عبدالرحمن بامەرنی
پروژێ رووناكی یێ شیایی ژ چەندین روویانڤە كێشێن كارەبێ كێم بكەت، وەك نەهێلانا موەلیدێن ئەهلی و بلندكرنا سركێتی و پیسكرنا ژینگەهێ، لێ ئەڤە هەمی ب هەروە نەبوویە و هاولاتی یێ كەتیە ل بەر هەلبژاردەیا یان دێ سەرێ هەیڤێ بهایێ مەزاختنا كارەبێ دەی یان دێ كارەب ل سەر تە هێتە برین و ئەز بەحسا گرانی یان ئەرزانیا بهایێ یەكەیێن كارەبێ ناكەم، لێ هەر كەسێ دیڤچوونێ بكەت و لدویڤ داتایێن دهێنە بلاڤكرن بنێریت، دهۆكێ پەرامبەر پارێزگەهێن دی، زێدەتریا گازندەیان هەیە و ئەگەر رێژا بهایێ بۆ مالان دهێت ژی بەراورد بكەین، بهایێ مەزاختنێ ل دهۆكێ زێدەترە و شوونا دیڤچوون بۆ ڤێ جوداهیێ بهێتەكرنێ و بۆچی ئەڤ بهایێ زێدە؟ دێ بینی هاولاتی هاتنە سزادان، چ ئەو سزادانا هەنێ ب برینا كارەبێ بیت یان وەرگرتنا پارێ زێدە و چاوان مە دهەیڤا بوریدا دەنگێ نە رازیبوونێ دیت و خوپیشاندانێن خەلكی و چاوان دو چالاكڤان هاتنە زیندانكرن و تا نوكە ژی دەستەسەركرینە و ئەڤە ژبلی گوهورینا رێڤەبەرێ گشتییێ كارەبا پارێزگەها دهۆكێ.
گرانترین بها ل دهۆكێ یە
د سەرەدانەكێدا بۆ بەشێ خزمەتگوزاریان یێ پرۆژێ رووناكی ل رێڤەبەریا بلاڤكرنا كارەبا پارێزگەها دهۆكێ، پشتی مە گازندە گەهاندیە ئێك ژ كارمەندێن ل سەر كومبیوتەری و ئەوی بەرێ مەدایە كەسەكێ دی، كو گازندا مە پارێ مەزاختنا هەردو هەیڤێن (1 ـ 2) بوو و برێ پارەی ژی 348 هزار دنیار و یێ هەیڤا دو سێسەد و 301 هزار دینار بوون. كارمەندی گوت ئەڤە بهایێ وێ كارەبێ یە یێ تە مەزاختی و ئەم نەشێین بۆ تە چ بكەین! راستی گوتنا وی ئەز شۆك كرم، من گوتێ ب چ رەنگەكی من ئەڤ كارەبە نە مەزاختیە و دمالێ دا ئەم گەلەك سەخبێریێ دكەین و دەما دیتی ئەز یێ رژدم، بەرێ مندا ژوورەكا دی و گوت بێژێ كارەبا من (سواپ)ە و دەركەت نە بتنێ ئەز بەلكو چەندین كەسێن دی وەك من هەمان ئاریشە هەبوو و ژ دەڤێ كارمەندێ ڤێ ژوورێ، گوت دڤێت ئەڤێن ئەڤ هێلە گرێداین بهێنە سزادان، هندی شاشی یێن هەین، ب هەر حال ژمارەكا تەلەفوونێ دا من و پشتی چەندین جاران من شیا دگەل خوە ل ترۆمبێلێ سیاركەم و بهێتە كەشفێ، دەركەفت كارەبا من بۆ جیرانەكێ من دچیت و یا وی بۆ من دهێت، پارێ من سێسەد و ئێك هزار دینار بوون و یێ وی بتنێ سیهـ هزار دینار. كارمەندێ هاتیە كەشفێ گوت من دروستكر و رەنگە تا 10 رۆژێن دی كارەبا وە دروست بیت، من گوتێ ئو ئەو پارێ ل سەر من، كو پێدڤیە جیرانێ من بدەت؟ گوت تە یێ هەیڤەكێ یێ دای، ئەو دێ بۆ تە بیتە رەسید و ئەڤێ دی دێ جیرانێ تە دەت.
