عبدالرحمن بامەرنی
سال یا تژییە ژ سەرسال و هەلكەفت و جەژن و بوونێن گرنگ و هەر ئێكێ ژڤان ژی، رێورەسمێن خوە یێن تایبەت هەنە. لێ هەردو جەژنێن رەمەزانێ و جەژنا قوربانی، زێدەتری هەمی جەژن و بیرەوەری و هەلكەفتێن دی، پارە تێدا دهێتە خەرجكرن و ئەڤ هەردو جەژنێن هەنێ، تایبەتن ب ئایینی ڤە و ژبەركو ژی زێدەتریا كوردان ئایین موسلمانن و ژبەركو ژی ئەم نێزیكی جەژنا قوربانی نە، دێ هەولدەین نیڤسكێ گوتارا خوە كورتبكەینە سەر ڤێ جەژنێ و ئەڤ مەزاختیێ خەلك دكەت.
وەك دیار ل ڤان هەردو جەژنان خەلك بەرەڤ كرینا تشتان دچیت، جلۆبەرگێن نوی بۆ زارۆكان و كرینا شریناهیان و نووكرنا مالێ، هەر چەندە ل جەژنا نەورۆزێ ژی كو دبیتە سەرسالا كوردی، خەلك جلكان دكریت و تایبەت جلكێن كوردی و خوە بەرهەڤدكەن بەرەڤ سەیرانان بچن، لێ ل هەردو جەژنێن ئایینی، زێدەتر خەلك مەزاختنێ دكەت و ئەڤە ژبلی كو ل نەورۆزێ دڤان سالێن بوریدا ئەڤ خەرجیێن هەنێ دگەلدا زێدەبووینە و بابەتێ مەزاختنێ و كرینا تشتان سەر ژ هەمی تشتەكێ دی د ستینیت، تایبەت دناڤ تەخا دەستكۆرت و كێم داهاتاندا بوویە جهێ ل سەر راوەستیانێ و پرسیارا گەلەك دهێتە پێش، ئایا ئەم نەشێین مەزاختیێ خوە كێمتر لێبكەین؟
مەزاختن و خەرجكرن و سەرەدانێن مە بۆ بازاری، زێدەتر دكەڤنە د بەربەركێن یان چەند رۆژەكێن بەری جەژنێ و لڤین دكەڤیتە هەر تشتی، بازار ژ مرۆڤان پر دبیت و یان بكرن یان فرۆشیارن و خەلكێ مە ب گشتی یێن فێر بووین، ل رۆژێن دووماهیێ بەرەڤ بازاری دچن و بازرگانێن مە ژی یێن فێر بووین هەر تشتێ سالێ هەمیێ ل عەمبارێن دكانێن واندا دمینیت، دئێخنە ناڤ بازاری و ژبلی گرانكرنا بهایێن كەلۆپەلێن خوە، تشتێ كوالیتا وان نەباش یان ئەم دبێژینێ ستووك ژی دهێتە ناڤ بازاری و خەلك دكریت. ئەڤ كرینا هەنێ ژی كو من مەبەستە دڤێ گوتارێ دا بەحس بكەم، ژبێ پلانیا بكری ب خوەیە، كو ئەو ئەگەرە بارگرانیێ ل سەر خوە دروست بكەت و هەم ب گرانی تشتان ب كریت و دیسان تشتێ نەباش و كوالیتا وان نزم بكریت.
چ بهێتەكرنێ باشە؟ ئەز نابێژم تشت نەهێتەكرینێ، ژبەركو زارۆكن و جەژنە و زارۆكان شریناهیێن خوە دڤێن و جلوبەرگێن خوە دڤێن و دەیباب ژ كیڤە دئینن، دڤێت بۆ پەیدا بكەن، لێ ئایا ئەم دشێین دەستگرتی تر ڤان تشتان بكرین یان نە؟ بەلێ ئەم دشێین، ژبەركو گەلەك تشت یێن هەین و ئەم دشێین بەری چەندین رۆژێن جەژنێ بكرین، هێشتا بازار نەبوویە قەرەبالغ و گران بوویی، ژبەركو ب كرینا تشتان یا زێدە و پێكڤە، تشت بخوە ب بها دكەڤیت و خالا دی، ئەم ل بازاری و ل وان جهان بگەرین یێن مرۆڤی ئیستیغلال نەكەن و بهایێ وان كێم بیت و دڤێت ئەم هەمی ل خالەكێ د هشیاربین، مەبەست ب جەژنێ نە هەر تشتێ مە د خانی ڤە هەیی و هەر پارێ مە هەیی ئەم خەرج بكەین و تشتان پێ بكرین، بەلكو ژبیر نەكەین رۆژێن دیڤدا ژی مەیێن هەین و ئەم دێ پێدڤی پارەی بین و دێ مەزاختنێ كەین و ئەم بەرامبەری خێزانێن خوە و زارۆكێن خوە بەرپرسیارین، بلا چاڤلێكرنا كورە مە ل خالەكا نزم نە راوەستیینت و بابەتێ زێدە مەزاختنێ، ب هیچ رەنگەكی مە نائینتە پێش.
ــــــــــــ
رۆژناما كوردستانی نوێ ھژمار 9665 یا رۆژا 2026/5/25
ليست هناك تعليقات:
إرسال تعليق