عبدالرحمن بامەرنی
مەبەستا من ژ زاراڤێ (حوكمرانی)، رێك من بەحسا وێ حوكمرانیێ یە ئەڤا ل هەرێما كوردستانێ دهێتە پەیرەو كرن و مەبەستا من ژ زاراڤێ (خاترخاترانێ)، دەما كەسەك ل سەر خاترا ڤی و وێهەنێ دبیتە تشت، تشت ژی ب مەبەستا جهێ بریارێ و پلەداریێ. نڤیسینا یان ئازراندنا ڤی بابەتی ژی ل سەر بابەتێ پانزینێ بوو و چاوان بهایێ ئێك لیترا پانزینێ خوە ل (1350) هزاران دا و راستی خەلك شۆك بوو، پاشی ب بریارەكا وەزاری گوت نابیت بهایێ پانزینا نورمال ژ (850) هزار دیناران زێدەتر بیت و تا ئەڤ گوتارە جهێ خوە د رۆژنامێ دا دكەت و رۆژنامە دكەڤیتە بەردەستێ خواندەڤایی، رەنگە گوهورین ب سەر ڤی بهایی دا بهێن و چ گران بیت یان ئەرزان بیت، ئەو بابەتێ من نابیت و بتنێ ئەو نموونەیەك بوو.
بوچی خاترخاترانێ؟
هندەك راستیێن هەین دڤێت بهێنە گوتن، ژوان ژ دایكبوونا قەبارێ هەرێما كوردستانێ ژ دایكبوونەكا نە یا سروشتی بوو، دەما سەركردایەتیا كوردی ئەڤا خەبات ل چیایی دكر، پشتی سەرهلدانێ هاتیە ناڤ باژێری و بەرەیێ كوردستانی دروست بووی و كی كوردە و كی ل چیایی بوویە و كێ تڤەنگ هەلگرتییە و كی ئاوارەی ئیرانێ و توركیا بوویە و كی ل ناڤ حكومەتێ بوویە و كی بەعسی و رەفیق بوویە؟ نە بتنێ ئەڤە بۆ هەڤكێشەیەك و لدویڤ وێ ماف و دەستكەفت هاتنە دابەشكرنێ، بەلكو هەڤكێشەیەكا سەقەت ژێ دەركەفت، ب وێ سەقەتییێ هەر تشت هاتە بلاڤكرن و پارڤەكرن، ئەڤێ هەنێ پێشمەرگەیەكێ كەڤنە و قوربانییا دایی، پارچە زەڤیەك دانێ. پێنج كەسان پێشكێشی پرۆژەیەكی كرن و ئێك ژوان ژ مالباتەكێ بوویە و خزمەتا پێشمەرگایەتی یا كری یان كورێ فلانە كەسی یە و خزم و مرۆڤێ ڤی بەرپرسییە، پرۆژە بۆ وی هێلان. ئەڤێ هەنێ نزیكی فلان بەرپرسییە و جهەك بۆ بەردان. كەسەكێ دی واستەیەك یا ژ دەف كەسەكی ئینایی و ناڤێ وی كەسی بەری وی دچیت، ئێكسەر بۆ جێبەجێكرن و ئەڤا ئەز دبێژم هیچ تشتەكێ ڤەشارتی نینە و گوتنەكا كوردی یا هەی دبێژیت (پیر و شیر) ژی ڤێ چەندێ دزانن و ل سەر ڤێ قاونێ، هەمی تشت هاتە بەخشینێ و تاڤێرە ئەگەر تشتەكێ ئاسایی بیت ژی، لێ تشتێ نە ئاسایی ئەوە، كی دێ شێت لێپێچینێ ل ڤان كەسان كەت؟! گەندەلی و ئیستیغلالكرن و ب سەرداگرتن و بریاردانا ب كەیفا خوە، سەختەكاری و خوە ڤەدزین ژ بەرپرساتیێ و هەر تشتێ تە بڤێت زێدە بكەی، ژبەركو شوینا ئەو بریارێ وەربگریت، ئەو بخوە جهێ بریارێ یە و دێ تەحەددایا هەر بریارەكێ كەت.
