عبدالرحمن بامەرنی
ھەلبژارتنا بەرێز نزار ئامێدی وەك سەرۆكێ كومارا عیراقێ، تشتەكێ چاڤەرێكری بوو و بۆ ھەمیان یا روون بوو، كو دناڤ پەرلەمانێ عیراقێ دا ئەو دێ دەنگان ژ هەمی ركابەرێن خوە زێدەتر ب دەستڤەئینیت و ئەڤە چێبوو. وەكو دیار، هەر سێ پۆستێن دیار ل عیراقێ، پۆستێ سەرۆكێ ئەنجومەنێ نوینەرێن عیراقێ و پۆستێ سەرۆك كۆمارێ عیراقێ و پۆستێ سەرۆكێ ئەنجومەنێ وەزیران، ئێك لدویڤ ئێك دھێت و تا حكومەت دھێتەپێكئینان، ل بەراھیێ دڤێت سەرۆكێ پەرلەمانی دناڤ پەرلەمانیدا بهێتە هەلبژاردن و ئەڤە بەری پێنج هەیڤان ھاتە روودان و كەسەكێ عەرەبێ سوونە بۆ سەرۆك پەرلەمانێ، ئەو ژی بەرێز (هەیبەت حەلبووسی) بوو و دا كو حكومەت بهێتە پێكئینان، دڤێت سەرۆكێ كومارێ بهێتە هەلبژارتن و ئەو حزبا سەركەفتی راسپێریت بۆ دەستنییشانكرن و پێكئینانا حكومەتێ و ئەڤە پێنج هەیڤ بوورین، نە كورد شیاین ل سەر كەسەكی رێكبكەڤن و بۆ ڤی پۆستی دەستنیشان بكەن، كو پۆستێ سەرۆك كوماری باھرا كوردانە و نە ژی عەرەبێن شیعە شیان رێكەفتنێ ل سەر كەسەكی بكەن بۆ پۆستێ سەرۆكێ حكومەتێ كو ئەو پۆستە باھرا شیعەییانە و دووماهی جار و دا ئەڤ پۆستێن هەنێ بهێنە پركرن، دەمەكێ دەستنیشانكری هاتە دەینان و سەرۆكێ كومارێ ھاتە هەلبژارتن و بۆ رێكەفتن و دەستنیشانكرنا سەرۆكێ حكومەتێ ژی (15) رۆژ وەك مولەت هاتینە دەینان.
لڤێرە عەرەبێن سوننە ب رێكەفتن شیان كەسەكی بۆ تژیكرنا پۆستێ سەرۆكێ پەرلەمانی دەستنیشان بكەن و لێ كورد نەشیان ڤێ چەندێ بكەن و هەمی حزبێن كوردی یێن د پەرلەمانێ عیراقێ دا هەین، بەشداری روونشتنا پەرلەمانی بوون ژبلی پارتی دیموكراتی كوردستان و ئەڤە ژی ب رامانا ل هەڤنەگەھشتنا حزبێن كوردی ل سەر دەستنیشانكرنا كەسەكی بۆ تژیكرنا ڤی پۆستی و ئەڤە ددەمەكیدا، دهەمی خولێن رابردوودا ئەڤ پۆستە ژلایێ یەكێتیی نیشتمانیی كوردستان ڤە دھاتە تژیكرن و پۆستێ سەرۆك كوماری ل بەغدا بۆ یەكێتیێ بوو و پۆستێ سەرۆكێ هەرێما كوردستانێ بۆ پارتی بوو و تا سالا 2018 ئەڤ ب رێكکەفتن دھاتە تژیكرن، لێ پشتی ھینگێ و د خولێن بوریدا دەرز كەفتنە ناڤ ڤێ رێكەفتنێ و پارتی و یەكێتی ب كاندیدێن جودا چوونە ناڤ ڤێ كێبركیێ و دناڤبەرا ناڤان و كەساندا، مە وەك كورد مفا ژڤی پۆستی وەرنەگرت، د دەمەكیدا مە دەهان كێشەیێن هەلاویستی دناڤبەرا هەرێما كوردستانێ و حكومەتا فیدرال دا هەنە و هەر پۆستەك بۆ مە گرنگە و پرسیار لڤێرە ئەڤەیە، ئەگەر ھێزێن مە یێن سیاسی ناكوكیێن خوە ب سەر بەرژەوەندیێن خوە یێن نەتەوایەتی بێخن، كی دێ مفادار بیت؟! مخابن ڤان ناكوكیان گەلەك دەرفەت یێن ژ دەستێ مە دەرئێخستین و مە نەشیاینە وەكو پێدڤی بەرەیەكێ هەڤگرتی ل بەرامبەر هەڤركێن خوە دروست بكەین و هەر جار ئەم ل دیرۆكێ دزڤرین و وێ شەرمەزار دكەین، كو ئەوە ئەگەرێ شكەستنێن مە.
ــــــــــــــــــــــــــــــــــ
رۆژناما كوردستانی نوێ ھژمار (9637) یا رۆژا 2026/4/15
ليست هناك تعليقات:
إرسال تعليق