ئاخر نزانم دێ چ نڤیسم؟!!

 عبدالرحمن بامەرنی

یا ب ساناھی نینە بشێم، ھەر تشتێ من بڤێت بنڤیسم، خوە نڤیسینێ ژی دەم و جھێن خوە دڤێن و مێشكەكێ ئارام بۆ دڤێت!. ئەز چەند پێدڤی وی مێشكی مە دا بشێم چەند رێزان ل سەر كەساتییا تە بنڤیسم. ئاخر من بەحسا ھەمی كەساتییا تە نینە، بۆ من چ گرنگە تە حەز ژ چ خارن كربیت و ژیانا تە یا زارۆكینیێ چاوان و لكیرێ دەرباز بیت و ھینگێ ھەڤالێن تە كی و كی بن؟! بۆ من چ گرنگە تە خواندنا خوە یا سەرەتای ل كیرێ خواندبیت یان ژی تو چەند قوتابیەكێ زیرەك بووی یان تە چەند گوھدارییا كەس و كارێن خوەدكر! بۆ من چ گرنگیە سنێلاتییا تە ب چ شێوە دەرباز ببیت و حەزێن تە یێن ھینگێ د چاوا بن و تو وی دەمی كەسەكێ یاخی بی یان تو نیڤ مێرەكێ سەربەردای بی و ھەمیان دل ئێشییا خوە ژ رەفتارێن تە دیتبن، خوە نیڤ مێر و سنێلە دوی تەمەنێ خوەدا ھەمی د وەسا بوون و ئاخر ئەز بوچی ڤان بەحسان بكەم، یێن چ گرێدان بمن ڤە نە، دەما ئەز دھێم و چەند رێزا وەك وەفایەك ل سەر تە بنڤیسم، ئاخر ئەز نزانم بۆ من چ گرنگە، تە چەند ھزرێن جودا ھەبن و سەركەفتن و شكەستنێن تە چبوون و ئەگەرێن وان چبوون.

 

ھەڤالێ چەلكی، نانا ئەز نەشێم ناڤێ تە بینم، ببورە ژبەركو ھێشتا ئەز ب سەرخوەڤە نەھاتیمە و ھزردكەم، ئەز یێ لبن بێھوشییا بەنجەكا درێژ و نزانم دێ كەنگی من بەردەت و ب ھوش خوەھێمە ڤە، ئاخر تە ژیان ب ئاسانی وەردگرت و كێشێن تە گەلەك د بچووك بوون،  گەلەك گەلەك بچووكتر ژ ئەڤ ھەمی كەسێن دی یێن ژیان بۆ خوە دكرنە كێشە و دكرنە بار و ل پشتا خوەدكرن. چەند تو یێ جوداتر بووی و ب ئاسانی مرۆڤ دشییا خوە نزیكی تە بكەت و ل تە بستە بیت، ژبەركو تە چ تشتێ ڤەشارتی نەبوو. من گەلەك جار حەزدكر نەڤیانێن تە بزانم، ئەو تشتێن دلێ تە ژ ژیانێ رەش دكەن، بزانم ھەڤالێن تو حەژێ نەكەی كینە و خارنێن تو حەژێنەكەی چنە و تە نەڤێت ل كیژ جاددێ پیاسێ بكەی و سلاڤی كیژ ھەڤالی نەكەی.

 

بیرا تە دھێت دەما تە بەحسا ھەڤالێن خوە یێن بەشێ ناڤخویی ل ناسریێ دكر و دەما چەند كوردەكێن خەلكێ ھەولێرێ و سلێمانیێ دگەل تەدا، ھینگێ تە ل پەیمانگەھێ دخواند و سەرەرای ھەمی یێن دوی بەشی ڤە جوداتر بوون ژتە ب رەفتارێن خوەڤە و لێ تە ھەمی ئینانە سەر ئەوا تەدكر و تە رێكخستنەك ئێخستە دناڤ واندا و چەند ب تە ئارام بوون و تە خواندن ل بەر وان شیرینتر لێكر. بێژە من چ سحر بوو دگەل تە و ب ئارامییا خوە، ھەر كەسێ تە تێكەلییا وی كربا، زوی ب تەڤە دھاتە گرێدان؟ ئاخر ژ كیرێ بزانم تو چ جورەكێ مرۆڤان بووی؟!!

