عبدالرحمن بامەرنی
ھەڤالەكێ من گازندا خوە بۆ من كر و دگوت: من دوو كور ھەنە و ھەردوو كورێن من دەرچوویێن زانكویێ نە و دخانیڤە بەتال و عەتالن! دەست بگلەییا كر و چ د حكومەتێ و حوكمداریێ نەھێلا. راستی ئەز وی ھندەكێ مافدار دبینم، ژبەركو ئەو كورێ جیرانێ خوە دبینیت، بتنێ ھەتا سیێ ناڤنجی یا خواندی و نوكە خودان ماركێتە و داھاتێ وی بتنێ دشێت خێزانەكێ ب زێدەھی ڤە برێڤە ببەت و ھەردوو كورێن وی، ئەوێ وی خەون ل سەر ئاڤاكرین، دخانیڤە د روونشتینە و وەكو من ل رێزێن ئێكێ گوتی (بەتال و عەتالن).
دا بھێمە سەر بابەتێ من مەبەست پێ:
زانكویێن مە باوەرنامان دكەنە ددەستێ مەدا و دەما پشتا خوە ددەینێ، ئەم نزانین كارەكی بۆ خوە پەیدا بكەین. باشە د نوكەدا ب سەدان دەرچوویێن پەیمانگەھـ و زانكوییان ل جاددێن دھوكێ پیاسا بێكاریێ دكەن و نزانن دێ چكەن! نەزانینا وان ژی بۆ چەند خالان ڤەدگەریت، ئەز بەحسا دامەزراندنێ ناكەم، لێ ئەز بەحسا پەیداكرنا كاری دكەم و چاوان مفای ژ شیانێن خوە یێن سالێن خواندنێ وەربگرن، ئایا كێماسی ژ وانە، خوە ناھاڤێژن چ كاران یان د لێگەریانێن واندا كار بدەست ناكەڤن؟!!
نەخێر، زانكوو و پەیمانگەھێن مە ھەمی تشتان نیشا خوێندكاران ددەن، ئەز بخوە چ رەخنەیان ل سەر ڤێ چەندێ ناگرم و بلا ئەو بابەتێ من نەبیت، لێ فەرە ماموستایێن زانكویێ ب ھەڤكاری دگەل كەساتییان، كەساتی مەبەستا من پیشەداران و وان مێھڤان بكەن و خویندكار گوھدارییا چیرۆكێن وان بكەن، خوێندكار دگەل بكەڤنە دان و ستاندنێ، زەحمەتییا كاری، پەیداكرنا كاری، بەردەوامی دگەل كاری، ھینگێ ئەزموونا قوتابی ژ چوار سالێن زانكویێ وەرگرتی و فێربووی دگەل پێنگاڤێن وی یێن بچووك ژبۆ ڤەدیتنا كاری تێرا وی ھەنە، بشێت بۆ خوە كارەكێ پەیدا بكەت.
یا من دڤێت بێژم، ماددەیەك ل زانكویێ بھێتە زێدەكرن بۆ دروستكرنا شیانان، مەرج نینە ماموستایێ زانكویێ وی ماددەی بێژیت. چ زانم؟ كی بێژیت لدەف من چ جوداھی نابن، لێ خالا گرنگ خوێندكار فێری ھونەرێ پەیداكرنا كاری بیت، نەك دێ چاوان د ئاھەنگا دەرچوونێدا بەرەڤ وەرگرتنا باوەرنامێ ڤەچیت!!
ـــــــــــــــــــــــــــــــــــــــــــــــــ
https://www.facebook.com/photo/?fbid=10216849617353067&set=g.209899095715001
ليست هناك تعليقات:
إرسال تعليق