عبدالرحمن بامەرنی
كوردینی یا لڤێرە ئەز ژێ بەحسدكەم، رێك بەحسێ تشتەكێ نە رێخستی بیت، ڤێجا چ نەبوونا پلانێ بیت، بریاردانەكا نەدروست، ب خەم نە وەرگرتن، پشتگوهاڤێتنا كێشەیان و چارەسەرنەكرنا وان و ئەڤێن هەنێ هەمی كورتكریێن تشتەكی نە، كو دەرئەنجامێ ئەم هەمی د رازینە و نە كەس د سەر مە رایە و نە كەس مایێ خوە د مە دكەت، ئەگەر كێماسی ژی مە هەبن، یانكو ئەم یێن خووینە و دێ ل ئێك و دوو بورین. كەنگی ئەڤە دهاتە گوتن، ل سالێن پشتی سەرهلدانێ مشە ل سەر ئەزمانێ خەلكی دهاتە ڤەگێران، ژبەركو هاولاتی د قوناغەكێ را دەرباز ببوو، سەردەمێ بەعسیان و هەمی جورەكێ پەراوێزخستنێ و سڤكاتیێ د دەستێ واندا ددیت، بوویە دەما سەركردایەتیا كوردی دەستهەلات گرتییە دەست، ژبەركو ژی ئەزموونا رێڤەبرنا دەولەتداریێ دناڤ دەستهەلاتا مە و جهێ بریاردانێ دا یا كێم بوو، كێماسی گەلەك هەبوون و تشتێ دناڤ خەلكی و دناڤ كەسێن كاربەدەست ژی دا، ئەگەر كەفتبانە بەرامبەر حالەتەكێ ژڤی رەنگی، دا بێژن (كوردینی) یە ئێدی وەك یاریێن زارۆكان، دەما دناڤ یاریێ دا هەڤركی و دلمان دروست دبوو، دا تبلێن خوە یێن قلیچێ كەنە دناڤ تبلێن ئێك را و بێژن (حیل حیل، نە ل من، نە ل تە) ب رامانا نە تە چ دگەل من هەیە و نە من چ دگەل تە هەیە و كەسێ گازندە نەدكرن و حوكمرانیا كوردی ل سەر ڤی دەستوداری هاتە پرێڤەبرن و هەرچەندە مە پەرلەمان و حكومەت و سازیێن رێڤەبرنێ هەنە، مە پلەیێن وەزیفی هەنە و مە یاسا و بنگەهێن پولیسێ و دادگەه هەنە، لێ هێشتا ئەم د وی گوهی دا د نڤستینە كو هێشتا (كوردینی) یا بەردەوامە.
قەیرانێن مە و كوردینیا مە ژی هەمان قاونە، كەنگی ئەم ل قەیرانێن خوە ژی هشیار دبین، دەما رێكێن چارەسەریێ نەمینن و ئەگەر قەیرانێ زێدەتر بدەینە ناسكرنێ یان كو كێشەیەك یا هەی و ب ساناهی چارەسەر نابیت، یا گەهشتییە راددەیێ بنبەست بوونێ، رێگری و كۆسپ و بەربەست یێ درێكا چارەسەریێ دا دروست بووین و كەنگی ئەم هەست بڤێ دكەین، دەما هەڤكێشەیا (كوردینی) یێ نەخووت و دەستهەلات، كو قەیران ل بن دەستێ وێ دروست دبن، چ چارەیان نەبینیت و د كەڤیتە حالەتێ شلەژانێ، كونترۆلا چارەسەركرنێ د دەستان دا نەمینیت و ئێدی بریارێن وێ ژی ب چ ناچن، وەكی نموونا بەری چەندەكێ یا قەیرانا بانزینێ، دەما حكومەت هاتیە سەر خەت و دڤیا چارەیەكێ بۆ گرانبوونا بهایێ بانزینێ دانیت، لێ چ پێنەهاتەكرنێ و ئێكەم لایەنێ بەرامبەری بریارێن وێ راوەستیای، خودانێن بانزینخانەیان بوون و ئێدی ژ بریارا خوە پاشكەز بوو، ژبەركو حكومەتێ درەنگ هەست ب مەترسییا ڤێ قەیرانێ كر، چ پلانێن پێش وەخت نەبوون.
ئەڤە ژی دەرئەنجامێ هەبوونا خەلەلەكێ یە د جهێ بریاردانێ دا، دناڤ دەزگەهێن نەخشە و پلاندانانێ، دناڤ دەزگەهێن چاڤدێریێ و دیڤچوونێ دا و رێنمایان و هندی ئەڤ رەنگە خەلەلێن هەنێ نەهێنە چارەسەركرن، قەیرانێن مە دێ د بەردەوام بن و هەكو ب كوردی دبێژن (ئەگەر بار هاتە سەر ستوویێ گای، ئێدی فایدە ناكەت) و دڤێت حكومەتا مە ژی ژ خەونا (كوردینی)ێ هشیار بیت و شوور ببیتە ناڤ دەولەتداریێ دا.
ـــــــــــــــــــــــــــــــــــ
ـ رۆژناما كوردستانی نوێ ھژمار 9720 - 2026/8/16
ليست هناك تعليقات:
إرسال تعليق