عەبدولڕەحمان بامەڕنی
دەما من ئەڤ گوتارە دنڤیسی، چەند تشتەكان ئەز مژویلدكرم، ئێك ژوان ئەڤە چەند رۆژە ئەز ل هیڤیا خودانێ غازێ و هەر دبێژیتە من سوبەهی. دوو، مال بەرێ من دابوو گومركێن هشك و (زەیتێ) بكرم، ب رێكێڤە هەر بانزینخانا د گەهشتمێ، لیترا بانزینێ ژ (900 بۆ 950) دیناران بوو و ل گەهشتنێ دەما من پرسیار ژ حەجیێ هەڤالێ خوە یێ دكاندار كری، بوچی ئەڤ زەیتە هوسا گران بوویە؟ گوت: «دهی یێن چاڤدێریێ هاتبوون ل سەر دكانێن مە دگەریان ژبەر گرانكرنا بەهایان، مە گوتێ راستە دولار یێ گران بووی و مە دولارەك یێ هاڤێتیە سەر كارتوونێ، لێ گرانكرنا دروست ئەوە یا كومپانی دكەن و وان (چار) دولار یێن زێدەكرین». سێ و یا ژ هەمیێ دلئێشتر، كو بەری نوكە ژی من بابەتەك ل سەر نڤیسی بوو، بابەتێ كارەبا 24 سەعەتییە و دەما من ل موبایلێ نێری، بۆ كێمتر ژ هەیڤەكێ (301) هزار دینار یێن هاتین و سەرەرایی ئەو ل سەر راوەستیانا ئەم ل سەر كارەبێ دكەین!.
دا بزڤرمە سەر بابەتێ خوە و كۆچا ملیونی و كانێ مە ژ كیرێ خەلەت كریە. بەری (35) سالان بوو و سەرهلدان هاتەكرنێ و حكومەت ساقت بوو و جهێن خوە بەردان. ب چەند رۆژان، حكومەت ب سەر خوەڤە هات و خەلك بەرەڤ سنووران رەڤین، كو ب ملیونان دهاتنە مەزندەكرن، یێن بۆ ئیرانێ چووین و ل ئالیێ مە (چەلێ و دەشتانێ) دوو جهێن ب ناڤ و دەنگ بوون و ئەڤا ئەز دبێژم وەكی ڤان رۆژان بەری 35 سالان بوو و ئەنجام چ ژێ دەركەفت؟ كو فەرە ئەم ڤێ پرسیارێ ژ خوە بكەین، دا بزانین (خەلەتی) ل كیرێ دەستپێكرن.
ئەڤێن ل خەباتا چیایی، ل ناڤ شورەشێ، كو ئەز دێ ب عەقلیەتا چیایی ناڤ كەم، بوونە هەمی تشت و باژێر ب رێڤەبرن، دگەل رێزێن من بۆ ماندیبوون و زەحمەتا وان، لێ دڤیابا هەمی (ئیمتیازەك) پێهاتبایەدان و وان باژێر برێڤەنەبربان. (رەوشەنبیر، نڤیسەر، رۆژنامەڤان و هونەرمەند) ب بەهانا سەرهلدان یا نازكە، حكومەت یا نازكە، هەر چنەبیت ئەم یێ ب كوردی د ئاخڤین و كەس نابێژیتە مە (تەعال و ئمشی)، كەسێ رەخنە نەگرتن و كەسێ نە گوت ئەڤان هین دكەن یا خەلەتە. ئەنجام، ئەز بەحسا، ملكێ گشتی ناكەم كو بۆ فەرهوودە. ئەز بەحسا شەرێ ناڤخۆیی ناكەم، كو ژ ئەنجامێ وێ دو زوون، ئیدارە و دو حكومەت ژێ دروست بوون. ئەز بەحسا ئێكنەگرتنێ و ئێكدوو تەخوینكرنێ، ناكەم كو ژ ئەنجامێ وێ ئەڤە زێدەترە ژ سالەكێ و نە مە حكومەت و نەمە پەرلەمان هەی. لێ تشتێ سەرێ من ژ ناڤ چ نە ئینتە دەر، ئەڤ كومپانیەنە و كەس نەشێت بێژیتێ پێلاڤا وە ژی یا خارە، كو ژ ئەنجامێ وان، خەلكێ دهۆكێ ژ دەهێ نەهـ ژێ قەردارێن پارێ كارەبێ و ئاڤێ و كامیرێن چاڤدێریێ نە و ئەڤە ژ بلی ئەڤ كومپانیێن دی، ئەڤێن یاریێن خوە ب بەریكێن خەلكی دكەن و هاولاتی د ڤەرەچكینن!.
ــــــــــــــــــــــــــــــــــــــــــــــــ
ـ رۆژناما كوردستانی نوێ ھژمار (9628) یا رۆژا 2026/4/2
ليست هناك تعليقات:
إرسال تعليق