عبدالرحمن بامەرنی
دیاری بۆ ھەولێریان
ـ ئەڤە چەند رۆژە ئەم لڤی چۆلی بنەجھ كرین، نە ئەم دزانین دێ چكەین و نە ئەم تشتەكی ژ چارەنڤیسێ خوە دزانین؟
ئەڤە گوتنێن زەلامەكێ ژیێ خوە ژ حەفتێ سالییێ دەرباز كرین و دو پێنگاڤان نەشێت ل سەر ئێك بھاڤێژیت، ھەر زوی دبیتە حلكە حلكا وی و خوە بەر ددەتە عەردی.
ـ نەدیتنا وان، ژ برس و چارەنڤیسێ نەدیارێ ئەم تێدا سەد جاركی خۆشترە!
ئەڤە گوتنێن دایكا كچەكا د دەھكێن خوە یێن دووێ دابوو و ئەو كچ یا گۆھشی و سەرێ وێ دناڤ كۆشا دەیكا وێ دا بوو.
ـ ئەم دێ لڤی چولێ خودێ چكەین و زەلامێن مە ب چ سەر دا چوون و كی دێ شیری بۆ ڤان تفالان پەیدا كەت؟
ئەڤە گوتنێن ژنەكێ بوون، تفالەكێ ل بەر سینگا وێ بوو و زارۆكەكی ژی خوە ب دەھمەنێن وێڤە كربوو نۆژ.
ئەڤ چیرۆكا دناڤ دەستێن مندا، رێك بەحسا سالا 1988ێ یە و جھـ (بەحركێ)یە و ئەڤ كەسێن لڤی چۆلی ژی بنەجھكرین، ئەنفالكریێن كوردن. چیرۆك ڤەگێرانا دیمەنێن ئەنفالایە و ئەز دڤێ چیرۆكێدا زارۆكەكێ ھەرزەكارم و ھەر ژ دەمێ خۆ رادەستكرنا مە، بابێ من دانە بەر قونتاغێن تڤەنگا و پالەك پێرانان و ھاڤێتنە ناڤ چەند زەلامێن دی و (زیل)ەك ل بەر راوەستاندن. چاڤێن وی ركۆرك ل مە بوون و دەھان پرسیارێن بێ بەرسڤ و شۆفێرێ زیلێ پێ خوە ل پانزینێ نا و شلقەك ب وان زەلامێن وەكی زلكێن شخارتێ راحەشاندینە پشتا زیلێ كەفت. ھەمی ب سەرئێكدا چوون و ئەو دووماھی جار بوو، مە بابێ خوە تێدا دیتی.
ئەو چەند رۆژ بوو ڤەحەویان ب كەسێ نە كەفتی و ھوسا من تێ د ئینا دەر، كەس چ تشتێ دروست نزانیت. ئەڤ جھێ ئەم لێ، دبێژنێ گوندێ زێوا شێخ پیرامیس و ناڤۆدەنگیا شێخی ل پێشیا ناڤێ وی دچوو و ھندی قۆپا ل سەر مەرقەدێ وی ئاڤا، خەلكێ بێ رێ، یێ بێھنفرەھـ بوو و پشتا خوە ب شێخی گەرمدكرن، ئەو دێ ھەمیان پارێزیت. ئەڤێن زارۆكێن وان كێم و زگۆرد و دەوار ھەین، چاڤەكێ وان ل ناڤ گوندی و پیرۆزی و مەزناھییا شێخی بوون و چاڤێ دی ل رۆژئاڤایێ گوندی و دەرینكێ پەحناڤێ و سەرێ بانكا بوو، ژ وێرێ بۆ ناڤ بەرواریا و بۆ سەر سنووری و توركیا تو ل كیڤەیی.
ئەڤا ئەز دبێژم، خێزانا مە ژ بێ رێیان بوو و ژبلی دەیك و بابێن من، دوو برا، ئێك یێ ب شیر و ئێك ب قوونخشكا و پێنج خیشك و یا ژ ھەمیان بچیكتر چەند ھەیڤی و ئێك ژ ئێكێ مەزنتر و ئەز نەخریێ دەیكوبابێن خوە بووم و ھێشتا زركور بووم و چەند رۆژەك دەرباز د بوو، دەنگوو زێدەتر بلاڤدبوون و كەسێ نەدزانی دێ چارەنڤیسێ كێ ژ یێ كێ باشتر بیت. چەند رۆژەك دەرباز د بوو، ھژمارا خەلكێ دناڤ گوندی دا خوە د پاراستن ل كێمیێ ددا و دووماھی جار، دەنگێ تۆپان چ دەلیڤە ل بەر مە نەھێلان و بەرێ مەدا وان بەتەنا و بابێ من ل رێكەكێ دگەریا، گیانێ مە تێدا یێ پاراستی بیت. ھەمی ئالیێن مە چیانە و دەستێن خوە ئێخستنە بن تەحێلا خوە و ھەر كەسێ ئەو دڤی حالیدا دیتبایە، دا دلێ وی پێ سۆژیت و كێ ب ھەلگریت و كێ ل پشتا خوە بكەت و دەستێ كێ بگریت!!
نە بتنێ ئەم، چەند خێزانێن دی یێن بێ رێ و پشتا خوە ب مەرقەدێ شێخی گەرمكرین، وەك مە ب عەردی ڤە مابوون و چارەنڤیسێ كەسێ ژمە ژ یێ دی باشتر نەبوو و مە ھەمیان ژ بێ چارەیێ بریارا خوە رادەستكرنێ دا و مە ھیڤیەك ھەبوو، تا ئەم ژ گوندی دەرئێخستین ژی، مە دگوت تشتێ ژ ھەمیێ خرابتر بھێتە سەرێ مە، دێ نەفیكرنا مە بیت ل ناڤەراست و باشوورێ عیراقێ، تا گوتین مەرقەدێ شێخی ژی یێ ھاتیە (TNT) كرن و ئێدی ھیڤیێن مە ژی ب ئاڤێ دا چوون و نە شێخی شییا بەرگریێ ژمە بكەت و نە شێخی شیا بەرگریێ ژخوە بكەت.
دەولەت سەرێ ھەولێریان، ئەگەر ئەو لڤان پیر و ژن و زارۆكان نەببانە خودان، دا ھێشتا پرسیارێن زەلامێ حەفتێ سالی ھلاویستی و بێ بەرسڤ مینن، دا خوزیێن دایكا كچا د دەھكێن خوە یێن دووێ دا ب بەری كەڤن و ب دەھان تفال، ژ بێ شیری و ژ برسا مرن، دەھان زارۆكێن خوە ب لنگێن دەیكێن خوەڤە كرینە نۆژ، دا بنە چیرۆك و دگەل چیرۆكا بابێ من د پشتا (زیلا عەسكەری)دا و چاوان وی ركۆرك ل مە دنێری، دا ھێشتا چیرۆكێن سەر ئەزمان بن.
ـــــــــــــــــــــــــــــ
د گوڤارا نووسەری كورد ھژمارا 14ێ یا تەمموزا 2026ێ دا بلاڤبوویە
ليست هناك تعليقات:
إرسال تعليق