عبدالرحمن بامەرنی
دیاری بۆ نڤیسەر (محەمەد چەلكی)
ئەڤ سالە باران درەنگ كەفتن! ئەز دێ ڤێ رستێ راستڤەكەم، بێژە دێ لێكزڤرینم. ل دەستپێكا ھاتنا زڤستانێ، باران پاشكەفتن و سر ژی گیرۆ بوو، دبیت ھوسان باشتر بیت. ھندەكان گوت: "بڤی رەنگی دەرباز بیت، ئێدی تشتەك ب ناڤێ زڤستانێ و سروسەرمایێ نامینیت". دێ بێژی عەسمانی ئەڤ گوتنە نە عەجباند و بارانان دەستپێكر، بەفرێ دەستپێكر، سروسەرما دگەل ھاتن و ئەز نوكە یێ ڤێ چیرۆكێ دنڤیسم و ل ئالیێ دییێ پەنجەرێ، باران ب لێزمە یا دباریت. ئەم یێ د ھەیڤا ئادارێ دا. لدویڤ سالوەختێن مەھێ بیت، ئەڤرو رۆژا دووێ یە ژ بھارێ.
مێزا من یا ل بەر سینگا من و لابتوپێ من یێ ل سەر، من دڤێت چیرۆكەكێ بنڤیسم، لێ چ بابەت د ھزرا مندا نەبوون. دوھی 14ێ ھەیڤێ بوو، ئەو رۆژ بوو یا دھۆكیان سەرھلدان كری. ئەڤە خۆش بابەتە، ئەز ل سەر سەرھلدانێ بنڤیسم. وێ رۆژێ ئەم ل چالاكیەكێ بووین و بابەت چوو سەر چەتان، لێ پەیڤا چەتە ل ھندەكان خۆش نەھات، ل من ژی خۆش نەھات، ل ئەڤێن ل ھۆلێ روونشتین ل ھەمیان خۆش نەھات. من گوت خۆش بابەتە، مەبەستا من بڤێ گوتنێ ئەز چیرۆكا خوە ل سەر ھەیڤا ئادارێ ئاڤا بكەم و ڤێ ھەیڤێ چەندین ھەلكەفت و بیرەوەری یێن تێدا، لێ بتنێ سەرھلدانا باژێرێ دھۆكێ دێ بابەتێ چیرۆكا من بیت. مانێ من گوتبوو، دێ ل سەر چەتان نڤیسم.
من تبلێن خوە كێشانە سەر كیبوردی و ئەز ل پیتا (چ) گەریام. چ، یانكو چەتە و تە دڤێت بێژیێ جاش تو ب كەیفا خوی. بیرۆكە یا جوان بوو و جاش یان كو نە پاكی. ھەروەكو دەھان گوتیە من ئەڤە خۆش بابەتە، ل سەر نە پاكیێ بنڤیسە و تایبەت ژی ل سەر چەتان.
من ل خوە ڤەگەراند و دێ چ تشتێ نوی ژێ نڤیسم؟
ھەمی دزانن یێ ناڤێ چەتەیێ ل سەر بیت، ناڤێ جاشاتیێ یێ ل سەر و یێ ناڤێ جاشاتیێ ل سەر بیت، ناڤێ نە پاكیێ یێ بدویڤە.
رژدیا من ل سەر نڤیسینا چیرۆكێ و دەنگێ بارانێ ل پشت پەنجەرێ، ژبلی چەتاتییێ چ تشتێ دی نەھاتە سەر ھزرا من بكەمە چیرۆك. من گوت:
دێ ل سەر ئەگەران نڤیسم، بۆچی چەتە ھەبوون؟
شەرێ ھشت سالیێ عیراقێ و ئیرانێ، نە مە كوردان تێ و نە مە ژێ. ھەلبژادەیێن گەنجێن كوردان، ئەڤێن ناڤێن وان بۆ عەسكەریێ دھاتن یان بەرۆكێن شەری و (عەبادان و دیزفۆل و موحەمەرە و ئۆم قەسر) بوون، ئەنجام ھەچیێ چوو ژ كیستێ خوە چوو. چەتاتی و جاشاتی و جەحشك و ئەنجام، نێزیكی خێزانا خوە. ھارب و دویركەفتن ژ مالا خوە و ئەنجام، پاریەكێ نانی لڤێ مالێ و پاریەكێ نانی ل مالا دی. پێشمەرگایەتی و ئەنجام، دەست نەداھێلان، پاراستنا رۆمەتێ.
