عبدالرحمن بامەرنی
ساخكرنا بیرەوەریەكا وەك سالڤەگەرا رۆژنامەڤانیا كوردی، ساخكرنەڤەیەك نینە بتنێ ئەم چەند شەمالكان رێز بكەین و د رێورەسمەكیدا پفكەینێ و هەو. نەخێر، پێدڤییە هەر چنەبیت ئەم هەلسەنگاندنێ بۆ بكەین، دڤێت ئەم ڤێ پرسیارێ ژخوە بكەین، ئەڤرۆ ئەم ژ رۆژنامەڤانیا كوردی ل كیڤەینە و هەر هەرێما كوردستانێ بتنێ وەك نموونە وەربگرین و بابەتێ خوە ل سەر بنڤیسین.ئەو رۆژنامەڤانیا مە هەیی، ئایا ئەم دشێین بێژینێ رۆژنامەڤانیا كوردی، كو رۆژنامەڤانیەك بیت دەربرینێ ژ هەمی پێكهاتە و بیرۆرایێن جودا بكەت؟ نەخێر، دبیت یا دروستتر ئەم بێژینێ رۆژنامەڤانیا حزبی دێ یا گونجایتر بیت، ژبەركو ئەگەر چاڤدێریەكا دروست بۆ بكەین، ئەو رۆژنامەڤانیا هەنێ ملكەچی حزبان بوویە و ئەگەر مە نیمچەیەكا رۆژنامەڤانیا ئازاد هەبیتن ژی، نەشیاییە دەربرینێ ژ هەمی تەخ و چینەكێ بكەت. لێ بنێرە، ل هەمی جیهانێ وەسانە، رۆژنامەڤانی ب دەستهەلاتا چارێ دهێتەناسكرنێ، چاڤدێریكرنا دەستهەلاتێ یە و ئاراستەكرنا راییا گشتییە و دابینكرن و بەردەستكرنا پێزانینێن دروستە، لێ رۆژنامەڤانیێ ئەڤ دەستهەلاتا خوە جێبەجێنەكریە و رۆژنامەڤانیا مە هاتیە دابەشكرنێ و نەشیاییە ببیتە جهێ باوەریا خەلكی و نەشیایە ببیتە دەستهەلاتا چارێ و بەرەللایەك دروست بوویە. د ئەڤرویا مەدا و پێشكەفتنا جیهان گەهشتیێ و سەردەمێ سوشیال میدیایێ، جورەكێ دیێ رۆژنامەڤانیێ هاتیە هەبوونێ، هەمی كەس ب رەنگەكی و دوویان كرینە رۆژنامەڤان یان هەر چنەبیت ئەو ژی رۆلێ خوە د بلاڤكرنا هەوالاندا دگێرن، چ رۆل؟ هەر كەسەك دجهێ خوەدا بوویە رۆژنامەڤان، دیڤچوونان دكەت، زانیاریان بلاڤدكەت، شرۆڤەكرنا ددەت و ژ ڤەرێژا وێ هەوالێن نەدروست و یێن چەواشە و ژ نەبوونا رۆژنامەڤانیەك سەربەخۆ و نەبوونا ژێدەرەكێ باوەرپێكری، رۆژنامەڤانیا حزبی دروست دبیت، رۆژنامەڤانیا سیبەر دروست دبیت و رۆژنامەڤانیا سوشیالێ دروست دبیت و ئەڤ رۆژنامەڤانیا هەنێ ل سەر وەرگری و سوزداریا وەرگری كاردكەن و خەلك باوەر ژێدكەن، كومێنت و لایك بۆ دچن و ژ ئەنجامێ ڤێ دووركەفتنێ، هەر چ ناڤزراندەك هەیی، دهێتەكرن، ناڤزراندن ب سەرۆكان، ناڤزراندن ب كەسایەتیان و ب سومبۆلان و ب ئێك دوو تەخوینكرنێ و ئەڤە هەمی ژ بۆ چ؟ بتنێ دا راستی بهێتە ڤەشارتن یان بهێتە نخافتن و روویەكێ دی پێ بهێتەدان و ئەڤە رۆژانە و ب بەرنامە یا دهێتە كرنێ و ئێدی هاولاتی نزانیت چ دروستە و چ نەدروست، ئەگەر بانگهلدێران یان بلیلڤانان گوت ئەڤە دروستە، هەمی دێ بۆ دەستان قوتن و ئەگەر گوت ئەڤە نە دروستە، دێ هەر چ تشتێ كرێت بینی، ئاخفتنێن نەجوان، دێ هزركەی دیوارێ فەیسبوكێ بۆ جڤین و گوتنێن كرێت یێ هاتیە دروستكرن و پرسیار لڤێرە ئەڤەیە، ئایا رۆلێ رۆژنامەڤانان و رۆلێ رەوشەنبیران ل كیڤەیە؟ پێدڤییە ئەم ب چاڤەكێ سەردەمیانە ل رەوشا رۆژنامەڤانیا كوردی بنێرین و رەخنە بكەین و ئەڤرو نە بتنێ رۆنامەڤانیا كوردی لڤێ پارچێ د كێشێدایە، بەلكو مخابن ئەم د چەرخێ بیست و ئێكدانە و هێشتا ل هندەك پارەچەیان زمان و رەوشەنبیریا كوردی یا ئازا نەبیت.
ـرۆژناما كوردستانێ نوێ ھژمار 9641 یا رۆژا 2026/4/21
ليست هناك تعليقات:
إرسال تعليق