عبدالرحمن بامەرنی
دیموکراسیەتا دڤێ نڤیسینێ دا من مەبەست پێ، رێك من بەحسا هەلبژاردنانە و ئایا برێڤەچوونا هەلبژاردنان لدەف مە ل هەرێما كوردستانێ، پرۆسەیەكا دیموکراسییە بۆ پێشڤەبرنێ یان ژی بتنێ (قیناع)ەكە و مە پاشڤەتر دبەت؟
بەری بەرسڤا ڤێ پرسیارێ بدەم ژی، یا ئەم ژ پرۆسا هەلبژاردنان تێدگەھین، خەلك ب ئازادانە و دووربینانە بەرەڤ سندوقێن دەنگدانێ دچیت و ل سەر ھندەك پیڤەران دەنگێ خوە د ھاڤێژیتە د سندوقا دەنگدانێدا، ب مەبەستا گوھورینا ھێزێ و گوھورینا بیرۆكەیا چاوانییا برێڤەبرنێ و رەنگە دناڤ ئێك لایەندا، چەندین بەربژێر هەبن و ل سەر ھندەك بنەمایان، ئەو دێ دەنگێ خوە ب ئێكی ژ وان دەت.
رەنگە ژی دناڤ چەندین لایەناندا، ئەو دێ لایەنەكی دەستنیشان كەت و ژ لیستا ناڤێن وی لایەنی دێ دەنگێ خوە ب كەسەكێ تایبەت دەت و تا ڤێرە ئەڤ تێگەهە ل پرانیا وەلاتان هەیە و یا دروست ژی، ئەڤ شێوەییێ دروستێ ھزركرنێ یە و دەما تاكەكی بڤێت بەرەڤ سندوقێن دەنگدانێ بچیت و ئەو ژی ببیتە بەشەك ژ بریارا سیاسی، كو زێدەتر من مەبەست ب هەلبژاردنێن پەرلەمانی و جڤاتا پارێزگەھانە ژ هەلبژاردنێن سەندیكا و رێكخراو و كۆمەلان، لڤێرە ئەو تاك دێ بیتە بەشەك ژڤێ پرۆسەیێ، ب مەبەستا ھندەك دەستكەفتێن باشتر، ئەو دەستكەفتێن هەنێ چ ل سەر ئاستێ گشتی بن یان تاك و ئەڤا ل هەرێما كوردستانێ دھێتەدیتن، بەرۆڤاژیا ڤێ هەمیێ یە، چ ل سەر ئاستێ دیموکراسیەتا هەلبژاردنان، كو تێگەھشتنا مە بۆ پرۆسەیا هەلبژاردنان، تێگەھشتنەكا شاشە و چ ژی ل سەر ئاستێ شووركرنا ڤێ دیموکراسیەتێ دناڤ خەلكیدا، خەلك نەشیایە دڤێ دیموکراسیەتێ بگەھیت و ل جھێ دەنگێ وی پێشڤەبرنێ دروست بكەت، بێی ئەو هەستبكەت یێ شەرعیەتێ ب پاشڤەبرنێ ددەت.
ئەڤا ئەز دبێژم كەنگی ئەڤ پرۆسەیە ل هەرێما كوردستانێ، دا یا سەرگرتی بیت؟ ئەگەر مە بتنێ حزبێن سیاسی هەبان و ڤان حزبان هەڤركی ل سەر پێگەھێ خوە و بەرنامێ خوە هەبایە، لێ یا جوداتر، مە دوو ھێز هەنە و مە دوو زوون هەنە و سەنگا ڤان هەردوو ھێزان ژ دوو دەڤەرێن جودانە و ئەڤە درێژەپێدانا بەری سەرھلدانێ یە و كار ژبۆ نەھاتیەكرن، كو ئەڤ زوونە ببنە ئێك، بەلكو شەرێن ناڤخوە و دوو ئیدارەیێ بابەت زەقتر لێكریە و نوكە ئەم ل بەرامبەری تشتەكێ مەزنترین ژ دەرەنجامێ هەلبژاردنان و بێژین پێگەیێ هەر حزبەكێ دێ لدویڤ دەنگدەرێ وێ و ئەنجامێن پرۆسا هەلبژاردنان بیت، ژبەركو دڤێت مە ئەو قەناعەتە هەبیت، ل هەرێما كوردستانێ و مە بڤێت و نەڤێت، مە حزب و لایەنێن سیاسی هەنە و دگەل ڤێ ژی مە زوونێن جودا هەنە و ئەڤ زوونێن هەنێ ژی دبن هەیمەنەتا حزبێن جودادایە و هەر هەڤركیەك و دابەشكرنا دەستهەلاتێ ل هەرێمێ، دڤێت ئەڤ هەردوو پیڤەرە (ھێز و زوون) پێكڤە بكەڤنە دناڤ هەڤكێشەیێ دا.
ــــــــــــــــــــــــــــــــ
ـــ رۆژناما كوردستانی نوێ ژمارە 9692 - 2026/7/7
ليست هناك تعليقات:
إرسال تعليق