وەرگێران: عبدالرحمن بامەرنی
(ئوگو) دزیكەرە و بتنێ ل دووماھیا ھەمی حەفتیان، دزیان دكەت. شەڤا شەمبیەكێ چوو د مالەكێڤە و (ئانا)یا دژیێ خوە یێ سیھـ سالیێدا و ھەر شەڤ دمینتە ھشیار، ب تاوانا ویڤە گرت. پشتی گەفێن دەمانجێ لێ كرین، زێروزینەتێ خوە رادەستی وی كرن، ھیڤی ژێ خواستن خوە نزیكی (باولی) كچا وێ یا سێ سالی نەكەت. (ئوگو)ی ھزرێن خوەكرن: "ئەز بۆچی زوی دەربكەڤم، ددەمەكیدا بارودوخ لڤێرە باشە؟".
ئەو دشێت بێھنڤەدانا حەفتیێ ھەمیێ لڤێرە ب سەر ببەت و خۆشیێ ژ ھەر تشتی وەربگریت، ژبەركو ھەڤژین چوو ئێڤارا ئێكشەمبیێ ژ گەشتا خوە ڤەگەریت و ئەو ڤێ چەندێ باش دزانیت، پشتی سیخوری ل سەر وان كری. دزیكەر گەلەك ب ھزركرنێڤە نەما: جلوبەرگێن ھەڤژینی ل بەر خوەكرن و ژ (ئانا)یێ داخوازكر خوارنەكێ بۆ لێنیت و مەی ژ سەردابێ بۆ بینیت و كاسێتەكا موزیكێ د بەر خوارنێ را دانیتە سەر، لدەف وی ژیانا بێ موزیك نابیت.
ھزرا (ئانا)یێ ل سەر كچا وێ باولی بوو، دەما دانەكێ شیڤێ بەرھەڤدكر و ھزرەك بۆ ھات خوە ژ ڤی مرۆڤی رزگار بكەت. لێ نەدشیا گەلەك تشتان بكەت، (ئوگو)ی تێلێن تەلەفۆنێ بریبوون و خانی ژی یێ ڤەدەرە و دەم شەڤ بوو و كەسەك ناھێت. (ئانا)یێ بریاردا، حەبەكا نڤستنێ بكەتە دناڤ كوپێ (ئوگوی)دا. د شیڤخورانێدا بۆ دزیكەرێ ئاشكەرا بوو، كو ئەو ل رۆژێن حەفتیێ زێرەڤانێ ئێك ژ بانكانە و (ئانا) پێشكێشكارا بەرنامەكێ موزیكەكا مللی یە و بێ ڤەقەتیان ھەر شەڤ ئەو گوھداریا وێ دكەت. ئەو ئێك ژ ھەرە داخبارێن وێیە و دەما وان گوھداریا (بینی) دكر و وی سترانا (Cómo fue) دگوت، بەحسا موزیكی و موزیكڤانان كرن. (ئانا) پەشیمان بوو كو ئەو نڤاندی، ددەمەكیدا ئەو ل سەر خوە رەفتارێ دكەت و د نیەتا ویدا نینە ئەو وێ ئازار بدەت یان ھێرشی وێ بكەت. لێ بوری و حەب یا د كوپێ ویدا و دزیكەری ھەمیا ڤەخواری و یێ د گوپیتكا خوشیێدا. دگەل ڤێ چەندێ، شاشیەك یا دروستبووی، كەسێ كوپ ڤەخاری ھەر ئەو بخوە بوو و ھەر زوی كەتە د خەوێدا.
ل رۆژا دیفرا (ئانا) ژ خەو رابوو و جلوبەرگێن وێ ھەمی یێ ل بەر و لحێف یا ب سەردادایە و یا دژوورا خوەڤە. ل ناڤ باخچەی (ئوگو) و (باولی) یێ یاریان دكەن، ئەڤە پشتی تێشت ژی بەھەڤكری. (ئانا) ژڤی دیمەنی حێبەتی ما و ئەو پێكڤە د گونجاینە، دیسان شێوازێ لێنانێ یێ ڤی دزیكەری، گەلەك یێ سەرنجراكێش بوو. (ئانا)یێ ھەست ب خۆشیەكا نە ئاسایی كر. دوان چركاندا، ئێك ژ ھەڤالێن وێ ئەو داخوازی فراڤینێ كر. (ئوگو) دلگران بوو و لێ (ئانا)یێ ھەر زوی ئەڤ داخوازیە رەتكر، ب بەھانا نەساخیێ و ھوسا ھەر سێ مانە د خانیڤە و خۆشی ب بێھنڤەدانا رۆژا ئێك شەمبیێ برن.
(ئوگو)ی فیتك دبەر چاككرنا پەنجەرەیان را ڤەددان و ئەوێ تێلێن تەلەفۆنێ د گەھینتە ئێك، ئەوێن وی شەڤا بەری وێ برین. (ئانا)یێ تێ ئینادەر كو ئەو سەمایا (دانسون) باش دزانیت و ئەو خۆشترین سەما یا وێ بوو و لێ ئەو نەدشیا وێ سەمایێ دگەل چ كەسەكێ بكەت. بۆ پێشنیار كر ئەو پێكڤە ڤێ سەمایێ بكەن و تا بوویە ئێڤار، ئەو دگەل ڤێ سەمایێ مان. (باولی) ژی چاڤدێریا وان دكر و دەست بۆ دقوتان و ل دووماھیێ نڤست. پشتی ھەردوو سەماكەر ماندیبووین، خوە ل سەر ئێك ژ قەنەفەیێن ژوورێ درێژكر. دڤان چركەیاندا وان چ نەبوو بێژنە ئێك، تا ژبیركربوو كو دەمێ ھاتنا ھەڤژینی یە. (ئوگو)ی زێروزینەتێن وێ بۆ زڤراندن، سەرەرای دگوتێ نەزڤرینە و ھندەك شیرەت ژی دانێ تا جارەكا دی دزیكەر نەشێن خوە بكێشنە د خانیێ وێڤە و ب دلگرانی خاترا خوە ژ ڤێ ژنێ و كچا وێ خواست.
(ئانا)یێ بەرێخوە ددایێ و یێ دویر دكەڤیت. بەری ژبەر چاڤێن وێ بەرزە بیت، ب ھەمی دەنگێ خوە گازیكرێ و د زڤرینێدا گوتێ، ھەڤژینێ وێ دێ دوبارە ددوماھیا حەفتیا بھێتدا گەشتێ كەتەڤە و ب دلخۆشی ل شوین پێن خوە زڤریڤە و ب سەما جاددێن تاخی دەرباز دكرن و شەڤێ ژی دەست بخوە ڤەكێشانێ دكر.
ــــــــــــــــــــــ
ـ دزیكەرێ رۆژا شەمبیێ One Day After Saturday"، ناڤێ ئێك ژ كورتەچیرۆكێن (گابرێل ماركیز)ە و شیایە خەلاتێ ئێكەتیا ھونەرمەندێن كولومبی ب دەستڤە بینیت و ئەڤە دبیتە ئێكەم خەلاتێ وی یێ ئەدەبی و ئەڤ چیرۆكە ژ لایێ (تەوفیق بوركی) ھاتیە عەرەبیكرن.
- درۆژناما ئەڤرۆ 3824 یا رۆژا 10/9/2025ێ دا بلاڤبوویە
ليست هناك تعليقات:
إرسال تعليق