عبدالرحمن بامەرنی
دنیا ھەر ئەڤ دنیایەیە یا ئەم تێدا دژین و ئاخرەت ژی ھەر ئەو ئاخرەتە یا پشتی مرنێ دھێت و ژلایێ (مەلا)ڤە دھێتە بەحسكرن، بوچی من گوت مەلا؟ ژبەركو ڤێ چیرۆكا خوە ھەیە و رەنگە بۆ بەری سەد سالان زێدەتر بزڤریت، دگوت (ل گوندەكی مەلایەكی ھەر بەحسا دنیایێ و ئاخرەتێ دكر و گوندییەكی گوت: دنیا ئەڤەیە یا ئەم تێدا، مەبەستا وی، گوندێ وی بوو و دڤێت بچم (ئاخرەت)ێ ژی ببینم و ژ گوندێ خوە زێدەتر نە دیتبوو. رۆژەكێ كارێ خوە كر و خاترا خوە ژ گوندیان ھەمیان خاست و چوو ھەتا ل گوندەكێ دی دەركەفتی و ئەو گوند ژ گوندێن وان مەزنتر بوو و ئێكسەر ل سەر پییێ خوە زڤری و گوت؛ ئەڤە من دنیا ھەمی دیت).
مەبەستا من ب ئینانا ڤێ ڤەگێرانێ، ئەم چاوان ل دنیایێ بگەرین؟ گەریان چاڤێ مرۆڤی ل گەلەك تشتان ڤەدكەت و ئەو گەریانا ئەز ژێ بەحسدكەم، گەریانەكا راستەراست بیت، بینینا دەریایێ، بیابانێ، دارستانێن مەزن و ئەگەر پرسیارێ ژمن بكەی، دێ بێژم كوچكێن پادشاھێن یابانێ و چینێ و دێ بێژم ئەھرامێن مسرێ و ھێشتا گەلەكن ئەڤێن من دڤێت ب چاڤێن خوە ببینم، لێ یا راستی بیت ئەز بەحسا ڤێ بتنێ ناكەم، بۆ نموونە، من گەلەك فلمێن مسری یێن دیتین و ھەكو ل كولانێ ژن ب دەنگێ بلند د ئاخڤیت و ژیانا وان یا جڤاكی، ل وەلاتێ چینێ و خارنگەھێن وان یێن مللی و ئەو خوارنێن ئەو دخوون، ل وەلاتێ كورییا و جوداھیا بنەمالێ، كو جڤاك ھەمی ل سەر بنەمالێ دھێتە ناسكرن و ل ھندێ، من دڤێت ھندیا ژ نزیك بینم، ڤێ قەدەرا مرۆڤان و ھەژاریا وان، ئەو چاوان دشێن ب ژین و من دڤێت وەلاتێ رووسیا ببینم، ئەو رۆمانێن من خواندین و من وێنەیەك ل سەر جڤاكێ وێرێ و رەوشت و تیتالێن وان د سەرێ خوەدا وێنەكرین و ئەگەر دگەل خواندەڤایێ خوە یێ راستگۆ بم و چەند ئەڤ ھزرە خوە ل سەرێ من ددەن، ئەز زێدەتر ب بەرێخوەدانا فلمان و خواندنا پەرتووكان ڤە دھێمە گرێدان.
ـ
رۆژناما ئەڤرو ھژمار 4037 12/8/2026
ليست هناك تعليقات:
إرسال تعليق