عبدالرحمن بامەرنی
رەنگە پتری هەر یاریەكا وەرزشی و هەر چالاكیەكا چ ئەدەبی بیت یان هونەری بیت، حەژێكەرێن یاریا تەپا پێی زێدەترین بن و تایبەت دەما گەر دگەهیتە یاریێن موندیالێ و ئەڤ حەژێكەرێن هەنێ ژ هەمی تەمەنانە، رەگەزێن جودا و تەخێن جڤاكی و هەمی وەلاتێن جیهانێ ب خوەڤە دگریت. تا وی راددەی ل باژێرێن مە ژی دەما دبیتە دەمێ یاریێ، لڤینەكا نە ئاسایی دكەڤیتە ناڤ بازاری و تایبەت نوكە تەلەفوونێن زیرەك یێن دەركەفتین، ئەگەر چ جه نەهاتنە دیتن ژی، دێ بینی كەسەك یان دوو كەسان پێكڤە سەرێ خوە یێ نزیكی ئێك كری و یێ ل یاریێ دنێرن. ژخوە یێ ل موندیالیێ بنێریت و حەژێكەرێ یاریێ بیت و دیڤچوونا یاریا و تیمێن جیهانی كربیت، چ یاریكەر دگەل چ تیمە و چ تیم دێ كەڤیتە بەرامبەری چ تیم و پێشبینیێن وی یێن پێشوەخت بۆ ئەڤ تیمێن دەرباز دبن؟ دێ هزر كەی گەلەك كەس دگەل تەپانێ ئالۆدە دبن و خوە ژ هەمی كارەكێ دوور دگرن، بتنێ دەمێ خوە ددەنە یاریێ و تا ڤێرە رەنگە تشتەكێ ئاسایی بیت و پەیوەندیا دناڤبەرا مرۆڤی و یاریێ دا پەیوەندیەكا وەرزشی بیت. لێ ئەگەر ئەم ل یاریان بنێرین و تایبەت ئەڤ دیمەنێن كۆرت یێن دناڤ سوشیالێ دا بلاڤ دبن تەماشە بكەین، چ ئەڤێن گول دهێنە كرنێ، هێرش و بەرگری و تا دووماهیێ، دگەلدا ژی ئەڤ سەر پێچیێن دهێنە كرنێ، یاریزانەك بەرپێكان ددەتە یاریزانەكێ دی و ئێك یێ دی رادهاڤێژیت و یان دێ ئێك ئێكی ژ فانێلێ وی ڤە كێشیت و مەبەست ژ هەمیان، پەكەفتن بكەڤیتە یاریێ ب مەبەستا گول ل سەر لایەنەكی نەهێتە كرنێ و ئەڤ هەمی مژوولاهیا هەنێ و بازار دبیتە موندیال، سوشیال و تی ڤی دبنە موندیال و سوحبەت و دانوستاندن هەمی دبنە ئەو، ئێك پەیام دگەهینیتە مە، ئەو ژی هەڤركیەك ل سەر كی دێ سەركەفتی ژ یاریێ دەركەڤیت و پێنەڤێت تشتێ ئەز پالدایمە ڤێ نڤیسینێ و ڤێ هەڤركیێ و یاریێن تەپا پێی، ئەڤ سەركەفتنێن هەنێ نە، لێ سەركەفتنەك ل بەر چاڤێن دادوەران كو شاشی ب ملیمان دەرباز نابیت، دادوەرێ بدویڤ تەپێ و یاریكەران ڤە و چەندین كامیرە كو دیمەنی ژ هەمی كۆژەیكێ دگرن د خزمەتا دادوەریدا بۆ ئێكلاكرنا بریارێ و ژبلی دادوەرێن ل ئالیێ یاریگەهێ ئەڤێن ب هاریكارێن راستەخو یێن دادوەری رادبن و خوە ئەگەر یاری ب دووماهی ژی هات، رەنگە ئەڤ دادوەرێن هەنێ ب یاریكەر ڤە و ب راهێنەرێن تیمان ڤە چەند جاركی ل یاریێ هەمی بنێرن ڤە و بزانن ل كیرێ هنگافتن هەبووینە و ل كیرێ دەلیڤە هاتینە ژ دەستدان و ل كیرێ كێماسی د یاریكەراندا هەبوویە و ئەدائا یاریێن وان، ئەڤێن هەنێ هەمی ژ پێخەمەت چوونا دناڤ هەڤركیەكێدا، كو پێش وەخت كار بۆ هاتبیتەكرنێ و یاریكەر بۆ ڤانە هەمیان هاتبیە بەرهەڤكرن ژ پێخەمەت سەركەفتنێ و هەر گاڤا ئەم دڤێ هەڤركیێ گەهشتین و مە شیا پلانێن خوە ل سەر دا برێژین، باوەردكەم ل سەر ئاستێ تاكی بیت یان گشتی بیت دێ مە باشترین پێنگاڤێن سەركەفتنێ هەبن و دێ د بەرهەڤ بین بۆ هەر ھەڤركیەكێ ژی.
ــــــــــــــــــــــــــــــــــــــ
ـ رۆژناما كوردستانی نوێ ھژمار (9684) ــــ 2026/6/25
ليست هناك تعليقات:
إرسال تعليق