عبدالرحمن بامەرنی
تورێن كومەلایەتی ب هەمی پلاتفۆرمێن خوەڤە، یێن بووینە سەكۆیەك بۆ راكێشانا هەست و سۆزێن كەسێن دی، چ ئەڤ كەسێن هەنێ هەڤال و دۆست بن یان كەسێن دەردوورێن وی، هەڤپیشەیێن وی یان ژی باژێر و نەتەوە و هەر مرۆڤ بن. ئەڤە ژبلی كو بەشەكێ وێ بوویە بازار و كەلۆپەل و كەرەستە تێدا دهێنە پیشاندان، بەشەكێ وێ بوویە ژوورێن داخستی و ڤەكری، داهێنان و شیان و بسپوری تێدا دهێتە بەرچاڤكرنێ و بەشەكێ وێ بوویە قوتابخانە و بوویە جهێ فێركرنێ و د شیاندایە خەلك مفای ژێ وەربگریت بۆ پێشڤەبرنا شیانێن خوە، بۆ چارەسەركرنا كێشەیێن خوە و ئەڤە ژبلی وان هەمی پلاتفۆرمێن بۆ مژویلكرنێ و سەردابرنێ و دەمبوراندنێ هەبن و یا من مەبەست پێ، ئەو دەڤپیسی یەیە، ئەوا د تورێن كومەلایەتیدا دكەڤیتە بەرچاڤ و ئایا ئەڤ دەڤپیسییا هەنێ ژ بێچارەییا مەیە بۆ پێشهاتان؟ ژ نەزانین و بێ ئاگەهیا مەیە بۆ شرۆڤەكرنا روودانان یان ژی كەلتوورەكە بتنێ دناڤ مە كوردان دا هەیە و ئەم پێ بێهن فرەهـ دبین دەما دبینین كەسەك یێ دهێتە پاشڤە برن، كەسەك یێ دكەڤیتە ناڤ دەڤێ خەلكی و هەر چ ئاخفتنەكا كرێتە، خەبەرێن رەش، جڤین و شكاندن و پاشڤە برن و ئەڤە ژبلی بابەتێ دانەپالا خیانەتكرنێ ب وی كەسی، خیانەتكرنەك كو ئەم موزایەداتێن نەتەوەیبوونێ ب ئێك د فرۆشین؟
ئەگەر دەڤپیسی چەكێ كەسێن بێ دەستهەلات بیت، وەك چاوان ل بەری سەرهلدانێ و ژ لاوازیا خەلكی بەرامبەر وێ زولم و زورداریا رژێم و دارۆدەستەكێن رژێما بەعسا ژ ناڤچوویی بەرامبەری خەلكی دكر و ژ بۆ كێمكرنا فشارا ڤێ زورداریێ ل سەر دەروونێ وان، گەلەكان پەنا دبرە بەر دەرگەهێن ئەدەبان یان تەوالیتان و ل سەر دەرگەهی و هەر تشتێ وی دڤیا، هەر خەبەر و جڤینەكا دلێ وی پێ ئارام دبوو ددگوتنە زەلامێن ئەمنێ و سەدامی و كەس نەدهێلان، دەرگەهێ ئەدەبێن قوتابخانا تژی نڤیسین بوون و تا دەرگەهێن مزگەفتان ژی و نوكە بەشەكێ وێ بۆ ناڤ تورێن كومەلایەتی هاتیە ڤەگوهاستن. لێ پرسیار بوچی ئەڤە دهێتەكرنێ، ددەمەكیدا جیهان هاتە گوهورین و تەكنولۆژیایێ پێشكەفتن بخوە ڤە دیت و خەلك ئازادترە و رێكێن دەربرینێ ژی جوداترن؟! ئایا هەمان كەلتورێ وی سەردەمی یە و كورد نەشیاینە خوە ژ كەلتورێ سڤكاتیپێكرنێ رزگار بكەن؟ یان تاكێ كورد نەشیایە ئازاد بیت و ببیتە خودانێ دیتن و بوچوونا خوە و هەر زوی دكەڤیتە بن بارێ عاتیفێ؟
مخابن، ئەڤ عاتیفا ئەز ژێ دبێژم جورەكێ خوە بەردانێ یە دگەل كۆمێ و تاك هەست دكەت كۆم دێ وی پارێزیت و دێ ژیانا وی بۆ مسوگەرتر لێكەت و چ ئەو كۆما هەنێ عەشیرەت بیت یان ژی حزب بیت و دێ بینی كۆمێ چ گوت، كۆمێ چاوان هزر كر، دێ رەفتارێن وی ژی پەسەندكرن بیت و هەر كەسێ ل تورێن كومەلایەتی ژی بنێریت و ل ڤێ دەڤپیسیێ بنێریت و ب كومێنتان دا بچیت، هەمی كومێنت نزیكی ئێكن و ڤێ گوتنا من ئەرێ دكەن و تاك یێ كەتیە بن بارێ كۆمێ و ئەگەر دیتن و بۆچوونێن كۆمێ رەدكرن بیت، ئەو ژی دێ كومێنتا خوە ب رەدكرنێ دەت و ئەگەر ژی پەسەندكرن بیت ئەو ژی دێ پەسەند كەت و ژخوە ئەگەر بابەتێ خەبەر و جڤین و ئاخفتنێن كرێت هات و دەرگەهـ لێ ڤەبوو، بۆ وی ژی دبیتە دەرفەت و رێگە پێدانەك هەر فشارەكا ل سەر دەروونێ وی هەی ب رێكا ڤێ دەڤیسییێ و ئاخفتنێن نە شرین دەربكەت، خوە ئەگەر ئەو دەرفەت ل سەر حسابا وێ كۆمێ بخوە ژی بیت.
ــــــــــــــــــــ
ـ رۆژناما كوردستانی نوێ ھژمار 9685 - 2026/6/28
ليست هناك تعليقات:
إرسال تعليق