عبدالرحمن بامەرنی
ئەو زكێ دوویێ بوو پێ دو گیان دكەڤیت، پشتی جانا شەش سالی. ھەر چ شێخەك و سەیدەك و مەزارەكێ پیرۆز ل جھەكی ھەبیت، دەیكا جانێ یا چوویە دەف و داخوازا كورەكی یا ژێ كری. حەمدا عەریفی داركا ب كنجر بۆ پێشنیار كربوو و گوتبوویێ دشا من ژی وەكی تە، ھزرەتا وێ كورەك بوو و ب سایا سەرێ ڤێ دارێ، یا بوویە خودانا دوو كورا.
دارا ب كنجر شۆلێ خوە كر و بوو خودانا كورەكی. ھێشتا ل سەر بێژنكێ و د قوماتكێ پێچایی، عیسویێ حەلێ د گوھێ وی دا بانگدا. چەند رۆژەك ما بوون ببیتە سالەك، سەیدێ سنەتچی ب گیزانا خوە سەرێ دیلكێ وی ژێڤەكر. ھێشتا كەسێ وەكی كورێ بەسێ ب شەقلێ سەر قونێ ناڤ نەكری و دا زیكا رابیتە پەپیكا، عەجەلۆكەك بۆ ژ تاھرێ قەرەچ كرین. بابێ وی دڤیا وەكی وی نەكەڤیتە بەر ئاخێ. ھندی دیتی پیەكێ وی یێ دگەل خەپارەكرنا باجان سۆركێ، ئێك یێ ل دروینێ، ئێك یێ ل مزەیتكرنێ، ئێك یێ ل كەلاشتنا دارا و شەڤەك ب سەردا دەرباز نابیت، ئەگەر دبن لحێفێ ڤە نە بیتە حلكە حلكا وی. شەما دەیكا وی، ژ خەمێن بابێ وی و شەرێ وی دگەل ئاخێ و ژ خەما بابێ خوە یێ ژیێ خوە ل دویڤ پێ بزنێ دەربازكری، ژیانەكا دی و كارەكێ دی بۆ كورێ خوە دڤیا و ھەر چ كار بیت، ھەڤژینێ وێ یێ چو جارەكێ بێدلییا وێ نەكری، پێشنیارا باژێری دایێ و شەمێ خەون ب مەلاتییێڤە ددیتن، خەون ب مەنجەلۆكێن ماستیڤە ددیتن و ھەر رۆژێ دۆرا مالەكێ یە، چ سێنیكا سەرتیكێ میھان بیت، چ سەوكەكا تەنیرێ یا گەرم بیت و خوە بەسا ژنا وی ژی ناڤێ خوە یێ ژ وی وەرگرتی و ب بەسا مەلای خەلك ناڤێ وێ دئینیت. چەند خەیالا بەسێ دكەت، نەكە و بخۆ دھێتە سەر ھزرا وێ و خەیالا وێ دچیتە سەر لاوێ وێ یێ ھێشتا بەر كەپێن وی رەش نەبووین و دڤێت ژیانا وی یا شاھانە بیت. بابێ وی ب سەرێ خوەڤە بر و ھزرا مەلاتیێ ژ سەرێ وێ ئینا دەر و ل پشتا كەری سویاركر و ژ وی و ژ وێ و یا ب وێ مای، چەند شەكرۆكەكێن رەنگاورەنگ حەشاندنە د بەریكێدا و ب ناڤ چاڤێن ویڤە ماچی كر و چاڤێن وێ ژ رۆندكان پەنگیان. بابێ وی سەرێ كەری كێشا، گوھێ خوە نەدا كچا خوە یا ئێكانە و زانی تا سەرێ گری دێ ب دویڤ وان را كەتە غار، دێ وەستیت و قەستا دەیكا خوە كەت.
ب پرسیارا گەھشتە تاخێ دەستنیشانكری یێ حەجی ئەحمێ نەخشەیێ باژێری بۆ كێشایی و ل دەرگەھیدا. كەسەكی دەرگەھـ ل سەر ڤەكر و نە كوردیا وی كوردی و نە تشتەكی ژ عەرەبیا وی دبەتە سەر و یا پێ مای، ناڤێ حەجی ئەحمێ بۆ گۆت و جنگلێ كورێ خوە گرت و كرە د ناڤ دەستیدا و گۆتێ: "ئەڤە كورێ من و ئەڤە چاندكەكا مێویژا ژی بۆ ھەوە دیاری، كورێ من ل بەر دەستێ خوە فێری فیتەریێ بكەن و من چو پارە ژی ژ ھەوە نەڤێن، ب تنێ كورێ من فێر ببیت و ب تنێ نان و زك".
