عبدالرحمن بامەرنی
چ بۆ كارەكی بیت یان ژڤانەكی یان دەم بورادنەكێ بیت، ئەز قەستا ناڤ سیكێ دكەم و راستییێ بێژم، تشتێ من ب سیكێ ڤە گرێددەت، ئەو بیرھاتنن یێن دگەل مندا مەزن بووین و خوە ئەگەر من چ كار نەبن ژی، لێ چەند رۆژان جارەكێ ئەز پێن خوە ل جاددێن وێ نەرم دكەم و دەما گەھشتیمە سەرێ سیكا ماستی، چاڤێن من ب ھەڤالەكی كەفتن، ئەڤە زێدەترە ژ بیست سالان من نەدیتی و ئەز یێ د ھزركرنێدا ئایا ئەڤە ئەوە یان ئەو نینە؟ من ب ناڤێ وی گازی كرێ و مەبەستا من ھەكە ئەو بیت دێ ل ناڤێ خوە زڤریت و ئەگەر ئەو نەبیت ھەر ئێك ژمە ب رێكا خوە و دگەل ناڤئینانا من، لدوور خوە زڤری و گوت بامەرنی ئەڤە توویی؟! ئەم چووینە دەستێن ئێك، سەروستویێن ئێك و من گوتێ ئەز یێ دوو دل بووم كانێ ئەڤە تووی یان نە؟ گوت: من ب دەنگی تو ناسكری. درێژناكەم گوتە من ل جھەكی روینینەخارێ و من پێشنیارا سیكا قەسابا كەڤن دایێ و چایخانكەكا لێ ھەی و دەستێن مە تێكدا و ئەم لێ روونشتین. پرسیارەك ژمن و پرسیارەك ژوی، من دڤیا تشتەكی ژ ژیانا وی یا دەرڤەی وەلاتی بزانم، گوت: "كەكێ بامەرنی، ئەم مەزنبووین و دگەل مەزنبوونا مە ژی خەونێن مە ھاتنە گوھورین، بیرا تە و پیاسێن مە یێن دھۆكێ و ڤێ سیكێ دھێت، مە چەند خەون ھەبوون و نوكە ئەو خەون نەماینە و ئەگەر تە بڤێت بۆ تە بەحسا وی وەلاتی بكەم یێ ئەز لێ، بۆ تە بەحسا جوانیا وێ بكەم، بۆ تە بەحسا دەریایێ بكەم و ئەو جھێن من دیتین و من قەستكریێ و لێ ژیاییم، ھەتا سوبەھی ب دووماھی ناھێن، لێ تە چ سویند ل سەر من نینن، ئەڤ چایا من دگەل تە ڤەخاری و پیاسێن من یێن ئەڤرو ل سیكا دھۆكێ، ھەمی ل سەرەكی و ب چ رەنگان ناھێنە بەراوردكرن". ھەڤالێ من دزانی وی چ دگوت و ئەز پێدڤی چ سویندخارنێن وی ژی نەبووم و من دەستێ خوە دانا سەر ملێن وی و من گوتێ ئەز باوەردكەم.
ـــــــــــــــــــــــــ
رۆژناما ئەڤرۆ 3836 یا رۆژا 28/9/2025
ليست هناك تعليقات:
إرسال تعليق