عبدالرحمن بامەرنی
داعش چوو و ھەكو ب كوردەواری دبێژین (ژڤی گوری بچیتە گورێ دی)؛ ئەڤ نفرینا ھەنێ ژی رێك بۆ وان كەسان دھێتەگوتن، ئەڤێن نەباش، ئەڤێن ھەر تشتێ خراب ل پاش خوە دھێلن و داعشێ ژی ئەڤە دكر و زێدەتر. بۆچی من بەحسا زڤرینا داعشێ كر و من نیشانا پرسیارێ ئێخستە ل پشت؟ دڤێت ئەم كورد چەند خوە ناس بكەین، ھند دەوروبەرێن خوە ژی ناس بكەین و ئەگەر ئەم ڤێ نەكەین، سوبەھی نە دویرە داعشەكا دی و ب ھزرەكا دی سەرھلبدەت و ئەگەر داعشا دھی ب ناڤێ ئایینی شیابیت خوە بینتە پێش و قوربانیێن وێ یێن سەرەكی ئێزدی بن، سوبەھی نە دویرە ب ھەر رەنگەكێ دی سەرھلدەت و ئھا پرسیارا من ئەڤەیە، ئایا ئەم بۆ ھەر پێشھاتەكێ د بەرھەڤ بین، ئەگەر تشتەكێ وەسا رویدا؟ باوەرناكەم بەرسڤەكا گونجایی مە ھەبیت، نەیارێن مە ل ئالیەكی و ل ئالیێ دی، مە خوە ئامادەكاری نەكریە و ھینگێ چ مفایێ خوە ھەیە ببیتە لاڤەلاڤا مە و چاڤێ مە دوبارە و سێ بارە ب مینتە ل دەولەتێن زلھێزێن جیھانی، كو بھێن مە ب پارێزن؟.
داعش كی بوون؟!
دا ئەم د داعشەكا دی بگەھین، دڤێت ئەم داعشا دوھی ناس بكەین و رەنگە ھەر ئێكی خواندنا خوە بۆ سەرھلدانا داعشێ ھەبیت و من ژی یا خوە یا ھەی، ئەو ژی دا كو ھەر گرۆپەكێ میناكێ داعشێ دەربكەڤیت و بشێت پێگەیێ خوە دروست بكەت، پێدڤییە سێ فاكتەر د ئامادەبن، ئەو ژی زەمینە سازی و عەقلێ مودەبەر و ھۆڤاتی(وەحشیەت). دگەل داعشێ ژی ئەڤ ھەر سێكە ھەبوون، پشتی شەرێ ئازادیا عیراقێ ل سالا 2013ێ و نەمانا بەعسیان، ھەر بەعسیەكێ ھەی و ھەر پلەدارەكێ ھەی ژ پلداریا وی ھاتنە دووركرن و پرانیا وان ژی عەرەبێن سننە بوون، ل دەمەكی ئەوان عیراق برێڤەدبر، پشتێ شەرێ ئازادیا عیراقێ ھاتنە فەسلكرن و ب ناڤێ (ریشەكێشكرنا بەعسیان) رێ ب وان نەھاتەدان، چ كارەكێ فەرمی وەرگبرن و ئەڤە فاكتەرێ ئێكێ ئەو ژی عەقلێ مودەبەر. فاكتەرێ دووێ ژی زەمینە سازی بوو، ل عیراقێ د دەمەكیدا عەرەبێن سننە ھەمی تشت بوون و وان كورد و شیعە ب ھاولاتیێن دەرەجە دو د ھژمارتن و دەما وان خوە دیتی د عیراقا ھەمی تشت دبن دەستێ وان را دەرباز دبوو، دەڤەرێن وان ھاتنە پێشتگوھخستن و دەستھەلات كەفتە دەستێ شیعەیان كوردان ژی ھەرێما خوە دامەزراند بوو، لڤێرە زەمینەسازی بۆ دەركەفتنا ھەر رێكخستییەكا ب شێوێ داعشێ یا راخستی بوو و فاكتەرێ سیێ ھۆڤاتی یان وەحشیەت، دا كو ئەڤ رێكخستنا ب ناڤێ داعشێ سەربگریت، ل سەردوو تەوەران كاركرن، ئێك ئایین، كو خەلك ب سادەیا خوە و دیسان ھۆڤاتی، وەك كوشتنا ب كۆم، سوتنا ب ساخی، د بنای دا ھاڤێتن و ئەڤە ژبلی (ئێزدی) پاریەكێ ب ساناھی بوو وەك پاداشت بۆ ڤێ رێكخراوا تیرۆری ب دەستكەفت دزانین، مال و حالێ وان ھاتنە تالانكرن و كچ و ژنێن وان ھاتنە سەبیكرن.
مەترسی دكیرێ دایە؟
ئەڤ مەترسیا ئەز ژێ بەحسدكەم و كانێ دێ چ جورەكێ داعشێ پەیدا بیت، ب سەرێ خوە، ژبەركو دەڤەرێ تێرا خوە كێشە ھەنە و ھەر لایەنەكی ئەجندایێن خوە ھەنە و دگەل روودانێ ئەو دێ ل خالێن مە یێن لاواز ڤەكۆلن. ئەگەر ڤێ پرسیارێ بكەین، ژ روویێ ئایینی ڤە مە چەند ھزرێن ئایینی یێن توند ھەنە و ئەگەر رێ ب وان بھێتەدان، ئەو دێ شیرازێ كومەلگەھی ھەمیێ گوھورن یان بەرەڤ گوھورینێ ڤە بەن؟ ئەگەر ژ روویێ سیاسی ڤە بەرێخوە بدەینێ، كێشەیێن مە یێن ئابووری د بەردەوامن و نەبوونا دەرفەتێن كاری و رێژا ھەژاریێ؟ ئەڤە ھەمی فاكتەرن و د شیاندایە ئەڤێن ھەنێ بھێنە ئیستیغلالكرن.
ـــــــــــــــ
ــ رۆژناما كوردستانی نوێ ھژمار 9714 6/8/2026
ليست هناك تعليقات:
إرسال تعليق