چاكسازیێن حكومەتێ
هەر كەسەكێ ببیتە پلەدار، دێ حەزكەت شێوازێ رێڤەبرنا وی جوانترین و رێكوپێكترین بیت و ئەڤا ئەز دبێژێم ژ (گزیری تا وەزیری) حەزدكەن ئەو رێڤەبەرێن باش بن، چاكسازیان بكەن، پرۆژان پێشكێش بكەن، گەندەلییێ نەهێلن و لێ نەشێن هیچ تشتەكی ژ ڤانە بكەن و بریارێن وان ل سەر هەمیان ناخون؛ ئەڤە راستییا ڤێ هەرێمێ یە و من بەحسا پارچەكا دیاری كری نینە، ژبەركو كەتوارێ هەرێما كوردستانێ تێدا دەرباز بووی و تا جهێ خوە گرتی، بڤی رەنگی بوویە و ئەڤ (خاترخاترانا) ئەز ژێ دبێژم هند رهێن خوە یێن دناڤ دامودەزگەهان و جهان دا برینە خار، ئێدی هلكێشانا وێ ژی یا ب ساناهی نابیت و لێ تشتەك ژی ی مەحال نینە و ئەگەر مە بڤێت ل هەرێما كوردستانێ و حوكمرانیا مە یا دروست و یاسایی بیت، دڤێت ئەم ل سەر دوو خالان راوەستین، ئێك: خاترخاترانێ نەمینیت و یا دووێ، یاسا جهێ خوە بگریت و چ تشتەك ژێ مەزنتر نەبیت.
جارەكا دی بابەتێ پانزینێ
هەر چەندە ئەو نموونا پانزینێ و بهایێ وێ وەك نموونە بوو من ئینایی، لێ دا هندەكێ ل سەر راوەستین ئەوا خزمەتا ڤێ گوتارێ دكەت، گرانبوونا ژ نشكەكێڤە یا بهایێ لیترا پانزینێ تشتەكێ شۆك بوو؟ چ دیڤچوون بۆ نەهاتەكرنێ. حكومەتێ بریاردا بهایێ لیترێ ژ (850) دیناران دەرباز نەبیت و ڤێ بریارێ بتنێ ئێك رۆژ بەردەوامی كر و وەك تەحەددایەك بۆ بریارەكا فەرمی یا حكومەتێ، پانزینا نورمال ل پانزینخانا نەما، من گوت نەما!! لڤێرە دەهان پرسیار دروست دبن، ئەڤێن ڤان پانزینخانان برێڤەدبەن ژ حكومەتێ و بریارێن وێ مەزنترن؟
چ بهێتەكرنێ
دڤێت حكومەتێ و كارگێریا پارێزگەهان بریارێن خوە هەبن و ئەو بریارێن هەنێ ل سەرووی هەمی تشتەكی بن، یێ پێگیری پێنەكر، لێپێچین دگەلدا بهێتەكرنێ. دیڤچوون بۆ هەر تشتەكی هەبیت، نە ئەڤێ دیڤچوونێ دكەت بهێتە بەرتیلكرن و دڤێت سزایەكێ توند هەبیت د حالەتەكێ هوسادا. خالا گرنگ دڤێت هەمی بزاڤ بهێنەكرنێ (خاترخاترانێ) نەمینیت و ئەڤە ئێكەم تشت ژ كەسێن ئێكێ و كورێن كەسێن ئێكێ و بریاردەستێن حزبان بگریت.
ـــــــــــــ
رۆژناما كوردستانی نوێ، ھژمار 9706 یا رۆژا 2026/7/27
ــــــــــــــــــــــــــــ
ليست هناك تعليقات:
إرسال تعليق