عبدالرحمن بامەرنی
سیاسەت ل هەرێما كوردستانێ، ل سەر هەڤسەنگیا هێزێ یا دابەشكریە. لایەنێن ڤێ هەڤسەنگیێ ژی، هەر ئێك ژ (یەكێتی نیشتیمانی و پارتی دیموكراتی) كوردستانن و ئەڤە ژ سەرهلدانێ وەرە، ئەو هەردو حزب حوكمرانیێ ل هەرێما كوردستانێ دكەن و تشتێ بالكێش دڤێ هەڤسەنگیێدا، هلكشان و داكێشانا ڤێ هەڤكێشەیێ یە، دەما لەنگی دكەڤیتێ، پەیوەندیێن وان تێكدچن، ل بەر ئێك دبنە رەشە و ماكینێن وان یێن راگەهاندنێ دكەڤنە بەرامبەری ئێك و تەخوینكرنا ئێكودوو ب سەرێ خوە و تشتێ سەیر، سەركردەیێن ڤان هەردو حزبان ژی دڤێ هەڤكێشەیێ دگەهن و چ لایەنەك بێی لایەنێ دی نەشێت دەستهەلاتێ ل هەمیا هەرێما كوردستانێ بكەت.
نموونا دیموكراسیەتێ و هەلبژاردنێن ئازاد، شوونا ببنە دەرگەهێ ئاڤەدانكرنێ و پێشكەفتنێ، بووینە دەردەسەری و كێشێن مە یێن سیاسی چ ناڤخویی چ ژی د عیراقا فیدرالدا، ئالۆزتر لێكرینە. بڤێ جورە دیموكراسیەتا ئەم ل سەر هەلبژاردنان ئاڤا دكەین، ئەم پاشدا دزڤرین، ژبەركو نە سیاسەتا مە ل هەرێما كوردستانێ د مەبەستا هەلبژاردنان دگەهیت و نە تێگەهشتنا مە وەك خەلكێ ئاسایی بۆ هەلبژاردنان یا دروستە و دەما پیڤانێن مە ل سەر ئەنجامێن ڤان هەلبژاردنان بن، ئێكەم تشت، دێ لەنگی كەڤیتە ڤێ هەڤسەنگیێ و هەروەكو نوكە ئەم دبینین و پێكنەهاتنا حكومەتا هەرێما كوردستانێ و ئەزموونێن حوكمرانیا مە یا ژ سالا 1992ێ وەرە و ئەڤە ژبلی ئەو باجا ئەم ل سەر حسابا دەستكەفتیێن خوە ل عیراقێ ددەین، ژبەركو ئەو كەسێن دهێنە هەلبژاردن، ل سەر بنەمایێ (دەنگان) دبنە پەرلەمانتار و مەرج نینە ئەو كەسەكێ خودان ئەزموون و كارا بیت، بتنێ بەسە ئەو دشێت دەنگان خرڤەكەت و ژخوە بابەتێ زانكۆیێ و باوەرنامێن دەرچوونێ و خواندنا بلند ب سەرێ خوە، بتنێ دا حزب كادرێ خوە بینیتە پێش، دێ هەمی رێكەكا ئاسانكاریێ بۆ خۆشكەت كو ببیتە خودان باوەرنامە و بێی ئەم بزانین ئەڤا هەنێ ل سەر حسابا مللەتی و دەستكەفتێن مللەتی دهێتەكرنێ.
كەنگی هەڤسەنگی هەبوو و ئەڤ لەنگیا هەنێ چاوان پەیدابوو؟ رەنگە بەرسڤدانا پرسیارەكا ژڤی رەنگی، مە ل گەلەك راستییان ئاشنا بكەت و ئەگەر پاشدا بزڤرین، شەرێ ناڤخویی و دو ئیدارەیی و تا رێكەفتنناما ستراتیژی دناڤبەرا یەكێتیی نیشتمانیی كوردستان و پارتی دیموكراتی كوردستاندا هاتییە موركرن، سیاسەتا هەردو حزبان ژی ئاراستەیەك دی بخوەڤە ددیت، تێگەهشتنا حزبێن مە ژی بۆ سیاسەتكرنا چ ل هەرێمێ یان ل عیراقێ ل سەر بنەمایێ ڤێ تێگەهشتنێ بوو و هەڤسەنگی یا راگرتی بوو. كەنگی لەنگی كەفتێ، دەما لەنگی كەفتییە ڤێ هێزێ، ژ رەحمێ یەكێتیی نیشتمانیی كوردستان بزاڤا گوڕان ژ دایكبوو و ئەڤە ئێكەم درب بوو بڤێ هەڤسەنگیێ دكەڤیت، چەندین حزب و لایەنێن دی دروست بوون و هلكشان و داكەفتن كەفتنە ئەنجامێن هەلبژاردنان، لێ تشتەك نەهاتە گوهورین؟!! ژبەركو گوهورین ب سەر هێزێدا نەهات، ئەڤا هاتیە گوهورین، ئەنجامێن هەلبژاردنان بوون، لێ ئەو هەلبژاردنە ژی بەرەنجامێ دەنگدەرەكی بن، دنیابینینا وی بۆ عەشیرەتا وی بەری دنیابینینا وی بۆ دیموكراسیەتێ بن، دێ ئەنجام وەكی نوكە بن، كو ئەم بەرەڤ سالا دووێ دچین و هێشتا مە حكومەت نەیی.
ــــــــــــــــــــــــــــ
رۆژناما كوردستانی نوێ ھژمار (9658) - 2026/5/14
ليست هناك تعليقات:
إرسال تعليق