عیدالرحمن بامەرنی
حكومەتێ تێرا خوە قەیرانێن سیاسی و ئابووری هەنە و خوە ژ كارڤەدانێن رایا گشتی ژی ددەتە پاش، ئەڤ دیمەنێ هەنێ تشتەكێ بەرچاڤە ل هەرێما كوردستانێ و ئەڤە چەندین سالە خەلك دناڤ ڤان قەیرانێن ئێك لدویڤ ئێكدا دژیت، هەر ژ (گیرۆبوونا مووچەی، نەبوونا كارەبێ، دەستنیشانكرنا بهایێ ئەمپێرێ كارەبا موەلیدەی، گرانبوونا بهایێ لیترا بانزینێ و غازا مالان و ل زڤستانێ ژی گازا سوپێ و گرانبوونا بازاری ژی ب سەرێ خوە) و لڤێ دووماهیێ و دا حكومەت خوە ژ كارڤەدانێن خەلكی دوور بگریت، مەبەستا من حكومەت چ ب رێیا وەزارەتێن پەیوەندیدار یان حكومەتێن ناڤخویی ل سەر ئاستێ پارێزگەهان، دێ بینی بابەتەك كەفتە ناڤ تورێن كومەلایەتی و ئەو بابەتە بۆ (ترێند)، ئەڤە زێدەتر دگەل دەستنیشانكرنا بهایێ ئەمپێرێ كارەبا موەلیدەی پەیدا د بوو، دا بینی ل نێزیكی سەرێ هەیڤێ پۆستەك كەفتە ناڤ تورێن كومەلایەتی و بهایەك بۆ ئەمپێرێ كارەبێ هاتیە پێشبینیكرن و ئێدی دا كومێنت هێنە نڤیسین و چ ئەڤێن ئەڤ بهایە ب نە رەوا دزانین، چ ئەڤێن هەژار و دەست كورت یێن شیانا دانا بهایێ كارەبێ نەبن و تا دگەهیتە وان كەسان ئەڤێن بابەت ب دەرفەت دزانین و د هاڤێژتنە جهێن پەیوەندیدار و ب بازرگان و ب گەندەل و خوین مێژ ناڤدكرن، ژخوە ئەڤێن ژ هەر تشتەكی د نەرازی و دڤیا ئاژاوێ دروست بكەن، بۆ وان دبیتە دەرفەت، رەخنە و ناڤزراندن و هەر چ جڤینەكا كرێت هەیی، دبێژن؛ ئێدی دا لایەنێن پەیوەندیدار هێنە سەرخەت، چ گوتبان ئەو بها نە یێ فەرمی یە، یان گوتبان دێ لیژنەیەكا تایبەت دگەل خودانێن موەلیدان روونیت و دێ بهایەكێ گونجایی دەستنیشان كەن كو نە زیان بگەهنە خودانێن موەلیدان و نەژی هاوولاتیان و تا هندەك جاران دا كارگێریا پارێزگەهێ كۆژمەكێ بچیكێ پارەی ب ستوو خوەڤە گریت، وەك هاریكاری بۆ هاوولاتی.
مەبەستا من بڤێ رێزكرنێ ژی، ئێخستنا بابەتەكی یە بۆ ناڤ راییا گشتی و ئەگەر كارڤەدانێن خەلكی د توند بن، راییا گشتی بهێتە سەر خەت، دا پێگوهورەكێ دی هەبیت و بهایەكێ دیتر هەبیت بۆ ئارامكرنا كارڤەدانێن جاددێ و ئەڤە نموونەیەكا باوە و چەندین جاران ب رەنگێن جودا خوە دوبارە دكەن و دووماهی نموونە ژی یا بەری چەند رۆژان بوو، هوشداریا وەزارەتا كارەبێ لدوور قەرێن كارەبێ و د هوشداریێ دا هاتییە هەر كەسێ د ماوێ (50) رۆژاندا پارێ كارەبێ نەدەت، دێ كارەب ل سەر هێتە برینێ و هەر چەندە وەزارەتا كارەبێ د هوشداریا خوەدا ئاماژە پێدابوو، كو ئەڤە د میانا (پرۆژێ رووناكی)دایە، لێ ئەو پوستێن دناڤ تورێن كومەلایەتی دا بلاڤدبوون، بگشتی بابەت بەحسكربوون و كارڤەدانا خەلكی و ترسا خەلكی زێدەتر ل سەر قەرێن كارەبا گشتی (نیشتمانی) بوون و ئەگەر وەزارەتا كارەبێ داخوازا وان قەران بكەت و یێ قەری د ماوێ (50) رۆژاندا نەدەت، هینگێ دێ نە ئارامییەك كەڤیتە ناڤ خەلكی هەمییێ و نە زەلالیا ئەڤێ هوشداریێ و شێوێ ئازراندنا بابەتی و كومێنتێن هاوولاتیان، رێك ب نموونا دەستپێكێ من بەحسكری ڤە دچیت، د دەمەكیدا پرانیا هاوولاتیان قەردارێ وەزارەتا كارەبێ نە و ڤێجا چ سەد هزار دینار بن یان چەند ملیون دینار بن و پشتی پرۆژێ رووناكی ژی جهێ خوە گرتی، ئێدی ناڤبرەك كەفتە ناڤ ڤان قەران، پارێن بەری پرۆژێ رووناكی ل جهێ خوەمان و هاتنە بێدەنگكرن و بتنێ پرۆژێ رووناكی جهێ وێ گرت و ب كریار ژی، كارەب ل سەر چەندین مالان هاتیە برین، ئەڤێن ب هەر بهانەیەكێ خوە ژ دانا قەرێن كارەبێ ددەنە پاش.
هوشداریا وەزارەتا كارەبێ ژی ب نموونا من ڤەدچوو، كانێ دێ رایا گشتی چاوان بیت و ئەو هەردەم ل میكانیزەمێ دگەریت، قەرێن كارەبێ ئەڤێن ل سەر هاوولاتیان هەیین، ب رەنگەكی ڤەگەرینیت و بڤێ چەندێ دێ كوژمەكێ باشێ پارەی بۆ وەزارەتێ و حكومەتێ ڤەگەریت و ژخوە ئەگەر كارڤەدانا جاددێ و رایا گشتی یا توند بوو، وەزارەت دێ بابەتی بتنێ ب پرۆژێ رووناكی ڤە گرێدەت و دێ ب بەلگە بەرسڤێ دەت، كو (هوشدارییا وەزارەتا كارەبێ یا روون بوو، كو بابەتێن برینا كارەبێ د چوارچوڤێ پرۆژێ رووناكی دایە) و روونكرنەك دشێت بابەتی خرڤەكەتە سەر ئێك و جاددێ و رایا گشتی بێدەنگ بكەت یان مژویل بكەت.
ــــــــــــــــــــــــــــ
ـ رۆژناما كوردستانی نوێ ھژمار (9702) 2026/7/21
ليست هناك تعليقات:
إرسال تعليق