عبدالرحمن بامەرنی
مەبەست ژ گەلاوێژا ئێكێ، ستێرا گەلاوێژا گەشە ل عەسمانی و گەلاوێژا دووێ، مەبەست ژێ فێستیڤالا سالانەیا نێڤدەولەتی یا گەلاوێژە. بۆچی من ھەردوو گەلاوێژ تەمامی ئێككرن؟ رەنگە ئەڤە پرسیارەك بیت و بەرسڤا وێ د گەشاتی و د مان و بەردەوامیا ھەردووكاندایە. ب دەركەفتنا سالانەیا گەلاوێژا ستێر ل عەسمانی، خەلكەكی دئینتە زمان و تایبەت ئەڤ كەسێن د زمانێ دەمرۆژ و وەرزێن سالێ دگەھن و ھەلاتنا وێ ل عەسمانی بخوە، رەنگڤەدانەكە ل سەر بەردەوامیێ و گەلەك بیرھاتنێن خوە ل سەر د راچینن. ئەگەر ل سەر گەلاوێژا دووێ راوەستین، مەبەستا من فێستیڤالا سالانەیا گەلاوێژ، دێ گەلەك قەلەمان، سەر قەلەمان بینی چاڤەرێی دەمرۆژا وێنە و دەھان داھێنان چاڤەرێ دكەن، كەنگی دێ دەرگەھێ وەرگرتنا بابەتان دەستپێدكەت، دا بەشدار ببن و ئەڤ بەشداریا ھەنێ كو من مەبەستە ئەز ژێ بەحس بكەم، بژارەیا سالانەیا نڤیسەرێ وێ یە و حەزدكەت جوانترین و بژارەیا نڤیسینا خوە، داھێنانا خوە، ڤەكۆلینا خوە بۆ گەلاوێژێ ب ھەلگریت و پێشكێشی وێ بكەت. باوەرناكەم چ جارەكێ نڤیسەرێ بەشدار، ب ئارمانجا خەلاتەكێ ماددی ل ھیڤیا وێ مابیت ھندی حەزا بەشداربوونێ د فێستیڤالێ بخوەدا ھەی. ئەڤا ئەز دبێژم، ب حوكمێ بەشداریا من د سالانێن فێستیڤالێدا و ئەو پەیوەندی و بەحسكرنا نڤیسەران ل سەر فێستیڤالێ دھێتەكرنێ و دلخۆشیا وان ب بەردەوامبوونا وێ. بلا مە فێستیڤال ھەبن، فێستیڤالێن ئەدەبی و یێن رەوشەنبیری و یێن ھونەری و ئەڤ خرڤەبوونێن ھەنێ نە دشێن مێشكی ڤەكەن، داھێنانان، ڤەكۆلینان بەرھەم بینن و ب خۆشحالیڤە دبێژم، گەلاوێژ ب گەشاتیا خوەڤە یا ڤێ دكەت.
دا ژبیرنەكەم، ئەڤ بویانباغا (ریباتا) ل سەر ستوویێ من یا د. ئەمجەد عوبەیدە و بوچی من ئەڤە گوت، ژبەركو ھندی یا گوتی و گوتیەڤە.
ــــــــــــــــــــــ
ل گەلاوێژنامە یا بیستوھەشتەمین ڤێتستیڤالا گەلاوێژ بلاڤبوویە
ليست هناك تعليقات:
إرسال تعليق