بەرازێ مرۆڤ

عبدالرحمن بامەرنی

ما بەراز دھێلیت. ئەڤە بەرسڤا من بوو ژ بۆ ھەڤالەكی، دەما گوتی تو چاڤێ خوە ددەیە رەزێ خوە، چاڤێ خو نادەیێ؟ ئەو بخوە نە ھەڤالێ منە، بەلكو دۆستەكێ نزیكێ بابێ من بوو. گوت، ل سەر دەمێ مە زیانێن بەرازی دناڤ رەزاندا دكێم بوون، دەما مە بەرازەك كوشتبا ژی، فەلا گوشتێ وی ژمە دكری و پارێ فرۆشتنێ، زیانا مە قەرەبوو دكر. من گوتێ مام، ئەو دەمێ وە بەراز دكۆشتن، وە بەرھەمێ رەزێ خوە دخار، نوكە ھەر كەسەكێ بەرازەكی ب كۆژیت دێ (500) ھزار دیناران سزای دەت و یێ دوو بەرازان ب كۆژیت دێ ملیون دیناران ھێتەسزادان؟

مامی ب سەرسورمانڤە گوت، ڤێجا ئەڤە چ (500) ھزار دینارن؟ من گوتێ دەما بەراز بەرھەمێ باھیڤێ دخوت، كومپانیەكا ھەی باھیڤان ژ دەولەتان ھاوردە دكەت، ئەو یێ دی قازانجێ ناكەت و بۆ تری ھوسا و بۆ ھرمیكێ ھوسا و بۆ باجان سوركێ ھوسا و مە ژی دەستێ ژ رەزی بەرداین. مامی ئاخفتنا من بری و بەرێخوە ركۆرك دا من گوت: تو بەحسێ چ بەراز دكەی ئەز د تەناگەھم، بەرازێ بەراز یان بەرازێ مرۆڤ؟ من گوتێ ما بەرازێن بەراز ھەنە؟ مەبەستا من دا بێژمێ ما بەرازێن مرۆڤ ھەنە، لێ تەلەفونێ رێ نەدایێ بەرسڤا من بدەت و ئەز ژی برێكا خوە چووم.