برینا كارەبێ ل سەر من
بۆ دیڤچوونا بابەتی من دو جاران سەرەدانا دائیرا كارەبێ كر، جارا دووێ گوتە من ل ئێكێ هەیڤا سێ كارەبا وە یا دروست بووی، تو دێ پارێن خوە دەی و جیرانێ تە دێ پارێ خوە دەت. من گوتێ ئو پارێ كەڤن؟ گوت دێ دائیرە تەلەفونا وە هەردووكان كەت و پشتی دو رۆژان ژڤێ سەرەدانێ كارەبا من هاتە برینێ. من پەیوەندی ب ژمارە (1992)ێ كر، بەشێ خزمەتگوزاریان و كارمەندەكی تەلەفون كر و گوت دێ بۆ تە پرسیار كەم، پشتی دەمژمێرەكێ هیچ بەرسڤ نەبوو و من تەلەفون كرە ڤە و كەسەكی ب ناڤێ (م. ن) تەلەفوون راكر و پشتی من كێشا خوە بۆ گوتی. گوتە من دێ كێشا تە كەمە راپۆرت و بلند كەم، من گوتێ راپۆرتێ دێ نڤیسی یان چاوان، ژبەركو من كارەب نینە و ئەزموونن و مە زارۆكێن خواندنێ یێن هەین؟ گوت پشتی چارێك سەعەتێ تەلەفونێ بكە و من بۆ كر و پشتی نیڤ سەعەتێ ژ ئینان و برنا ئاخفتنێ، گوت ئەز نەشێم بۆ تە چ بكەم و دڤێت قەستا دائیرا كارەبێ بكەی.
بوچی سزا؟
ئەڤا ل سەری من گوتی، نە حالەتەكێ تایبەتە بەلكو نموونەیەكە و پێدڤییە دیڤچوون بۆ بهێتەكرنێ و هەمی ب داتا و بەلگە لدەف منن، نوكە ئەز یێ ڤێ گازندێ دنڤیسم، ئایا چەند كەسێن دی وەك من هەنە و هەمان كێشە یا هەی و شوینا دیڤچوون بۆ گازندا وان بهێتەكرنێ، دێ ب برینا كارەبێ هێنە سزادان؟ ئایا دڤێت كی بهێتە سزادان؟ ئەز یان جیرانێ من یان كارمەندێ دائیرا كارەبێ، ئەڤێ كارێ خوە دروست نەكری، یان ئەڤ كارمەندێ چوویە سەر عامودا كارەبێ و ژمارا من و جیرانێ من تێكەلی ئێككری، یان ئەڤ كەسێ ل سەر تەلەفونێ و گازندێن خەلكی وەردگریت و سەرەرای من هوردەكاریێن كێشا خوە بۆ گوتین، لێ هەر كارەبا من نەهات؟ ئایا كی دێ قەرەبوویا هاتنوچوونێن من دەت، دەركەفتن ژ دەوامێ و پێنج جاران سەرەدان بۆ دائیرا كارەبێ و ئینان و ڤەگەراندنا كارمەندێ (كەشف)ێ ژ دائیرێ بۆ دائیرێ ڤە؟ ئایا كی بەرپرسە ئەگەر نمرێن ئەزموونا زارۆكێن من یا كێم بیت، ژبەركو كارەب ل سەر مە هاتەبرینێ و مال تاری بوو؟
ـــــــــــــــــــــــــــــــــ
ـ رۆژناما كوردستانی نوێ ھژمار 9661 - 2026/5/19
ليست هناك تعليقات:
إرسال تعليق