عبدالرحمن بامەرنی
جوگرافیا دھۆكێ، بۆ چاندنێ گەلەك یا گونجایە و چەندین جورێن فێقی ژێ بەرھەم دھێن. ئەگەر چ رێگری نەبن، نە بتنێ بۆ ھەرێما كوردستانێ، بەلكو بۆ ھەمی باژێرێن دی یێن عیراقێ ژی دێ ھێتە ھاوردەكرن و دێ داھاتەكێ باش بۆ جوتیاری ب دەستڤە ھێت. ژوان ژی بەرھەمێ تری و سێڤێ و سماقێ و ھنارێ و گیزێ و باھیڤێ و ھنگڤینی و چەندین بەرھەمێن دی یێن خومالی و تشتێ جوان ئەڤە چەند سالەكە بوویە نەریتەك فێستیڤال بۆ دھێنە رێكخستن، وەك فێستیڤالا تری و یا سێڤێن بەرواریا و بەرھەمێن خومالی و ئەز نابێژم گێرانا ڤان جورە فێستیڤالان یا باش نینە، لێ تریێ جوتیاری یێ ب بنێ مێوێ ڤە پیچ دبیت، خۆلیكی دبیت و بازارێ وێ نینە! سێڤێن بەرواریا دكەڤنە بنێ دارێ و درزن و بازارێ وێ نینە، ئەڤە ژ بلی ھنارێ و ھژیرێ و باجانا سور و مە كەرتێ چاندنێ یێ پشتگوھـ ھاڤێتی! ئەگەر ل دەمەكی جوتیاری ژبەر ئەگەرێن سیاسی و مەترسیا فرۆكان، نەشیا بیت رەزێ خوە و عاقارێ خوە و بیستانێ خوە شین بكەت و چاڤدێریێ بۆ بكەت، ئەڤرو ئەو مەترسی ژی یا رابووی، دڤێت حكومەت ل جوتیاری و كەرتێ چاندنێ ب خودان دەركەڤیت، بودجەكی بۆ دەستنیشان بكەت و قەرزان بدەتێ، رێكێن گوندان ڤەكەت و بازاری بۆ ڤەكەت، بازاری بۆ دروست بكەت.
یا من دڤێت بێژم، ھەبوونا فێتسڤالەكێ بتنێ بەس نینە و چ تشتەكی ناگوھوریت، لێ پیتەدان ب جوتیاری و باشتركرنا بەرھەمێ وی یێ چاندنێ لدویڤ رێكێن نوی یێن جیھان گەھشتییێ، ڤەكرنا كارگەھێن قودیككرنێ دشێت كەرتێ چاندنێ ل دھۆكێ پێشبێخیت و ئەڤە ژی ھینگێ دێ دروست بیت، دەما ھناردەكرنا (تەماتا قودیككری، جورێن شەربەتێن فێقی ووووو) ژ ناڤ دەستێ بازرگانان بھێتەدەرێ و شوینا وان كارگەھـ بھێنە دروستكرن، شوینا ئەو بازرگان بۆ سەرێ ھەر قودیكەكێ چەند سەنتەكان قازانج بكەت، ھەبوونا كارگەھەكا قوددیككرنێ دێ قازانجێ گەھینتە دھۆكێ ھەمییێ ب جوتیار و ھەمی تەخێن ھاولاتیانڤە، ژبەركو پارە دێ دناڤ دەستێن خەلكیدا زڤریت و سەدان دەرفەتێن كاری ب خوە دێ دروست بن.
ـــــــــــــــــــــــــــــــــــــ
رۆژناما كوردستانی نوێ (لاپەرێ بادینان) ھژمار 9507 یا رۆژا 2025/9/28
ليست هناك تعليقات:
إرسال تعليق