 

من ژ دل دڤییا من بیرھاتنەكا تە یا نەخوش بەحسكربا، ھەر ژبەرخوە نە و ژبەر ڤێ نڤیسینێ ژی نە، دا كەسێ نە گوتبا بتنێ تو یێ پەسنا وی دكەی. ئاخر ئەو چ ژ كەساتییا تە و دلێ تە دزانن ھەتا ڤێ بێژن، دەما من پێشنیار كری كو ژبلی من و تە و سەعیدێ شەریف، ئەم كەسەكێ دی ژی بكەینە جوقێ خوە یێ ھەڤالینیێ و تە گوتی نەنە، ئەڤا ئەم د ئێك دگەھین باوەرناكەم كەسەكێ دی د مە بگەھیت. ئاخر دزانم من ژی چەندین ھەڤال ھەبوون و سەعیدێ شەریف ژی چەندین ھەڤالێن خوە ھەبوون و ژخوە ھەڤالێن تە تشتەكێ دیێ جوداتر بوون و من چ جارەكێ ژ دەڤێ تە گولێ نەبوویە تە بەحسا ئێك ژوان ب خرابی كری، لێ بوچی تە دگوت جوقێ مە بەسە، ئھا شنی ئەز یێ ھەست بڤێ چەندێ دكەم و دزانم جوقێ مە و پیرێ مە یێ ژ دەستێ مە دەردكەڤیت.

 

ببورە ھەڤالێ جەمال ئەز نزانم چ دنڤیسم و نە ئەز دزانم من دڤێت چ بنڤیسم و ئاخر دێ چاوان ئەڤێن دی ئەڤێن ڤێ نڤیسینێ دخوینن دمن گەھن؟ ئاخر ئەو چ تشتەكی نزانن، ئەو گەلەك دویرن ژ پەیوەندییا من و تە یا ھەڤالینیێ و نزانم باوەردكەم نە ھەڤالینی بوو و دبیت براینی و دبیت ژ براینیێ ژی زێدەتر بیت.

 

 ئاخر ئەز پێدڤی كەسەكیمە من ب راوەستینیت، ژبلی رێزكرنا پەیڤان ئەز چ دی نزانم و راستی ژی بیت ئەز نزانم دێ چ نڤیسم، لێبورنیێ ژ ھەر كەسی دكەم، ئەڤێن ڤێ نڤیسینێ دخوینن و بمن دكەنە كەنی، ئاخر ھین نزانن ئەز یێ چ دبێژم و ئەز یێ چ كود ڤەدكەم و یێ ھێلێن چ (تەلسم) ڤەدكەم، لێ یا ئەز ژخوە پشت راست، ئەڤا ئەز دنڤیسم دێ بەشەكێ گرانیێ ل سەر ملێن من سڤك كەت، ژبەركو گەلەك تشت ھەنە و من نەئیناینە زمان، لێ من باوەریەكا تەمام ب یاسایا ھێزا راكێشانێ ھەیی و ئەو تشتێن من نەگوتین، گیانێ تە یێ ھەست پێدكەت، ژبەركو لەز و بەزییا تە ئەم پێ ھێلاین، گەلەك تشتێن تە نیڤ تەمام ل پاش خوە ھێلان و گیانێ تە نەشێت ژڤان دەردووران بچیت و ئەو یێ ھەست ب مە دكەت و ئەم یێ ھەست ب وی دكەین و رێییا تە یا ڤەكری بیت..