رێژین حكمەت
رۆمانا «عەلی حاول بەكۆ» ژ نڤیسینا (عبدالرحمن بامەرنی)یە و ل سالا 20025ێ ھاتیە چاپكرن. رۆمان بەحسا چیرۆكا تراژیدیا ئەنفالان ب شێوەیەكێ مرۆڤایەتی و واقعی دكەت. هەر چەندە رۆمان ل سەر ژیانا کارەکتەرێ سەرەکی (عەلی حاول بەكۆ)یە كو رۆمان پێ ھاتیە ناڤكرن، بەلێ (ژن)ێ رۆڵەکێ گرنگ و کاریگەر دناڤ رۆمانێ دا هەیە؛ رۆڵەکێ نە بتنێ وەک قوربانی، بەلكو وەک ستوونا بەردەوامیێ و پاراستنا ژیانێ.
رۆلگێرانا ژنێ د ڤێ رۆمانێ دا ب بێدەنگی دەردكەڤیت، لێ دەنگەكێ تژی ئازار و خوراگری و بەردەوامی. ئەو ژنێن نڤیسەر دێ رۆمانێ دا نیشان ددەت، نموونا ژنێن ئازا نە، زێدەتر نموونا ژنێن دایك بەرچاڤكرینە و خوراگریا وان، مەترسییا وان ل سەر بارۆدوخان و نڤیسەر بەحسا وێنەیەكی دكەت چاوان دەیكەك شیرەتا ل كورێ خوە دكەت، كو ئەگەر پێدڤی كر ھەر تشتی بكەت دا ژیانا ھەڤالێ خوە پارێزیت و خوە ئەگەر ئەو ھاریكاریكرنە ل سەر حسابا وی ژی بیت و د لاپەرێ 27ێ دا، دبێژێت: ((داخواز ژ كورێ خوە جەمالی كر و شیرەت لێكرن، ھەر گاڤا وی ھەست پێكر كو دێ من ڤەگوھێزنە بەغدا، ئەو قوربانیێ ژ بۆ من بدەت و ب ھەمی رێكەكێ ھاریكاریا من بكەت كو ئەز ژناڤ دەستێن وان رزگار ببم، خوە ئەگەر پێدڤی بوو ئەو ژی دگەل من بەرەڤ چیا ب رەڤیت)).
د رۆمانا «عەلی حاول بەكۆ» دا، گەلەك جاران رۆلێ ژنێ دناڤ مالێ دا دیار دبیت؛ بەلێ ئەڤ مالە نە جھێ ئارامیێ یە، بەلكو قەلا و پەناگەھەكە ل بەر شەڕ و هێرشێن دەستھەلاتێ. دێ بینی ژنێ رۆلێ، پارێزەریێ گێرایە، ژنەكا قارەمان و چاڤ نەترس و د نەخوشترین دەم ژیدا كو دێ خێزان بەرەڤ زیلێن عەسكەری چن و دێ خوە رادەستی حكومەتێ كەن، رۆلێ وێ دیار دبیت و گازندان ناكەت و بەلكو مەعنەویاتێن ھەڤژینێ خوە بلند دكەت و دبێژیتە تە چاڤ ل خوە بیت و خوە رادەستی دوژمنی نەكەی، ل لاپەرە 189 و 190 دا ھاتیە: ((دەیكا جەمالی دووماھی كەس بوو مە ئێك ھەمبێزكری، گوتە من نەكەی خوە رادەستی حكومەتێ بكەی، خوە ئەگەر تو ببینی ئەو دێ مە ھەمیان ل بەر چاڤێن تە كوژن)).
ھەر چەندە رۆمان زێدەتر ل سەر زەلامەكییە و ئەو ھەمی رۆلان دگێریت، بەلێ نڤیسەری (ژن)ێ وەك كارەكتەرەكێ لاوەكی نیشان نادەت، بەلكو وەك بنەمایێ ژیانێ دئینتە پێش. ئەگەر زەلام شەری بكەت ھەر ئەو ژنەیە ژیانێ پێشڤە دبەت و ئەڤ ھەماھەنگییا دناڤبەرا ژن و ژیانێ دا خالێن گرنگن یێن ڤی رۆمانێ بەحس كرین.
د رۆمانێ دا، گەلەك جاران ژن دبنە قوربانییا سیستەمێ سیاسی و سەربازی؛ لێ نڤیسەر چ جارەكێ وان ب وێنەیەکی لاواز و شکەستی نیشان نادات، ھەر چەندە بارودوخێن سەخت، ترس و برس و گری و تایبەت د وێنێن ئەنفالاندا، دەما خێزان ھەمی بەرەڤ چارەنڤیسەكێ نەدیار ڤە دچن.
ئێك ژ پەیامێن ڤێ رۆمانێ رەنگە ئەڤە بیت، كو نە بتنێ ئەنفالان ژیانا زەلامان ژناڤبرییە، بەلكو ژیانا ژنان ژی ب رەنگەكێ تەحل گوھورییە و كو ھەر ژنە بەرپرساتیێن وێ زێدەتر لێدھێن و ئەڤ بەردەوامیا ژنان د رۆمانێ دا وەكی ھێزەكا ئارام و كاریگەر دیار دبیت.
ل دووماھیێ ژی ئەم دشێین بێژن كو ژن د رۆمانا عەلی حاول بەكۆی دا نیشانەكە ژ بەردەوامیا كوردان، نیشان ددەت كو ھەر چەندە شەرو ئەنفال ژیانێ تەحل دكەن، لێ ژن ژی نە كمێتر ژ زەلامی ڤێ تەحلاتیێ تام دكەت و مرۆڤ دشێت بێژیت رۆمان دیدەڤانەكە ل سەر مێژوویێ و نە بتنێ مێژوویێ بەلكو ل سەر ھێزا مرۆڤایەتیێ بخوە ژی.
ـــــــــــــــ
رۆژناما كوردستانی نوێ/ پاشكویێ ئەدەب و ھونەر ھژمار 1427 یا رۆژا 16/7/2026ێ و ئەڤ پاشكۆیە ھەمی رۆژێن پێنج شەمبیا دەردكەڤیت و تایبەت ب ئەدەب و ھونەری ڤە
ليست هناك تعليقات:
إرسال تعليق