حەجی ئەحمێ گوندیێ وی بوو و باژێر دئینا سەرێ لێڤا. دەھان جاران بەحسا فیتەرییا ترۆمبێلان بۆ گوندیان دكر، دگۆتێ ل گوندی زارۆكێن وە فێری چو تشتەكی نابن و ئەگەر وە زارۆكێن خوە بڤێن، فرێكەنە باژێری و بلا بۆ خوە پیشەیەكی فێر ببن و كورێ خوە و ئێكانێ خوە كرە دناڤ دەستێن ڤی كەسێ نەنیاس دا و خوە ناڤێ وی ژی ژێ پرسیار نەكر، كەسەكێ ترارەكێ ئاڤێ ژی بۆ نەئینا و دووماھی جار كورێ خوە كێشا بەر سینگێ خوە و ب ناڤ چاڤێن ویڤە ماچی كر و بەختەكێ باش بۆ خواست. ھێشتا دو پێنگاڤان ژ مالێ دویر نەكەفتی، دەرگەھـ ل سەر ھاتە گرتنێ و چەند جارەكێ ل پشت خوە زڤریبا و جھێ كورێ خوە لێ ھێلایی، خانی بچویكتر دبوون، تاخ بچویكتر دبوو و ل دوماھیێ باژێر ژی ل بەر چاڤان بۆ سپییاتییەك و ئەو سپییاتی ژی نەما و ھینگێ گۆتە كەرێ خوە وشاش، تا گەھشتییە بەر دەرۆكێ خانییێ خوە.
دەیكا وی پرسیارا وێ مالێ كر؟ گۆتێ ئەز تشتەكی نزانم. دەیكا وی پرسیارا ناڤێ خودانێ مالێ كر؟ گۆتێ ئەز ناڤێ وی نزانم. دەیكا وی پرسیارا ناڤ مالیێ كر، پرسیارا زارۆكێن مالێ، ھەڤتەمەنێن وی، بەحسا ژیارا وان، مالدارییا وان، دێ چ كار كەت، دێ چ خوەت چ ڤەخوەت، دێ ل كیرێ نڤیت ووووو دەھان پرسیارێن بێ بەرسڤ و ھەیڤەكێ و دو ھەیڤان و سێ ھەیڤان، دەیكێ ھەر پرسیار دكر و بابێ ھەر دگۆت ئەز نزانم.
ل ئێڤارییەكێ حەجی ئەحمێ ھاتە بەر دەرۆكێ مالا وان و گۆت: "ئەڤرۆ ئێڤاری ترۆمبێلەك یا ھاتییە ناڤ گوندی و یا ژمن خواستی ئەز خەبەرێ نەخۆشكەفتنا كورێ وە بگەھینمە وە، نوكە یێ ل نەخۆشخانێ ل باژێری و لەزێ بكەن، ترۆمبێل یا ل ھیڤییا مە".
دەیكێ ب خوەدادا و د نەعالێن خوە، ھلنگڤت. بابێ دەستێ خوە ل شیتكا خوە دا و ترۆمبێلێ تو ل كیڤەی، خوە ل حەجی ئەحمێ ژی نەگرت. دەیكێ گازی حەمدا عەریفی كر و گۆتێ كچا من جانێ خەما تە و سەركۆل بەرەڤ ترومبێلێ چوو و حەجی ئەحمێ خوە د سینگێ ترۆمبێلێ قوتا و باژێرۆ تو ل كیڤەی، ئەڤە ئەمێن ھاتینە تە.
ئەو كورێ وەكی ناڤكا نێرگزێ، یێ بوویە ھەستی و بۆ دەرمانی ژی تو پشكا گوشتی ب وی ھەستی ڤە نابینی. جەگەرە و دەیكا وی خوە تێ وەركر، قەدەمێن بابێ لێ شكەستن و حەجی ئەحمێ ب شێلكەكا پرسیاران بەرسڤ ل بەر برینپێچێ بەرزەكرن و نۆشدار گەھشتێ و ھەمی تشت ب دووماھی ئینان.
تابووتەك پەیداكرن و ل سەر سیپایێ ترۆمبێلێ ب قەد وەریسەكێ گرێدان و دەیكا وی جۆت لەوەندیێن خوە قوساندن و ب رەخێن تابیتێدا داھێلان. بابێ تەپ ل سەرێ خوە ددان و حەجی ئەحمێ ملێن وی گرتن و ل ترۆمبێلێ سیاربوون.
حەجی ئەحمێ، ژ شەرماندا مالا خوە ژ گوندی باركر. بابێ نەفرەت ل خوە و گەمژەییا خوە كرن. دەیكێ گۆت: "ئەڤە ئەوە یا من ب سەرێ كورێ خوە ئینایی" و حەمدا عەریفی دل ل دلێ وانددا و گوت: "خودێ ھۆسا یا حەزكری و ھەر خودێ یە ددەت و ھەر خودێ یە دبەت". ئەگەر بنەفشا دەیكا تەمۆی نەبایە، دا بێژیتێ دلێ خوە نەھێلن دێ قەستا داركا ب كنجر كەینەڤە و داخوازا زارۆكەكێ كور ژێ كەین، ئەو كەسەكێ بێ مراد نا زڤرینیت.
ــــــــــــــــــــــــــ
د كوڤارا ەیڤ ژمارە 102 دا بلاڤبوویە.
ليست هناك تعليقات:
إرسال تعليق