2013/08/22

تەكنیكا دەربرینێ‌ د شعرەكا جەمال چەلكی دا

جەمال چەلكی، ئێك ژ وان كەسانە یێن شعرێ‌ دنڤیسن، دیوانەكا شعری هەیە و چەندین دەقێن خوە یێن شعری ل روژنامە و كوڤاران بلاڤ كرینە. (دێمەكێ‌ گەش) ژی ناڤێ‌ ئێك ژ شعرێن وی یە، دێ‌ هەولدەین بو نڤیسینا خوە ل سەر ڤی دەقی راوەستین، بزانین شێوازێ‌ تەكنیكێ‌ لدەڤ ڤی هوزانڤانی چاوانە، زمانێ‌ وی یێ‌ دەربرینێ‌ ل چ ئاستە، چەند شیایە خوە دگەل ئەڤرو، قوناغا ئەڤرو، شێوازێ‌ نڤیسینا شعرا ئەڤرو بگونجینیت. ڤی هوزانڤانی كو هەر كەسێ‌ ل دیوانا وی روینیتە خارێ‌ و بەرپەرێن شعرێن وی ب قولپینیت، دێ‌ بو گەلەك تشت ئاشكەرا بن، ئەڤ هوزانڤانە هێشتا ب ستایلێ‌ سالێن هەشتیان دەقێن خوە سەر راست دكەت و حەز دكەت تام و خوشییا وی سەردەمی، وێ‌ تەكنیكێ‌ و ب وێ‌ ریتم و ناڤەروكێ‌، بەردەوامیێ‌ پێبدەت و بهزرا وی هەر وەكو دشعرێن وی دا دیار، بو وی خوشە خاندەڤایێ‌ وی وەك وی بڤێت، بمینیت.
ئەگەر بەراوردیەكێ‌ د شێوازێ‌ دەربرینێ‌ یێ‌ ڤی هوزانڤانی و ئەڤ كەسێن
شعرا نویخاز و مژەوی نوكە دنڤیسن دا بكەین، دێ‌ گەلەك خال بومە دیار بن، كو ل هەردوو شێوازان خالێن پوزەتیڤ و نەگەتیڤ هەنە و دڤی بیاڤی ژی دا، ئەزمونا مەعریفییا شاعری دشێت ڤان خالان جودا بكەت و دەقێن سەركەتی و نە سەركەتی پولین بكەت و شعرا مەقبول و نە مەقبول بو خاندەڤای، ژ ئێك جودا بكەت. هەر چەندە دگەل لاوازبونا سنورێ‌ دناڤبەرا ژانرێن ئەدەبی دا، دەقێن نوی و تەكنیكێن نوی پەیدا بوینە و گەلەك جاران دێ‌ بینین ژی، ژانرێن ئەدەبی گەلەك مفای ژ تەكنیك و بنیاد و توخمێن ئێك وەردگرن، زمان ژی كو ئالاڤەكێ‌ گرنگێ‌ دەربرینێ‌ یە بتایبەتی لدەف هوزانڤانان، كو گەلەك زمانی بو خوە دكەنە هوكارەك بو نڤیسینا دەقێن خوە و گەلەك دەقێن شعری بناڤێ‌ نویخازیێ‌ و مژداریێ‌ دكەڤنە بەرچاڤێن مە، كو هوزانڤان بخوە دناڤرا بەرزەبویە و زمانێ‌ وی یێ‌ دەربرینێ‌ بو وی بو یە بەربەستەك، كو نەشیا بیت هەر وەكو وی بڤێت داهێنانێ‌ بكەت و د ئەنجامدا، دەقێ‌ وی یێ‌ شعری ژی نە دەقەكێ‌ سەركەتی و مەقبولە و ئەگەر ڤەكولینەك بو وی تێكستی ژی هەبیت و وێنەیێن وی بهێنە شروڤەكرن و سەروبن كرن، دێ‌ گەلەك لاوازی و بێ‌ سەروبەری تێدا بەرچاڤ بیت كو هوزانڤان نەشیایە خوە ژ بن باندورا زمانی دەربێخیت و رزگار بكەت، لڤێرە ژی نە بتنێ‌ دەقێن وان د ئاست دا نا بن، بەلكو گەلەك زورداریێ‌ ژی ل زمانی دكەن، چ ب زانین بیت یان ژی بێ ئاگەهی. (جەمال چەلكی) ژی كو من بو ڤێ‌ نڤیسینێ‌ مەرەم ب ستایل و تەكنیكا وی یا دەربرینێ‌ و زمانێ‌ وی یێ‌ شعری هەی، ئێك ژوان كەسانە یێن شیاین بازنەیەكی لدوور شێوازێ‌ خوە یێ‌ دەربرینێ‌ بكێشن و تایبەتمەندیەكێ‌ بدەنە قەلەمێ‌ خوە، هەر چەندە سەركەتن و نە سەركەتنا وی و تەكنیكا وی یا دەربرینێ‌ نە بابەتێ‌ من یێ‌ ڤێ‌ نڤیسینێ‌ یە، بتنێ‌ یا من مەرەم پێهەی، هەر هوزانڤانەكی كو بڤێت تێكستەكی َشعری یێ‌ جوان بنڤیسیت، وێنێن وی یێن شعری دجوان و نوی و تژی رامان بن، ئەزمونا شاعری دناڤ را خویا بكەت، دڤێت بشێت قەلەمێ‌ خوە جودا بكەت و شێوازێ‌ خوە یێ‌ دەربرینێ‌ هەبیت و بشێت ڤی شێوازێ‌ هەنێ‌ ب پارێزیت و پێش بێخیت كو شعر بخوە نویاتیە و لێگەریانە ل وان تشتان یێن نە لڤ و و شاعر وان تشتێن نە لڤ بلڤینیت و بلەقینیت، هوزانڤان بشێت ب ستایلێ‌ خوە نڤیسینا خوە بەرچاڤ بكەت و ب كەسێ‌ دی ڤە نەچیت، كو خویایە، هەر هوزانڤانەكێ‌ خودانێ‌ خوە و ستایل و تایبەتمەندییا خوە یا نڤیسینێ‌ نەبیت، نەشێت پێنگاڤێن نویكرنێ‌ بهاڤێژیت، ئەڤ تشتێ‌ ڤان پێنگاڤان ژی جوان و جوانتر لێدكەت و زێدەتر دئینتە پێش، هەبونا تشتەكێ‌ نوی و دیتنەكا نوی و بینینەكا نوی یە.
دێمەكێ‌ گەش/ دێمەكێ‌ گەش/ وەكە روژێ‌/ هێدی هێدی/ شەوقا خوە كێشا دورێت من/ من ب تیژینكەكا/ هویر هویر/ ژ هەر دوو چاڤێن/ تەژی خوین/ زێرەڤانیا وی دێمی كرم/ كو یێ ل سەر بەحرەكا بێ بن/ هزر یا دبێژیتە هزرێ‌/ كا جهێ‌ من../ شلقێنا وا نێزیك نێزیك/ یا دگەهتە من/ ئەز ژی ئەڤە چەندین سالە/ ئەڤیندارم/ هزرو بیرێن ئەوی دێمی/ یێت بوینە ئارمانج و مەرەم/ من ژی هزرە/ پاشەروژێ‌ بم/ مەلەڤان/ سەر ڤێ‌ بەحرا/ هندە یا كویر و یا بێ بن..


ليست هناك تعليقات: