەری.
دا باشتر بێژم، رەنگە دكومەلگەهێ مە یێ كوردی دا جارێ ئەڤ پێنگاڤە یا زوی بیت، ئەوێن نەشیاین یان نەشێن خوە ژ داب و نەریتان رزگار بكەن، لێ دڤێت بزانین، هەر كچەكا هەبیت دوو تەمەن یێن هەین، تەمەنەك هەتا پێدگەهیت و باشی و خرابییان ژ ئێك جودا دكەت، دڤێت باب و دایك و برا، پارێزییا وێ ژ هەر دەست درێژیەكێ بكەن و دتەمەنێ دوویێ دا، دڤێت باب و دایك و برا هاریكارییا هەمان كچ بكەن، ژ ئەوا وان ژێ د پاراست و چاڤێن وێ ژبەر دگرتن، كو ئێدی ئەو بخوە یا بەرهەڤ بیت ب رێكەكا دروست و رێگە پێدای وی كەسێ هەلبژێریت، ئەڤێ دێ دگەلدا بیتە ئێك نڤین (من سور و سور گوت، دا بابەت بێ چەپ و چیر بگەهیت).
رەنگە بێژن چاوان؟! بەرسڤ ب كورتی: دەما كچ گەهشتە تەمەنێ پێگەهشتنێ، دبیت ژ گڤاشتنێن داب و نەریتان، دەركەفتن و پەیوەندیێن وێ بهێنە سنورداركرن و ئەڤە بەرۆڤاژییا كوری یان كو كچ نەشێت لدویڤ حەزا خوە و هەلبژارتنەكا دروست هەڤژینی بۆ خوە دەست نیشان بكەت و دێ مینیت، كا دێ كی دەرگەهێ مالێ قوتیت و رزقێ وێ بیتە چ!! ژخوە ئەگەر دمالێدا نەبۆ قەیرە و مخابن دەیباب درەنگ هەست بڤێ قەیرەبوونێ دكەن.
دا ئەڤە روینەدەت ژی، دڤێت هەر زوی دەیباب هەست بڤێ چەندێ بكەن و كورەكێ بۆ كچا خوە پەیدا بكەن. ل دەردوورێن وان چ كور هەنە، نیاس بن یان كەس و كار بن گرنگ نینە! خواندنەكێ لدویڤ پیڤەرێن خوە بدەنە وان مالان ئەڤێن كور تێدا هەین و پەیوەندیێن خوە دگەل وێ مالێ باشتر لێبكەن، تێكەلیێن وان زێدەتر بن، رێكێ ب كچ و كوران بدەن و چاڤدێریێ ل سەر وان كێمبكەن، ئەگەر هەست پێكرن نزیكبوونەك دێ دناڤبەرا واندا هەبیت و ئەڤە ژبلی كو باب هەستا بەرپرساتیێ لدەف هەبیت و بۆ كچا خوە ژی ل كورەكێ گونجای بگەریت و من بەحسا وان كچان نینە، ئەڤێن دەرفەت ل بەر سینگا د ڤەكری..
ــــــــــــــــــــــــــــــــــــــــــ
https://www.facebook.com/photo/?fbid=10216691228353441&set=g.209899095715001
ليست هناك تعليقات:
إرسال تعليق