ع. بامەرنی
دا ژڤێ سەرھاتیێ دەستپێبكەم، دا بزانین چاوان خازوك دروست دبن. ل ئێك ژ وێستگەھێن شەمەندەفران زارۆكەكی ھندەك علك كربوونە د قالكەكێدا و ل بەر خەلكی دگێراندن، ژ جل و بەرگێن زارۆكی یا دیار بوو كو یێ ھەژارە و خەلكی ژ دل پێڤەبوون، پارە دكرنە د قالكا ویدا و چ علك ژی بەرامبەر نە رادكرن. تا ئێك ژ بازرگانێن ناڤدار د بەر وی زارۆكی را دەرباز بووی و پێنج دولار كرنە د قالكا ویدا و ل شەمەندەفرێ سیاربوو. پێنەڤێت كەیفا وی زارۆكی گەلەك ب وێ پێنج دولارێ ھات و لێ ھند دیت ئەو بازرگان ژ شەمەندەفرێ ھاتە خارێ ڤە و ھاتە دەف زارۆكی و گوتێ: "من ژبیركر بەرامبەری پێنج دولارا خوە علكان ببەم، ژبەركو ئەز ژی بازرگانم و پاران بەرامبەری وی تشتی وەردگرم یێ ئەز دفروشم" و چەند علك ژ قالكا وی ئینانەدەرێ و ل شەمەندەفرێ سیاربووڤە.
پشتی چەندین سالان و ل ئاھەنگەكێ، ھەمان بازرگانێ ناڤدار دیت ئەڤە گەنجەكێ رێك و پێك و ژ سەروسیمایێ وی دیار، كو گەنجەكێ حال خوشە بنك ویڤە ھات و سلاڤكرێ و خوە بۆ دا نیاسین، كو ئەو ژی ئێك ژ بازرگانایە و گوتێ ئایا بیرا تە لمن دھێت؟ تو دزانی ئەز ئەو زارۆكم یێ تە پێنج دولار دایێ و تو ل شەمەندەفرێ سیاربووی و پاشی تو ھاتییە خارێ و تە گوتیە من، تو ژی وەك من بازرگانی و بەرامبەر ئەو تشتێ تو دفروشی پاران وەردگری. ئھا ژ ھینگێ وەرە ئاخفتنا تە چوو د سەرێ مندا، ژبەركو ھەر كەسێ ئەز ددیتم پارە ددان من، بێی ھیچ تشتەكی ژمن بكرن و ھوسا خازوكییا من دا یا بەردەوام بیت، لێ تە ئەز فێركرم، كو ئەز ژی وەك تە ببمە بازرگان و ئەز شییام ببمە بازرگان و چ پارەكی بێ بەرامبەر وەرنەگرم.
ــــــــــــــــــــــــــــــــــــــ
https://www.facebook.com/photo/?fbid=10216905420028099&set=g.209899095715001
ليست هناك تعليقات:
إرسال تعليق