خواندنەكا رەخنەیی ل سەر پەرتووكا من (رۆمان ل دەڤەرا بەھدینان)، سوپاس بۆ ھەڤالێ نڤیسەر (نیشان بامەرنی).
نیشان بامەرنی
پەرتووكا ب ناڤێ «ڕۆمان ل دەڤەرا بەهدینان» خواندن و شرۆڤەکرنێن ڕەخنەیێ، یا نڤیسکار و ڕۆژنامەڤان ـ عبدالرحمن بامەرنی - یا کو٣٥ رۆمانێن دەڤەرا بەهدینان ب خوە ڤە گرتی و ئێخستینە ژێر خوەندن و شرۆڤەکرنێن ڕەخنەیی، من ژی ب فەر زانی کورتیەکێ ل سەر بوهایێ ڤێ پرتوەکێ بدەمە ناساندن بۆ خەلکێ مە یێ هێژا و ب تایبەت رۆماننڤیسان.
ب ڕاستی ژی پێدڤییا مە گەلەک ب ڤان جۆرەیێن نڤیسینێ هەیە. هەر ئەڤە یە ژی یا دهێلت کو نڤیساندنا ڕۆمانێ، ب تایبەت ل دەڤەرا بەهدینان ئاستەکێ بالابەرزتر ب خوە ڤە ببینت. وەسان یا دییارە نڤیسکاری کەدەکا مەزن یا دایە نڤیساندنا ڤێ پەرتووكێ ژ بۆ وان کەسێن ڕۆمانێ دنڤیسن یان ژی حەزا نڤیساندنا رۆمانێ هەبت و خوە پێشدە ببت و زێدەترد ڤی وارێ نڤیسینێ دا مەلەڤان ببت و ل سەر وان شەنگستەیێن رۆمان ل سەر ئاڤا دبت ڕاوەستیت و داهێنانێ تێدا بکەت.
هەلبەت ئەڤ رۆمانێن د ڤێ پەرتووكێ دا هاتینە دەستنیشانکرن، هەر یەک ژ وان ب ئاوایەکێ جودا یا هاتینە نڤیساندن. نڤیسکاری ژ سەرەدەری یا ل گۆر هەر یەک ژ وان ڕۆمانان کری و یەک و یەک داینە بەر خواندن و شرۆڤەکرنێن ڕەخنەیێ. د ڤان شرۆڤەکرن و ڕەخنەیان دا هەری زێدە نڤیسکار یێ ل سەر: شەنگستە، ئاڤاکرن، بابەتێ رۆمانێ، باگراوەندێ نڤیسکاری، زمانێ رۆمانێ، جوگرافییا رۆمانێ، رویدان و بوویەرێن ڕۆمانێ، تەکنیک و شێواز و ڤەگێڕانا رۆماێ، کەسایەتی یان ژی کارەکتەرێن رۆمانێ، وێنە و تابلویێن د رۆمانێ دا، پەیاما رۆمانێ، یاریکرن ب پەیڤان، کودێن رۆمانێ، ، پەرەگرافێن د رۆمانێ دا، تەوزیڤکرن د رۆمانێ دا و نڤیسەرێن ڤان رۆمانان ڤییایە مە کیڤە ببەن، حەتا بەحسێ سێکس و خەبەر و جڤینان د رۆمانێ دا کریە و هەروەسان خوەندنا وی ب خوە بۆ رۆمانێ و چاوانییا ئەنجامێن رۆمانێ شرۆڤە و ڕەخنە کرینە. هەلبەت ژ بلی ڤان هەمیان ژی نڤیسەری ب ئاوایەکی بەرچاڤ؛ بیر و بۆچوون ودیتن و تێبینیێن خوە ل گۆر هەر یەک ژ وان رۆمانێن د پەرتووكێ دا، یێن ئیناینە زمان.
من وەکی خوەندەڤانەکی کو ئەڤ پەرتووكە یا خوەندی و رۆمانەکا من ژی جهێ خوە یێ تێدا کری و سودەکێ مەزن یێ ژ خوەندنا ڤێ پەرتووكێ وەرگرتی. لەوما ژی ب دیتنا من پێدڤی یە هەر کەسەکێ رۆمانێ دنڤیسیت یانژی حەزا نڤیساندنێ هەبیت، بلا ڤێ پەرتووكێ بخوینت، بێگونا دێ سودەک و ئاڤاکرنەکا باش ل سەر نڤیساندنا رۆمانێ ب دست خوە ڤە ئینیت. یا کو بالا من کێشای کو ئەز ب کورتی ژی بت ل سەر ڤێ پەرتووكێ بنڤیسم، تەنێ ئەوە، پدڤییا مە ب نڤیسێن هوسان هەیە، ئانکۆ شرۆڤەکرن و ڕەخنەیێن ئاڤاکەر وەک نڤیس زێدە ببن، دا کو نڤیسا رۆمانا کوردی بەرەف ئاستەکێ دن ڤە ببەین و جهێ خوە د جیهانگیرییا رۆمانێ دا بکەت.
ل دوماهییێ ئەز دەستخوەشیەکا مەزن ل نڤیسکارێ ڤێ پەرتووكێ دکەم. لێ نە وەک ڕەخە، بەلکو ب دیتنا من شرۆڤەکرنەکا ڕخنەیی بۆ ٣٥ ڕۆمانان کارەکێ مەزنە. خوەزی نڤیسکارێ هێژا دەمەکێ زێدەتر دابا خوە و بەرفرهەتر ل سەر ڤان ڕۆمانان ڕاوەستییا با، دا کو مە زێدەتر مفا ژ ڤان شرۆڤەیێن ڕەخنەی وەرگرتبانا. ژ بەر کو، وەکە من ئاماژە پێ دای، پێدڤییا مە گەلەک ب ڤان کارێن ڕەخنەیی هەیە.
ـــــــــــــــ
ـــــ رۆژناما ئهڤرۆ ھژمار 4013- 2026/ 08/07
ليست هناك تعليقات:
إرسال تعليق