عبدالرحمن بامەڕنی
دروستبوونا قەیرانان، دگەل دروستبوونا ناكوكیێن سیاسی و پەیدابوونا كارەساتان پەیدا دبن، چ ئەو ناكوكی و كارەساتێن هەنێ سروشتی بن وەكی بیڤەلەرزان، لەهیان، چ ژی دەركەفتنا پەتایان، وەكی پەتایێ كورۆنایێ یێ بەری چەند سالان و چ ژی ناكوكی ژ ئەنجامێ ل هەڤنەهانێ و كێشیێن دناڤبەرا لایەنێن سیاسیدا سەرهلدابن و ئەڤ قەیرانێن هەنێ كارتێكرنەكا راستەخو ل سەر چەمكێ ژیانێ یێ هاولاتیان دكەن، كو بابەتێ من ب هاولاتی و قەیرانان ڤە گرێدایە.
ئەڤرو ئەم د رەوشەكێدا دەرباز بین، رەنگە كارڤەدانێن وێ ل سەر چەندین وەلاتێن دی هەیە، ئەو ژی شەرێ دناڤبەرا ئیرانێ و ئەمریكا ئسرائیلێ دا، چاوان مە دیت دگەل دەستپێكرنا ڤی شەری، كێشەییا كارەبێ سەرهلدا و د هەیڤا رەمەزانێدا كو خەلكی پێدڤی ب ژێدەرێن رۆناهیێ هەبوو، لێ ئەو ژێدەرێن هەنێ ل بەر دەستی نەمان و ژ كاركەفتن. قەیرانا غازا ناڤ مالان ژی یا سەرهلددەت و قەیرانا گرانبوونا پانزینا ترۆمبێلان یا دبیتە بابەت و ئەگەر ئەڤ شەرە بەردەوامیێ بكێشیت، رەنگە چەندین قەیرانێن دی دەركەڤن و لڤێرە پرسیار ئەڤەیە، ئایا مامەلەكرنا مە دگەل ڤان جورە قەیرانان، دەست داهێلان بیت و بهێلین هەر تشت وەكی خوە دەرباز بیت؟ كو ب مخابنیڤە ئەڤ چەندا هەنێ گەلەك جاران یان ل هندەك سكتەران رووددەت و بازرگانێن قەیرانان دەردكەڤن و بۆ خوە ڤان قەیرانا ب دەرفەت دزانن و قەبارەیێ قەیرانێ بەرفرەهـتر لێ دكەن، بەرفرەهكرنەك هەم هاولاتی و هەم جهێن پەیوەندیدار ژی نەچار ببن، ملكەچی وێ مەزناهیێ ببن و ئەڤ نموونا قەیرانان ژی ئەم دشێین بۆ گەلەك بابەتێن دی وەربگرین، چ بابەتێن بچویك بن و د هەر چ سكتەرێن ژیانێدا بیت.
دڤێت چ بهێتەكرنێ؟ نها ئەڤە ئەو پرسیارە یا من دڤێت ب ئازرینم، هینگێ رۆلێ رێڤەبرنا سەركەفتی و نە سەركەفتی پەیدا دبیت، چ ئەڤ رێڤەبرنە حكومەت بیت، دگەل دروستبوونا قەیرانێن مەزن. چ ئەڤ رێڤەبرنە ل سەر ئاستێ حكومەتێن ناڤخوویی و پارێزگەهان بیت.
چ ژی ئەڤ رێڤەبرنە دناڤ خێزانێ بخوە دا بیت، دەما قەیرانەك دناڤ خێزانێ دا دروست بیت كو من دڤێت (قەیرانێن خێزانێ) بكەمە نموونەیەكا بچویكا راستەوخو بۆ كارگێریا پارێزگەهێ و بۆ حكومەتێ بخوە ژی، كانێ ئەڤ خێزانا بچویك دەما نەخۆشیەكا ژ نشكەكێڤە خوە د ئێك ژ تاكێن خێزانێ د ئالینیت، روودانەك بیت، ژن ئینانەك بیت، ئاڤاكرنا خانی بیت، هشكە سالی بیت، رەنگڤەدانا قەیرانێن دەرەكی ل سەر خێزانێ، وەك نەبوون، دەستنەكەفتن یان بەردەست نەبوونا ئێك ژ پێدڤیاتیان، هینگێ ئێكەم پێرابوونێن ڤێ خێزانێ دێ خوە گونجاندن بیت دگەل بارۆدوخ و پێشهاتێن نوی. دەما كارەب چوو، ئەو دێ ل پێگوهورێ وێ گەریت، رەنگە (لایێتەكا شەحن)ێ بیت، رەنگە فانۆسەك بیت و ئەگەر روودانەك بیت و بەرتەنگی دناڤ خێزانێدا دروست بیت، خێزان دەستگرتنێ دهەمی تشتاندا دكەت، كێمكرنا مەزاختیێ رۆژانە ب هەمی روویێن خوەڤە و ئەگەر ئەڤێ نموونێ بەرۆڤاژی كەینە سەر رێڤەبرنا كارگێریا پارێزگەهێ و ژڤان قەیرانێن گازێ و یێن پانزینێ و كارەبێ! ئایا، بەرسینگرتنێن پێدڤی هاتینە كرن، رەنگە هەبن و پێنگاڤ ژی هاتبنە هاڤێتن، لێ خوە ئەگەر رێژەكا كێم ژی بیت، دڤێت پێرابوونێن توند بهێنە وەرگرتن و نابیت ب هیچ رەنگەكی بازرگان و ئەڤێن هاولاتی و جومگێن ژیانا هاولاتی (ئیستیغلال) دكەن، ل سەر كریارێن خوە بەردەوام بن، ژبەركو دگەل ڤەكێشا ناكوكیێن دەڤەرێ، رەنگە هێشتا قەیران پەیدا ببن و پێدڤییە بەرهەڤیێن بلەز ژی بۆ هەبن، بەری بازرگان وێ قەیرانا نوی سەرهلددەت ژ قەبارەیێ وێ مەزنتر لێبكەت.
ـــــــــــــــــــــــــــــــــ
رۆژتانا كوردستانێ نوێ ھژمار (9623) - 2026/3/17.
ليست هناك تعليقات:
إرسال تعليق