عبدالرحمن بامەرنی
تشتێ بۆ من خۆش، دەما ئەز بۆ گوشا بیناھی ل رۆژناما ئەڤرۆ دنڤیسم ئەوە، ئەز ددانم ئەڤە دووماهی نڤیسینە دكەڤیتە بەر چاڤێ خواندەڤایی، ئەڤێن حەزا خواندنێ هەین و ئەڤێن رۆژنامێ دگرن و لاپەران د قولپینن و دووماهی لاپەر و دووماهی بابەت ژ رۆژنامێ دێ ئەڤ گوشە بیت. ئەز دگەل خوە دبێژم، دڤێت ئەڤ گوشە ب هەمی رامانا خوە، گوشەیەكا ئەدەبی بیت و یا ڤالا بیت ژ جوامێریێ (تەوازعێ). ئەگەر هێشتا روهنتر بێژم، چاوان ئەز بۆ هەڤالەكێ خوە یێ نزیك بەحسا بیرهاتنێن خوە دكەم، بەحسا ڤەگێرانێن خوە، بەحسا گەریانێن خوە و سەربورێن خوە دكەم، ئها هۆسا، خواندەڤایێن ڤان نڤیسینان ژی ببنە ئەو هەڤال، بۆ من گرنگ نینە ئەز وان ناس بكەم و ئەم پێكڤە روینینە خارێ، ئەو مەزن بن یان بچویك و ل چ ئاست بن. گرنگ بۆ من ئەڤ تشتێ ئەز دنڤیسم، هندەكێن دی بەشداریێ دگەل مندا بكەن و ببنە بەشەك ژ بیرهاتنێن من.
كەنگی ژی مرۆڤ ڤان هزران دكەت، تایبەت دەما بیرهاتنێن مرۆڤی و ئەو تشتێن دگەل مرۆڤی ژیایین و مەزن بووین ببنە گەلەك و ئەڤێن دگەل مرۆڤی دمینن، ل كێمیێ ددەن. چ هەڤالێن مرۆڤی ئەو بن یێن قەستا دەرڤەی وەلاتی كرین، وەغەركرین و چ ژی ئەڤێن گرنگیدان و مژوولاهیێن وان ئەو ژ مرۆڤی دویر ئخێستین. ئێدی مرۆڤ هەست بتنێ بوونێ دكەت، خوە ئەگەر ملێ كەسەكی ب ملێ مرۆڤی ژی ڤە بیت و مرۆڤ پیاسێ ل ناڤ جاددە و كولانێن دهۆكێ بكەت، هەمی تشتەك دێ بۆ مرۆڤی د نوی بن، ژبەركو ئاڤاهی هاتینە گوهورین، لێ بیرهاتنێن ل جهێ وان ئاڤاهیان وەك خوە ماینە، جاددە هاتینە بەرفرەهكرن، جاددەیێن نوی ڤەبووینە، سیك و قەیسەریێن نوی ڤەبووینە و لێ ئەو بیرهاتن هەر ل جهێ خوە ماینە و كی دێ گوهداریا ڤان بیرهاتنان كەت، ددەمەكیدا ئەو بیرهاتنێن هەنێ لدەف تە گەلەك دگرنگن و روودانێن نوی و یێن سەرنج راكێش تێدا هەنە، لێ كەس بهایێ عانەكی ژی پێنادەت.
ليست هناك تعليقات:
إرسال تعليق