عبدالرحمن بامەرنی
مشن بەحسا كامیرێن كوداك كر، ژبەركو من ھەڤالەك یێ ھەی خوە گەلەك ب كامیرا خوە یا كوداك مەزن دكر. ئەڤا ئەز بەحسدكەم سالێن نوتان بوو، مرۆڤەكێ وان كامیرەكا كوداك یا فوتوگرافی ژ دەرڤەی وەلاتی بۆ فرێركربوو و ھندی ناڤێ كامیرێ ل سەر ئەزمانێ وی بوو و ھندی چاڤێ خوە د دایێ و دگەل خوە دگێراند، ھەڤالەكێ مە یێ دی بۆ ترانە گوتێ خۆزی مرۆڤ كامیرا تەبا. ئەڤ ھەڤالێ ئەز ژێ بەحسدكەم، ھەمی سالوخەتێن جوانێن ھەڤالینیێ دگەل دا بوون و دەما ئەز بەحسا وی و كامیرا وی دكەم، بتنێ مەبەستا من بەھایێ وان كامیران بوو ل وی سەردەمی و ھەر چەندە نوكە ھەڤالێ مە نە بەحسێ كامیرا خوە دكەت و نە ل ھەلكەفتان ژی كامیرا خوە دگەل خوە دگێرینیت، لێ ئەز باوەردكەم وی ئەو كامیرە ل جھەكی یا پاراستی، كو ھەر نوی بمینیت، خوە ئەگەر ئێدی وێنان پێنەگریت ژی، لێ بەھایێ وێ لدەف وی ناھێتە خارێ.
بۆچی من بەحسا كامیرێن كوداك كر و د دەمەكیا ئەز دشیام گەلەك تشتێن دی ب كەمە نموونە؟ مەبەستا من گوھۆرین و خوە گونجاندنە، لێ بنێرە دەما كامیرێن كوداك ھەین، كو ناڤێ كومپانیێ (ئیستمان كوداك) بوو و ئەو كومپانیەكا ئەمریكی یا گشتی بوو و ب وێنەكێشانێ یا ب ناڤ و دەنگ بوو، لێ نوكە كەس پەنایێ نابەتە بەر كامیرێن ژ وی رەنگی و كەسەك نینە ئەگەر موبایلەكا زیرەك د دەستیدا نەبیت و دشێت جوانترین وێنە و باشترین كوالیت بۆ خوە ب كێشیت و نە بتنێ ئەو، دشێت ب كامیرا خوە ب ھزاران وێنان عەمبار بكەت و ھەر چەندە مودێلا وێنەیێ كاغەزێ ژی نەمایە، بچی ئەلبۆمەكێ بكری و وێنێن خوە تێدا ب رازینی و ھەر گاڤا تە ڤیا بچی ئەلبۆما خوە دەربینی و وێنان نیشا ھەڤالێن خوە، ناسیارێن خوە بدەی، ژ خوە یا دلئێش ژی ژ وێنەیێن كاغەزی، دەما بەرێخوەددەیێ وێنەیەكێ تە دناڤدا نە و یێ ھاتیە بێی تە یێ ھاتە برن. نوكە ئەو ھەمی نەما، ب كلیكەكێ دشێی ل وێنێن خوە ڤەگەری، ئەڤە ژبلی وێنەیێ كاغەزێ جوان نەھات، بەرێخوەدانا تەیا دروست نەبوو، كەنی ل سەر لێڤێن تەنەبوو و پرچا تەیا شەكری نەبوو و ئەرێ بتنێ وەك پرسیار كو مە گەلەك ل سەر ڤی بابەتی درێژكر، لێ من مەبەست بڤێ درێژكرنێ ھەبوو، چەند تشت مە ھەبوون و دگەل دەمی نەمان؟ دبیت گەلەك، لێ بنێرە، ھەر ل سالێن نوتان و ل دووماھیێن سالێن نوتان بوو، شنی جیھازێن تلستارێ پەیدا ببۆن و ھینگێ دگوتنێ ئەنەلۆك و ل دھۆكێ ھەمیان نەبوو، ھەمیا كرینا وان پێچێنەدبوو و ھندەكان ژی شەرم دكر ل مالێن خوە دانن، ژبەركو ھەر تشت بێ سانسوور پیشانددا. بیرا من دھێت یاریەكا جاما جیھانی یا تەپا پێی بوو، چایخانەك ل رێزا پانوراما ئازادی یا نوكە بوو، كو وی دەمی گەراجێ ریما لێ بوو و ھەر چەندە بەرێخوەدانا یاریێن تەپا پێی بۆ من دگرنگ نینن، لێ ئەڤە سوحبەتا گەنجەكییە، گوت یاری نیزكی دەمژمێر چاری سپێدێ بوو و ھەر ژ سەعەت ھەشتی شەڤێ ئەز چووم ل سەر كورسیەكێ من جھێ خوە كر و تا بوویە دەمێ یاریێ ئەز ژ جھێ خوە نە رابووم، ژ ترسا ئێك بھێتە جھێ من و میزلدانكا من تژی بوو و ھەر ئەز نە رابووم! ئەرێ پرسیار، نوكە ب چەند رێكان ئەم دشێین ل ڤان جورە یاریا بنێرین و بێ خوە ماندی بكەین؟
ژڤان نمووننێن من ئیناین، چ تشتەك وەك خوە نامینیت و ل ڤێ پێشكەفتنا جیھان گەھشتیێ و ڤان گوھۆرینێن بلەز یێن ب سەرمەدا دھێن، چ ل سەر مە پێدڤییە، ئایا ئەم وەك ھەڤالێ من یێ خودانێ كامیرا كوداك دگەل كامیرێن خوە بژین و ئەم خوە ژ رابردوویێ خوە بەرنەدەین یان خوە دگەل ھەر پێشھاتەكێ بگونجینین؟ ئەز باوەردكەم دڤێت ب ھەر چ رێكا ھەبیت، پیەكێ مە دگەل ڤان پێشكەفتنان بیت و ئەگەر سەدا سەد ئەم تشتەكی ژێ نەزانین ژی، ئەم خوە دگەل بكارئینانێن وێ ب گونجینین. ئەگەر مە شیانێن داھێنانێ نەبن، مە شیان نەبن ئەم نوواتیان بكەین ژی، ھەر چنە بیت، ئەم وەك كەسێن نەزان نەبین و ئەڤ نویاتیێن ھەنێ بكەڤنە دخزمەتا مەدا و بزانین ب كار بینین و ئەڤا ئەز دبێژم نە بابەتەكە ب ھەلبژاردنا مەڤە گرێدایە كا ئەم بكەین یان نەكەین، ئەگەر ئەم نەكەین، ئەم دێ د رێ دا مینین.
ـــــــــــــــــــــــ
رۆژناما ئەڤرۆ ھژمار (3827) 15/9/2025
ليست هناك تعليقات:
إرسال تعليق