بحث هذه المدونة الإلكترونية

pertook

pertook

2013/08/21

گولشەنگ و مەسجا ڤەشارتییا شعرێ‌

عبدالرحمن بامەرنی
كەڤوك، ناڤێ‌ شعرەكا هوزانڤانا گەنج (گولشەنگ)ە و ئەڤ شعرە د روژناما وار ژمارە 683 ێ‌ دا هاتیە بلاڤكرن. هوزانڤانێ‌ وەك هەر كچەكا دی هەستێن خوە بەرامبەر حەژێكرنا خوە دەربرینە و ل هەبونا خوە یا دروست دگەریت، هەبونا هەر كەسەكی ژی تەمام دبیت دەما هەست بنیڤا خوە یا دوێ‌ دكەت. لێ‌ زمانێ‌ شعری و زمانێ‌ نڤیسینێ‌ جوداهیا خوە هەیە ددەربرینێ‌ دا، داهێنان زێدەتر سنعەتكاریە ددروستكرنا وان هەمی چیروك و سەرهاتیێن روژانە دهێنە بەرچاڤێن مروڤی.
دهندەك وێنەیان دا ئەڤ دیمەنە هاتینە كێشان (دناڤ پەقیشكێن چاڤێن تە دا، ل حازریا خوە دگەرم ـ چارەنڤیسێ‌ خوە دگەل خەونێن تە ئاڤا دكەم ـ دناڤ هەمبێزا دەستێن تە دا دخەو دچم ـ ئەز كەڤوكیا خوە ل هنداڤی دلوڤانیا تە دبینم)....
دڤان وێنەیان دا، هوزانڤان وەك كچەكا گەنج و ئومێد بو ژیانێ‌ هەین، وەك ئەو دنیایێ‌ دبینیت و دخوینیت و شروڤە دكەت، وەك هەر كەسەكا دكاملانا گەنجاتیا خوە دا هزرێ‌ ل وان تشتان دكەت یێن هەڤالێن تەمەنێ‌ وێ‌ تێدا دبورن، ئەڤە وەك خاندنەكا دەستپێكی نە بو ڤێ‌ شعرێ‌، لێ‌ هوزانڤان لڤێرە بتنێ‌ نە راوەستایە و خاندنەكا دی ل پشت ڤان دیمەنان هەیە، یا مە دڤێت لێبگەرین، ئەو شیایە چ مەسج بگەهینتە مە یێن خاندەڤا و پەیاما وێ‌ یا ڤەشارتی چبویە!

ئەگەر ل كومەلگەهەكێ‌ وەك یێ‌ مە سەح بكەین، زێدەتر ژن خوە دبن سیبەرا زەلامی ڤە ئارام دبینیت و بو وێ‌ خوشە ئەو زەلامێ‌ ژیانا هاوسەرگیرێ‌ دگەل دا دبەتە سەر، زەلامەك بهێز بیت و ئەگەر خو ژن یا ئازاد بیت و پەروەردەیا وێ‌ یا ئازاد بیت و باوەری بخوە هەبیت ژی، لێ‌ فشارا جڤاكێن روژهەلات دخازتە وێ‌ چەندێ‌ كو زەلامەك هەبیت و ئارامیێ‌ لدەف پەیدا بكەت. بەلكو دجڤاكێن پیاو سالاری دا هەر دەم ژن خوە كێم دبینن، ئەڤ راستیا هەنێ‌ ژی دوان هەمی دیمەنێن مە ل سەری رێزكرین دا دیار دبیت. لێ‌ پەیاما ڤی دەقێ‌ شعری بمن وەرە هەر دڤان دیمەنان دا دیار دبیت كو هوزانڤان واقعەكی بەرچاڤ دكەت و حەژێكرنا خوە و ئارامبونا خوە بو رەگەزێ‌ دی دكەتە نمونە.
ئەگەر ئەڤا ل سەری مەسجا ڤەشارتی یا ڤی دەقێ‌ شعری بیت، لێ‌ داهێنان و سنعەتكاری دشعرێ‌ دا و بتایبەت دەما شعر یا پەنگیای بیت ژ خاندنان، هندەك دیمەنێن دی و پێناسەیێن دی و سەروچاڤێن دی هەنە، شعرا سەركەتی ژی زێدەتر ئەوە یا چەندین رامان و مەسجان بخو ڤە دهەلگریت، ئەگەر نە، هینگێ‌ چ جوداهیا خوە دگەل نڤیسینا چیروكەكێ‌ یان پەخشانەكێ‌ نابیت و رویێ‌ دی یێ‌ ڤێ‌ شعرێ‌ ژی دەما ئەم چیروكا عشقەكێ‌ و حەژێكرنا وێ‌ دبینین و كا چەند شیایە داهێنانێ‌ دكوپلەیێن شعرا خوە دا بكەت، دیسان ئەڤا هەنێ‌ ژی دگەل تەمەنەكێ‌ گەنج و سەربور و مەعریفەیا هوزانڤانا مە و دەستەواژەیێن وێ‌ یێن شعری دراوەستیت و كا ئەڤ دەستەواژەیێن وێ‌ یێن شعری تا چ راددە د زەنگینن.
ئەگەر ل هندەك دیمەنێن دی ژ ڤێ‌ شعرێ‌ سەح بكەین، (تو دبیە سپەهیترین ئەز ـ پەرمیچكێن خوە ل بیابانا نەستا من نم نم دبارنیی)، ئەڤ دیمەنێن هەنێ‌ خواندنەكا دی ددەنە ڤی دەقێ‌ شعری جوداتر ژ مەسجا وێ‌ ڤیایی بگەهینیت،  ئەو ژی عەشق و حەژێكرنا وێ‌ یە، هەر گاڤا كچ ژی شیا باوەریا كەسەكی بدەست خوە ڤە بینیت و باوەری پێ‌ هەبیت، نەبتنێ‌ ژیانا وێ‌ خوەش دبیت بەلكو ژیانا وی ژی خوش دكەت و دڤی دەربارەی ژی دا هوزانڤانێ‌ گەلەك جوان ئەڤ وێنە تراشی یە، دەما گوتی (تو دبیە سپەهیترین ئەز)، یان دەما دڤی وێنەی دا خوە ب بیابانەك دهەژمێریت، مەرەما وێ‌ ئەو دبەرزەبونەكێ‌ دا دژیت، هەلبژارتنا بیابانێ‌ ژی وێنەكێ‌ زور جوانە بو بەرزەبونێ‌، ژبەركو ل بیابانێ‌ هیچ كوژیەكێ‌ دنیایێ‌ ژ ئێك ناهێتە جوداكرن و بتایبەت ژی ئەگەر چ نەخشە نەبن و توزا بیابانێ‌ عەسمانی و چاڤێ‌ روژێ‌ بەرزەكەت.
لدوماهیا ڤێ‌ شعرێ‌ ژی، هوزانڤانێ‌ مەسجا خوە یا شعری و حەژێكرنا خوە بو رەگەزێ‌ دی تێكەلی ئێك وێنە كرینە، دەما دبێژیت (ئەز كەڤوكیا خوە ل هنداڤی دلوڤانیا تە دبینم)، ئەڤە ژی پەیامەكا جوانە بو ئەڤا مە ل سەری ئاماژە بو دای كو دجڤاكێن پیاوسالاری مافێن ژنان دهێتە خارن و زەلام نە دادیێ‌ و توندوتیژیێ‌ بكار دئینیت.


إرسال تعليق