بحث هذه المدونة الإلكترونية

pertook

pertook

2013/08/22

دەما خاندەڤا دبیتە خودانێ‌ دەقی، شعرەكا (مەلەڤان بارانی) وەك نمونە

عبدالرحمن بامەرنی
ئەگەر هوزانڤانی دەقێ‌ خوە یێ‌ شعری قفل دایێ‌ و خوە ژێ رازیكر و گەهشتە باوەریەكێ‌، كو ئەو دەقێ‌ هەنێ‌ بكێر دهێت بهێتە بلاڤكرنێ‌. هینگێ‌ بێ‌ دوو دلی، هوزانڤان دێ‌ وی دەقێ‌ هەنێ‌ بلاڤ كەت و دگەل بلاڤكرنێ‌ ژی، ئەو ژ هەست و سوز و نەستان ڤالا دبیت و بو هوزانڤانی ژوی دەقی، بتنێ‌ ناڤ دمینیت. هینگێ‌ دەقێ‌ سەركەتی و یێ‌ نە سەركەتی، دمینیتە ل سەر بریارا خاندەڤای، هینگێ‌ ئەو كەسێ‌ وی دەقی دخوینیت، دێ‌ لدویڤ شەیدابونا خوە ب وێ‌ داهێنانێ‌، لدویڤ تام و چێژ وەرگرتنا خوە ژ وی دەقی، بریارێ‌ دەت، كا ئەو دەق بو وی یێ‌ خوش بو یە یان نە. ئەڤە وەك خاندەڤا، دهەمان دەمدا كەسەكێ‌ دژی هەیە دهێت وی دەقی دخوینیت، لێ‌ خاندن بو وی بتنێ‌ بەس نینە، بەلكو ئەو زێدەتر خوە بەر ددەتە قولاچكێن ڤەشارتی یێن دەقی، ئەگەر هوزانڤان شیابیت كارلێكەكێ‌ دناڤبەرا دەقێ‌ خوە و كەسێ‌ بەرامبەر دا دروست بكەت، هینگێ‌ مەرج نینە سەنگا بابەتی چەند بیت یان دەق چەند یێ‌ درێژ بیت یان چەند كەرنەڤالێن وێنەیان تێدا هەبن یان هوزانڤانی لدویڤ گێولێ‌ خوە دەقێ‌ خوە ئاڤا كربیت، ژبەر كو ئەو دێ‌ بچاڤێ‌ رەخنێ‌، هەلسەنگاندنەكا زانستیانە سەحكەتە وی دەقی. بو بابەتێ‌ خوە ئەز دێ‌ هەولدەم شعرەكا هوزانڤان (مەلەڤان بارانی) بناڤێ‌ (پەری یا بای) وەربگرم  كو دروژناما وار ژمارە 786دا بلاڤ بویە، هوزانڤان مەلەڤان ئێك ژوان كەسانە یێن من چەندین دەقێن وی خاندین و من خوشی ژێ‌ وەرگرتی، هەلبژارتنا من ژی بو ڤی دەقی، ئەو دویركەتنە یا دناڤبەرا دەقی و خویندەڤانی دا دهێتە دیتن، رەنگە هوزانڤانی بوچوونەكا دی و تام و خوشیەكا دی بو هەبیت ئەگەر ئەو بو من شروڤەكرنەكێ‌ بدەتە دەقێ‌ خوە، لێ‌ من شروڤەكرنا وی نەڤێت و ئەز دێ‌ یا خو بەحس كەم.

هەر روژ ...../ مینا پەریەكا بای/ تو دهزرگەها من دا ئاسێ‌ دبووی/ من تو ..... د هزراندی/ د ئەڤاندی و/ مینا زارویەكا بێ‌ دای و باب/ د هزرێت خوەدا/ د پێچای و د نڤاندی/ ئەڤجا خەونێت من یێت گەهشتی و / خەونێت تە یێت ساڤا تێكهەل دبوون و/ یاری دكرن/ خانیكێت هیڤییان دروست دكرن و/ بیردانكا من دبوو یاریستانا حەزێت تە یێت ساڤا/ و هێشتا شینوارێت تە لێ‌ هەنە!..
دڤێ‌ پارچێ‌ دا، هوزانڤان دگەل خەیالا خوە دئاخڤیت، ئەو تشتێ‌ هوزانڤانی ژی ڤیایی بەحس بكەت ل پشت هێمایێ‌ (پەریا بای) ئاسێ‌ كریە. جارێ‌ پەریا بای ژبلی خەیالا هوزانڤانی و دەستچێكریا وی، چ تشتەكێ‌ بناڤ نەبویە و باوەرناكەم د چ ئەفسانە و چیروك و چیڤانوكان ژی دا، ئەڤ ناڤە هاتبیت. چنكو لدویڤ شارەزایا من بتایبەت بو چیروك و چیڤانوكێن كوردەواری، تشتێ‌ بڤی رەنگی مە نەبویە.. هوزانڤان دبێژیت (هەر روژ....  مینا پەریەكا بای)، لڤێرە دیار دبیت (پەریا بای)، سالوخەتەكە بو تشتەك دی، بو كەسەك دی و دبیت مروڤ بیت یان خەیالا وێ‌ بیت یان بیرهاتنەك بیت و هوزانڤان ب دەربرین و كێشانا وێنێن خوە ئازادە. یان، (بیردانكا من دبوو یاریستانا حەزێت تە یێت ساڤا)، لڤێرە ژی خاندەڤا هەست ب نە ئارامیەكی ژڤی وێنەی دكەت، ئەز باوەرم هوزانڤانی بخوە ژی هەست بڤێ‌ نەهەڤسەنگیێ‌ كریە و بەلگە ژی دەما هەڤسارێ‌ ڤێ‌ (پەری یا بای)، ژ دەستا دەردكەڤیت و لدوماهیێ‌ ژی خوزیا نەزڤرینا وێ‌ رادهێلیت، حەز دكەت قەست بكەتە جهەكـ دی و شوینوارەك دی و كەسەك دی.
(ئەز نزانم .../ كانێ‌ تو د بیردانكا كێ‌ دا/ ئاسێ‌ بوویە ؟/ ئەگەر دا خەمەكێ‌ بو وی ژی فركەم و جگارەكێ‌ كێشم/ چنكی بێ‌ گومان ئەو ژی یێ‌ پەشیمان بووی/ و  وەكو من نوكە یێ‌ ژ بای دترسیت)، دوێنەكێ‌ دی دا (نەكو جارەكا دی!/ تە بكەتە پەری و دگەل خوە تە بو من ب ئینیت).
یا من دڤێت بەحس بكەم، هەر كارەكێ‌ هەبیت شەنگشتە بو گرنگە، شعرێ‌ ژی قالبێن خوە هەنە، ئەو تشتێ‌ ئەم پێش كێشی خاندەڤایێ‌ خوە دكەین گەلەك یێ‌ گرنگە مە بڤێت بزانین ئەم چ بگەهینینێ‌! ئایا دروستكرنا تابلویەكی دپەروازەیەكێ‌ جوان دا بەسە كو خەلك تەماشا بكەت؟ نەخێر چنكو خەلكی وێنە پێ‌ باشترە نەك پەروازە و هوسا شعر ژی، خەیالا شاعری بو شاعری و ئەوا هاتیە بەلاڤكرن ژی بومە یێن خاندەڤا گرنگە و دڤێت هوزانڤان خاندەڤایێ‌ خوە ژی رازی بكەت.


إرسال تعليق