عبدالرحمن بامەرنی
قەدەغەكرنا ماچان د كومەلگەهەكێ وەكی یێ مەدا، موسلمان، عەشاییری، داخستی، نە تشتەكێ نوی و ڤەشارتییە و هەمی كەس ژی رێزێ لێدگرن و هەمی دزانن ماچ یا قەدەغەكرییە. ماچكرنا ئەز ژێ بەحسدكەم ژی، ماچكرنا دناڤبەرا كور و كچان، ژن و مێران و دناڤبەرا هەردوو رەگەزاندا و زێدەتر دناڤبەرا دوو خوشتڤیاندا.
هەر چەندە تشتێ ئەز راكێشایمە ڤێ نڤیسینێ، نە ئەو جورێ ماچێیە یێ من بۆ ئیشارەت دایی، بەلكو وێنەیەك بوو، ئەگەر یێ شاش نەبم، ل سەر (فیس بوكی) ب بەرچاڤێن من كەفتبوو، وێنێ زاروكەكی بۆ ل سەر (مەلكێ) ل بەر وی هاتبوو نڤیسین ماچ قەدەغەنە. (مەلك: كراسەكێ بەرسینگی یە و ب ستویێ زاروكیڤە دكەن ددەمێ خوارنێدا). براستی نڤیسینەكا گەلەك، سەرنج راكێش بوو، چنكو تشتێ ژ هەمیێ زێدەتر زارۆكی لبەر مرۆڤی شرین دكەت و دەما مرۆڤ دهەلگریت، مرۆڤ حەز دكەت ماچ بكەت. ئەڤ ماچكرنا هەنێ ژی زێدەترین وەفاداری و نیشانا خوشتڤیاتیێ یە دناڤبەرا دوو مرۆڤاندا، ئەڤە ژی هەر ژ پەیدابوونا مرۆڤایەتیێ سەرهلدایە هەر ژ خولقاندنا ئادەمێ باب و دەیكا حەوا، كا چاوان خودێ حەوا دەیك ژ ناڤ پراسیێن ئادەمی دروستكریە و ژ هینگێ وەرە، مروڤ هەست دكەن كو وی بەشەكێ دی یێ هەی، ب هەمبێزكرنێ و خو دئێك وەركرنێ، مرۆڤ ئارام دبیت.
ماچ ژی كوكا ڤێ هەمبێزكرنێ یە، كو دوو مرۆڤان دگەهینتە ئێك، هەر ژ ماچێن خەریبیێ، دایبابان بۆ زاروكی، ماچێن دلوڤانیێ و ماچێن سەرێ زاڤایی و ماچێن ژنان كو سلاڤێن وانن و چەندین جورێن دی هەنە، كو ئەگەر ژێ بەحس بكەین، رەنگە ئەڤ نڤیسینە ژی وەك علكی گەلەك بهێتە ڤەچین و هینگی بێ تام بیت.
پسیارا من ژی ڤیایی دڤی بابەتیدا ب ئازرینم، هوین بێژن، دەمەك بهێت و شوینا ئەم ماچێ بگونەهـ و دژی (عرف و عەدەتان) و ئاینی بزانین، ئەم ماچێ ب دلوڤانی و خوشتڤی و ئارامكرنا هەستێن ئێك دوو تر، نەزانین؟ ئەم ماچێ نەكەینە لێبورین و پێكڤە ژیان و تەقەبوولكرن! ئەز بخو نەشێم ڤێ پسیارێ بكەم! ژبەركو من چ بەرسڤێن نێزیك نینن!!
ـــــــــــــــــــــــــ
درۆژناما ئەڤرو ژمارە 3164 رۆژا 22/6/2022ێدا بلاڤبوویو.
ليست هناك تعليقات:
إرسال تعليق