بحث هذه المدونة الإلكترونية

pertook

pertook

2013/09/13

تابلویەك ژ بێدەنگیا وێ‌!

        
هەر دەما جگارەكێ‌ دپێچم و

هلدكەم

دناڤ دوكێلا وێ دا،

ئەوێ‌ دبینم و

وەك چكلێتێن جەژنێ‌

ب سوراڤا لێڤێن خوە،

 تاما دەڤێ‌ من شرین دكەت..


ژنەك ل بەرێڤەی پەنجەرا من،

 هەمی تشتێن من دگەلن و

چیروكێن من

 خەمێن وێ‌ دئازرینن و خەمباریا وێ‌ ژی

پەهلەوانێن چیروكێن من،

 دترسینن!

دناڤبەرا من و وێ‌ دا،

دیوارەكێ‌ شووشەیە و

دەما دەستێ‌ خوە پێدا د ئینتە خار

ئەز لڤی رەخی،

 هەست ب هەناسەیێن دلێ‌ وێ‌ دكەم!

تابلویەكە و

هەمی رەنگێن وێ‌ ئەز و ئەو دكێشین

ئەز كوما رەنگێن تاری مە و

ئەو كوما رەنگێن ڤەبوی..

ژنەكە و نە ژ رەنگێ‌ چ ژنان

هەكو ئەز بیر ل جادێ‌ دكەم

ئەو بیر ل پیاسان دكەت

دبیتە هەیڤ و

سلاڤێ‌ ل ژوورا منا تاری دكەت

ئەز و ئەو

د ئێك بەرپەر دا خەونان دبینین

دبینە شعر،

 چیروك،

دكەڤینە سەر ئەزمانێ‌ عاشقا و

نڤیسینێن مە

 ل سەر پەرێن عەوران دگەرن و

دهێنە خاندن!

ژنەكە،

دەما دناڤ مێرگا دلێ‌ من دا رونشتی

من ئاگەهـ ژ پێژنا وێ‌ نە بو

كلیلێن ژوورێن من

 هەمی دگەل وێ‌ چوون و

ژ هینگێ‌ و هێڤە

نە ئەز دشێم ئەوێ‌ یا بەرزە ببینم و

 نە ئەزێ‌ بەرزە،

دشێم خوە ببینم..

ژنەكە،

هێشتا ل بەرێڤەی پەنجەرا منە و

شەرم ژ بەختەوەری و

 تنێیاتیا خوە دكەت

ب بەهانەیا عەشقێ‌

د پەنجەرەیەكا ڤەكری دا،

ل هەیڤێ‌ دنێریت..

ژنەكە،

 كوشتنا تنێیاتییا خو،

بو من دكەتە كومێنت و د تابلویەكی دا

دنەخشینیت

هەمی تشتێن وێ‌ ئەز دڤی تابلوی دا دخوینم!

ئەڤ تابلویێ‌

 ژ رەنگێن تاری و ڤەبوی تێكەل

چەند رەنگێن من دناڤ دا هەنە

هند گرێكێن من ژی

 برەنگێن وێ‌ ڤە ددیارن..

ئەڤ تابلویە،

ب چ تابلویێن دی ڤەناچیت

ئەڤ ژنە ژی

 ژ چ رەنگێن دی یێن ژنان نینە

سێ‌ نیڤیەكێن شەڤان

 شعران بو بخوینم

رەنگێن وێ‌ توختر دبن و

 هەناسەیێن وێ‌ گەرمتر..!


إرسال تعليق