خورشید ئەحمەد سورچی
ئەز قوتابیێ زانکۆیا دهۆکێ بووم، مە بابەتەک هەبوو لژێر ناڤونیشانێ (پەیوەندیێن ناڤدەولەتی) کو دکتۆر عمران عمر بۆ مە پێ دهات، دکتۆری گەلەک بەرێ مە ددا هندێ کو بابەتێن سیاسی بنڤیسین و ل ڕۆژنامە و گۆڤاران پارڤە بکەین. شانازیە بۆ من کو وەک ئێکەم قوتابیێ زانکۆیا دهۆک ل پشکا پەیوەندیێن ناڤدەولەتی من بابەت ل گۆڤار و ڕۆژنامەیان پارڤەکرن، ئەز دەرگەهەک بوم بۆ قوتابیێن دی کو هندەکا ب ڕێکا من شیان ببنە نڤیسەر و من بابەتێن وان بۆ گۆڤار و ڕۆژنامەیان دهنارتن. من گەلەک حەژ نڤیسنێ دکر بەری بچمە زانکۆیێ ژی من گەلەک جاران هۆزان دنڤیسین لێ من چ جاران بابەتێن سیاسی نەنڤیسی بوون. پشکا زانستێن سیاسی بوو دەرگەهەک بۆ من بۆ چوونا دناڤ جیهانا نڤیسینێ، یا سەیر ئەو بوو من بابەت دنڤیسین لێ من نەدزانی دێ چەوا بەلاڤ کەم، ل فەیسبۆکێ من ئەکاونتەک لایک کربوو کو گۆڤارەکا ئەلکترۆنی بوو ب ناڤێ (ڕوانگە و ڕەخنە ) من نەدزانی کی سەرنڤیسەرە، جارەکێ من پسیار ژ جامێرەکی کر ئەرێ کی سەرنڤیسەرێ ئەڤێ گوڤارێ یە؟ گووتە من ئەز بێژم (عبدالرحمن بامەڕنی) یە، من گووتێ تو دناسی گوت ناوەللە بەس هەکە تە دڤێت دێ ئەکاونتێ وی یێ فەیسبۆکێ پەیداکەم. ئەکاونت بۆ من فرێکر و من ژی داخازیا هەڤالینیێ بۆ فڕێکر جامێری هەڤالینیا من وەرگرت، گەلەک کەیفا من هات، چونکی من دزانی دێ هەڤکاریا من کەت و دێ من بەتە ناڤ جیهانا نڤیسینێ، من بابەتەک بۆ هنارت لژێر ناڤونیشانێ ( بۆچی ئێراق یا سەقامگیر نیە) دەما بابەت ڤەخاندی گەلەک پەسنا بابەتی کر و گووتە من تە گەلەک جوان بابەت یێ داڕێژتی و دێ نۆکە بەلاڤکەم، دەما بابەت بەلاڤکری من وەک شانازیەکا مەزن دیت بۆ خۆ کو بۆ ئێکەم جارە بابەتێت من کەفتنە دناڤ گۆڤاران دا، پشتی چەند هەیڤ و سالەکان ژ پێکگۆهڕینا نامەیان و هنارتنا بابەتان بۆ وی، شەڤەکێ ئەز و دوو هەڤال ل خوارنگەهەکا دهۆکێ بوین ئێکسەر چاڤێت من ب سەیدایێ عبدالرحمن بامەڕنی کەفت یێ لسەر مێزەکێ دگەل سەیدایێ سەعید عقراوی یێ خارنێ دخۆن بۆ من هەستەکێ خۆش بو کو بۆ ئێکەم جارە ئەز وی کەسی ببینم کو گەلەک هەڤکاریا من کر هەتا بشێم پێنڤیسی ب دورستی بکاربینم د ڤەهاندنا بابەتان دا. ئەز وێ شاهدیێ ددەم کو (ڕوانگە و ڕەخنە) وەک حوجرەیەکا ئەکادیمی بوو بۆ پێگەهاندنا کادیرێن زیرەک د بوارێ ڤەهاندنا بابەتان دا. هێدی هێدی من گرنگی بخۆ ددا هەتا وەلێهاتی پەیوەندیێن من باش بوون دگەل پتریا نڤیسەرێن دەڤەرێ، سەیدایێ شێرزاد نایف ژی ئێک ژ پشتەڤانێن هەرە مەزن بوو بۆ من کو ئەز گرنگیێ بخۆ بدەم، بابەتێن سیاسی دا بۆ فڕێکەم ڕەنگە ژلایێ خالبەندی و ڕێنڤیسێ هندەک شاشی هەبانە لێ دا بێژیتە من (سەیدایێ خۆرشید دێ بڤان نزیکان ل ڕۆژناما ئەڤرۆ هێتە خوار) لەوڕا من دڤێت بێژم هەتا هەتا ئەز سۆپاسدارێ وانم کو هەڤکاربوون دگەل من دا خۆ پێ بگەهینم .
ليست هناك تعليقات:
إرسال تعليق