عبدالرحمن بامەرنی
ژ نەبوونا درامایێن كوردی یان كێمیا درامایێن كوردی ل سەر كەنالێن كوردی و بۆ تژیكرنا ڤێ ڤالاهییێ، كەنالێن مە پەنایێ دبەنە بەر دوبلاژكرنا درامایێن بیانی و بۆ ڤێ ژی درامایێن توركی ل پلە ئێك دهێن و پاشی درامایێن عەرەبی و یێن وەلاتێ كوریا و تا ڤێرە رەنگە ئەڤە مافەكێ ئاسایی بیت بۆ ڤان كەنالان، خوە ئەگەر كەلتورێ مە ژ كەلتورێ وان یێ جودا بیت، رەوشت و تیتالێن كوردی ژ یێن وان نەتەوان دجودا بن و رەنگە ژی بۆ بینەری خۆش بیت ئەو ل ڤان درامایان بنێریت، ل بەرنامەیەكێ بەلگەیی یێن وەلاتێ چینێ یان وەلاتێ هندێ یان ل زەریا و دەریا یان ئەڤ گیانەوەرێن دبنێ زەریایاندا دژین. هەر دیسان بۆ مرۆڤی خۆشە مرۆڤ ل فلمەكێ هندی یان یێ مەكسیكی بنێریت، ژبەركو مرۆڤ هندەك دیمەنێن دی و ژیانەكا دی دبینیت و هندەك رەوشت و تیتالێن دی و سروشتەكێ دی دبینیت.
كێشە د كیرێ دایە؟
هەر نەتەوەیەك حەزدكەت كەلتورێ خوە جوان پیشان بدەت و مێژوویا خوە جوان بنڤیسیت و خوە ئەگەر ئەڤ نڤیسینە ل سەر حسابا هندەك گەلێن دی بیت. ژبەركو ژی مللەتێ كورد هەڤسوویێ هندەك مللەتێن دییە و رەنگە د گەلەك بواراندا مێژوویەكا هەڤبەش هەبیت، وەك چاوان مێژوویا كوردان دگەل عەرەبان چ وەك سنوور دناڤبەرا واندانە یان ب رێكا ئایینی و دیسان مێژوویا كوردان دگەل توركان و میرگەهێن كوردان و دەولەتا عوسمانی، ئێدی ئەڤ گەلێن هەنێ دێ مێژوویا خوە نڤیسن و راستە ئەو وەك خوە دێ سیناریوویا ڤێ مێژوویێ دارێژن و ئەڤە مافەكێ وانە و وان چاوان بڤێت دێ وەسان پیشانی نفشێ نوی دەن و خوە گوهارتنا راستیان ژی بیت، لێ دڤێت مە ئاگەهـ ژڤێ چەندێ هەبیت و تایبەت ئەو درامایێن بۆ سەر زمانێ كوردی دهێنە دوبلاژكرن و نابیت بێ بەرسڤدان، ئەڤە د سەر مەرا دەرباز ببن و وەك گەلەك جاران دەرباز بووین.
سزادان ب چ رێك بیت؟
دەما مێژوو شاش هاتە نڤیسین و ل سەر حسابا هندەك گەل و نەتەوەیێن دی بیت، دڤێت ئەڤ شاشیێن هەنێ بهێنە راستڤەكرنێ و د نوكەیا تەكنولۆژیایێدا مرۆڤ دشێت گەلەك رێكا بگریتە بەر بۆ ڤان راستڤەكرنان، ژبەركو ئەڤ شاشیێن هەنێ كارتێكرنا خوە ژ گەلەك روویانڤە ل پاشخوە دهێلن و رێكێن بلاڤكرنێ ژی ب گەلەك شێوەیانە و دا مە بەرگری هەبیت، دڤیا مە چاڤدێریەكا باش ژی هەبیت، چاڤدێریكرن ل سەر كەنالێن مە یێن ناڤخووی هەر كەنالەك بەرپرس بیت ژ دوبلاژكرنا كارێ خوە و ئەگەر چەند كارەك هاتنە ڤەگەراندن، ئەڤ كۆمپانیێن ب ئەنقسەت مێژوویا خوە ل سەر حسابا مللەتێ كورد دنڤیسن و وان ب هۆڤ و خیانەتكار ل قەلەم ددەن، كەسێ چ بەرهەمێن وان یێن دی ژێ نەكرین، ئەڤە بخوە دێ بیتە جورەكێ سزادانێ بۆ وان كۆمپانیا و ژبەركو كارێ وان بازرگانییە، ئەو دێ زێدەتر ڤان بابەتان بەرچاڤ وەرگرن و دیسان دڤێت هوشداری بۆ بچن، نە بتنێ بۆ كەنالان بەلكو بۆ خودیێ دەولەتێ بخوە و نابیت تشتەك بێ بەلگە بهێتە پیشاندان ئەگەر چ رهێن مێژوویێ نەبن و جوداتر ژڤێ دڤێت بهێنە رەتكرن و شەرمەزاركرن.
درامایەكا كوری وەك نموونە
دنۆكەدا و بۆ راكێشنا سەرنجا بینەری، كۆمپانی بەرەڤ تۆرێن كومەلایەتی دچن و هەر درامایەكێ یان فلمەكی بەش بەش دكەن و ب چەند خۆلەكان پیشانددەن، ب مەبەستا وەرگرتنا لایك و كومێنتان و دا بینەر ل هیڤیا بەشێ دووێ بمینیت و بەشداریێ دگەل كەنالی بكەت و ئەز وەك نڤیسەرێ ڤێ گوتارێ ئێك ژ بینەرێن ڤان درامایێن كورتم، لدەمێ خوە یێ ڤالا و درامایەكا كوری كو كورێ حاكمێ هەرێمەكێ دەستدرێژیێ دكەتە سەر كچەكێ و ژبەركو ئەڤە كارەكێ نە یێ جوانە و هەم ژبەركو كورێ حاكمێ هەرێمێ یە و دیسان كچ یا بچیكە و كارەكێ بێ رەوشەتییە و ئەڤ كەنالێ ئەڤ درامایە بەش بەش ل سەر تورێن كومەلایەتی بەخشدكر، وەرگێرەكا عەرەبی دانابوو سەر و تشتێ سەیر بۆ من هەر ناڤەكێ هەی، ناڤێن عەرەبی بوون چ یێن ژنان یان زەلامان یان تا دەڤەران و ناڤێ ڤی كورێ حاكمێ ئەڤێ خرابكار كربوو (غالب الكردی)، وەك پیشاندانەك كو كورد ژ كەڤن ژی بڤان كاران رادبن.
ئەم چ بكەین باشە؟
ئەز دگەل هندێ مە چ ژڤان كاران بێ بەرسڤ دەرباز نەبن، چ ب رێكا راستەوخو بیت، برێكا دەولەتێ بیت یان ژی ب رێكا بالیۆزخانا وان دەولەتان بیت ئەڤێن نڤیسینگەهێن وان ل هەرێمێ هەین و دیسان بینەر ژی ژڤێ چەندێ بهێنە ئاگەهداركرن.
ـ رۆژناما كوردستانێ نوێ ھژمار (9651) 5/4/2026
ليست هناك تعليقات:
إرسال تعليق