مە نەزانی كی خائینە و كی كورد پەروەر؟!!

 عبدالرحمن بامەرنی

بلا ھەمیێ بكەین، بتنێ كوردینیێ ب ئێك نەفروشین! ئەڤە كومكرن و ڤێكخستن و دوبارە لێكدانەڤەییا رێژەيا زێدەترا ھەمی وان پوستانە، ئەڤێن ئەڤرو ل سەر سوشیال میدیایێ ب بەرچاڤێن من كەفتین، ببورن ئەڤێن ب بەرچاڤێن مە ھەمیان كەفتین، ژبەركو ھەر ئێك ژمە، خواندنا خوە یا تایبەت بۆ بوویەر و پێشھاتان ھەیە و ھەر ئێك دوێ پەنجەرەیێ را ل بارودوخێ دنێریت، ئەڤێ مە دڤێت ئەم ببینین!!

بتنێ وەك بیرئانین، د شەرێ ناڤخویێ سالێن نوتاندا، ھینگێ من دكانەكا سەعەتان ل نیڤا بازارێ دھوكێ ھەبوو و رۆژانە دەنگویێ كەتنا بریندارا و شەھیدێن شەرێ ناڤخو دھاتە گوھێن مە و د سەر گرانیێ و قەیران و ئابلوقێ را، شەرێ ناڤخویی بێھنا ھەمییان تەنگ كربوو و وەك نوكە كوردینی ب خەلكی دھاتە فروشتنێ، تایبەت ئەگەر دگەل لایەنێ وی یێ حزبی نەبایە. تا رێكەفتنا ستراتیژی دناڤبەرا ئێكەتیێ و پارتیێ دا ھاتیەكرنێ و ھەر دگەل ڤێ بیرئانینێ كو من مەبەست پێھەی. رۆژەكێ رۆژنامە ل دكانێ ل سەر مێزێ بوو و وێنێ رەحمەتی (مام جەلام و مەسعود بارزانێ) ل بەر پەرێ ئێكێ یێ رۆژنامێ ھاتبوونە دانان و كەنییا وان مزگینییا راوەستاندنا شەرێ ناڤخوە بوو و راگەھاندنا رێكەفتنناما ستراتیژی بوو دناڤبەرا ھەردوو حزباندا. دوو پیرەمێر ژی دروونشتی بوون و دەما چاڤێ ئێك ژوان ب وان وێنان كەفتی و گوت ئەڤە چییە، پا شەھید و بریندار و خوە كوژی و خایینكرنا ئێك دوو كیڤە چوون؟!!

من گوتێ مام ئەگەر ڤێ رۆژنامێ بۆ ئێك ژ شەھیدێن شەرێ ناڤخویێ داھێلینە ناڤ قەبرێ وی و خودێ بۆ ئێك دەقیقە گیانێ بدەتێ و ڤی وێنەی ببینیت، بتنێ دێ نەفرەتێ لخوە بارینیت، بۆ وێ رۆژێ و دێ جارەكا دی خوە د گورێ خوەدا درێژكەتەڤە.

ھەمان تشت بۆ ئەڤرو ژی و بتنێ یا من دڤێت بێژم، بلا سیاسەتا خوە بكەین، بلا رێكخستن و پرۆپاكندان بۆ حزبێن خوە بكەین، لێ بتنێ ژبیرنەكەین، كوردینیێ ب ئێك دوو نەفروشین، ئەم یێ بەرەڤ رۆژێن كوچا ملیونی ڤەدچین و ئەم ڤێ رۆژان لبیرا خوە بینین، نە حزبان سەرھلدان كرییە و دەما مە كوچا ملیونی كری نە حزبان بەرگری ژمە كر و نە حزبان ئەم زڤراندینە ناڤ مالێن مەڤە! تشتێ ژ حزبا بۆمە مای، ئێدی ئەم نزانین چ دروستە و چ نەدروستە، كی خاینە و كی كوردپەروەرە و كێ بەرژەوەندییا مللەتی و دەستكەفتێن مللەتی دڤێت و كێ بەرژوەندییا كومپانیێن خوە و مسوگەركرنا كورسیكێ؟ دا ژبیرنەكەم ژی مەرحەبا كوردینی...

ـــــــــــــــــــــــــــــــــــ

http://rwangauraxna.com/ba/detail.aspx?IDNews=5754

https://www.facebook.com/photo/?fbid=10216777371506966&set=g.209899095715001