من گوت دێ ل سەر جاشان نڤیسم، ئەز دێ ھوسان ناڤێ وان ئینم، ئەرێ ما وە ھزر نەدكر دێ وە ب جاش ناڤ بەن؟ وە ھزر نەدكر ھین یێ نە پاكیێ ل نەتەوا خوە دكەن و ل ئاخا خوە دكەن و ھین یێ نە پاكیێ ل ئەڤێن بەرگریێ ژ نامیس و كەرامەتا وە دكەن؟
دبیت پرسیارا من یا رەق بیت یان من پێش وانڤە ئەڤ ھزرە كربایە، دێ ئایندێ خێزانێن وان، كچ و خیشك و دایكێن وان چ بیت؟!
دەرگەھـ ل سەر من ھاتە ڤەكرن. ئەڤ ئۆدا ئەز تێڤە، بتنێ ئەز و پەرتووكێن من و ئەڤ مێزا لابتوب ل سەر و ل بەر سینگا من. ئەز ئێكسەر ل گژێنا دەرگەھی زڤریم و كەیفا من ھات، ئەز بشێم داخوازا ئێكی بكەم قەھوەكێ بۆ من چێكەت، چا بیت، ھەر چ بیت، لێ نەڤیێ من یێ بچیك بوو و دزانم ئەگەر ب ژوور كەفت، یاری دڤێن و دڤێت خوە ئێك لابكەم یان چیرۆك یان نەڤیێ من و یاری. ھەلبژاردنەكا ب زەحمەتە، لێ باش بوو، دەرگەھـ ددویف خوە را پێڤەدا و ئێدی من ژی ھزرا ڤەخوارنا قەھوەكێ یان چایێ ژ مێشكێ خوە ئینا دەر.
نە پاكیا چ؟ جاشاتیا چ؟ پا تە دڤیا تابیتا وی ل سەر سیپایەكێ ترۆمبێلەكێ بیت یان تە دڤێت نامیسا خوە دناڤ دەستێن ئەمنێ دا بھێلیت یان تە دڤێت ھارب كەت و نانخوارنا وی یا پشیكێ بیت و ژڤێ مالێ بۆ مالا دی و چاڤێن وی ل دەستێن خەلكی بیت؟
نانا ئەز دێ خو ژڤی بابەتی دەمە پاش، نە ئەز كەسێ ب قارەمان دزانم و نە ئەز كەسێ ب نەپاك دزانم. دھی بیرەوەریا 35 سالیێ یا سەرھلدانێ بوو و یا ئەز باش دزانم، ئەڤێن سەرھلدان كرین، خەلكێ ڤی باژێری بوون. پرانیا وان ئەڤێن چەك ددەستاندا چەتە بوون و ئەگەر چەكێ وان نەبایە، كەسێ خوە ل بەر درندایەتیا بەعسیان نەدگرت.
تەدڤێت چ بێژی؟ ھەر بێھنەكێ من ئەڤ پرسیارە ژخوە دكر. پا ئەگەر ئەو قارەمانێن دوھی بن. پا ئەڤێن بووینە پێشمەرگە، كفنێ خوە د سەرێ خوە د ئالاند و ل بەر سروسەرمایێن زڤستانێ، ترسێ و برسێ و ب سایا سەرێ وان، تڤەنگا وان، دوژمنی ھزرەك بۆ مە دكر، پا ئەو چنە و ئەم دێ چ ناڤ ل وان دانین؟
دگەل گژێنا دەرگەھی یا ڤێجارێ، نەڤیێ من خوە كێشا ناڤ ئۆدێ و ب نك من ڤەھات و من كێشا بەرسینگێ خوە و گوتە من: "تویێ ب شۆلی؟". ئەڤە قاونا وی یێ ھەرجارە و ب زوری ئەڤە یا بۆ خوە گرتی. من گوتێ ئەرێ، گوت: نە، تو نە یێ ب شولی و خوە كێشا بەر سینگا من. تشتێ ئەز شیایم ل چیرۆكا خوە زێدە بكەم، من ئەڤە نڤیسا، "نە ھەمی چەتە د باش بوون و نە ھەمی چەتە د خراب بوون".
ـــــــــــــــــــــــــــــ
رۆژناما ئەڤرۆ ھژمار (3957) رۆژا 2026/4/12
ليست هناك تعليقات:
إرسال تعليق