كی خازوكان چێدكەت!!

 ع. بامەرنی

دا ژڤێ سەرھاتیێ دەستپێبكەم، دا بزانین چاوان خازوك دروست دبن. ل ئێك ژ وێستگەھێن شەمەندەفران زارۆكەكی ھندەك علك كربوونە د قالكەكێدا و ل بەر خەلكی دگێراندن، ژ جل و بەرگێن زارۆكی یا دیار بوو كو یێ ھەژارە و خەلكی ژ دل پێڤەبوون، پارە دكرنە د قالكا ویدا و چ علك ژی بەرامبەر نە رادكرن. تا ئێك ژ بازرگانێن ناڤدار د بەر وی زارۆكی را دەرباز بووی و پێنج دولار كرنە د قالكا ویدا و ل شەمەندەفرێ سیاربوو. پێنەڤێت كەیفا وی زارۆكی گەلەك ب وێ پێنج دولارێ ھات و لێ ھند دیت ئەو بازرگان ژ شەمەندەفرێ ھاتە خارێ ڤە و ھاتە دەف زارۆكی و گوتێ: "من ژبیركر بەرامبەری پێنج دولارا خوە علكان ببەم، ژبەركو ئەز ژی بازرگانم و پاران بەرامبەری وی تشتی وەردگرم یێ ئەز دفروشم" و چەند علك ژ قالكا وی ئینانەدەرێ و ل شەمەندەفرێ سیاربووڤە.

یان زەنگین زەنگین یان ھەژار ھەژار

 عبدالرحمن بامەرنی

ھەڤالەكێ من گوت: "ل دھوكێ گەلەك زەنگین یێن ھەین، خەلك نزانیت دێ پارێن خوە چ لێكەت!". بەلگەیێ وی ژی بۆ خارنا فتارێ بوو، كو ب زوری ل خارنگەھێ مێزەك بدەستكەفت و گوتە من، ل پرانییا خارنگەھا ئەڤە ب بەرچاڤێن من كەفتیە و تایبەت بۆ شیڤخارنێ و فتارە شكاندنێ و یێ ژخوە پشت راست بوو كو خەلكێ دھوكێ زەنگین زەنگینن!!

ئەز ژ وی باش تێگەھشتم كو بەرپرسێن مە ژی ھەمان بەرێخوەدان یا ھەی، ژبەركو بتنێ ئەو كەسێن وەك خوە زەنگین دبینن و ئەو ھەست ناكەن كو ھەژار و پێدڤی تژی باژێرینە و دڤێت تێكەلییەك ھەبیت، باژێر ھەمی دحالخوش نینن، ھەمی زەنگین نینن و ھەمی ھەژار ژی نینن، لێ بەرپرس و زەنگینێن مە دزورن و دڤێت ھەست ب بەرپرساتیێ بكەن، كو كەسێن پێدڤی ھەنە و دشێن دەستێ ھاریكاریێ بۆ درێژ بكەن.

ل دیدارا (مەلا بەختیار) ل سەر (روانگە و رەخنە) ئاخفتین

 عبدالرحمن بامەرنی

ھەر چەندە دان و ستاندنا مە زێدەتر ل سەر مالپەرێ (روانگە و رەخنە) بوو و ئەم چاوان ڤی مالپەری بكەینە مالپەرەكی نیشتیمانی و ھەمی تەخ و تویژێن جڤاكی خوە دناڤدا ببینن، لێ مە ل سەر بیستوپێنجەمین فێستیڤیالا نێڤدەولەتیا گەلاوێژ (یوبێلا زێرین) ژی ئاخفت، كو ل بەرە رۆژا 25/5/2022ێ بھێتە گێران و ئەڤ گەرە یا جوداتر بیت ب تەوەرە و رێژا بەشداریێ.
تشتێ ھەر جار ئەز پێكەیفخوەش دبم، دەما سیاسیەكی دبینم پرۆژێ وی زێدەتر پرۆژەكێ نیشتیمانی بیت و ھەر جار دگەلمندا دوپاتیێ ل سەر ئێك خال دكەت، ئەو ژی، رەخنە شكاندنا كەسێ دی نینە. رەخنە ئاڤاكرنە و ئەگەر مە بڤێت، وەك مللەت و وەك كومەلگەھـ و وەك تاك بەرەڤ پێش بچین، دڤێت ئەم ژ رەخنێ و رەخنە لخوە گرتنێ نە رەڤین و ئەم ئێك و دوو قەبویل بكەن و ل سەر شاشییان، ئێك و دوو سەر راست بكەین.

كێشە ژمەیە یان ژ زانكویێن مە؟!!

 عبدالرحمن بامەرنی

ھەڤالەكێ من گازندا خوە بۆ من كر و دگوت: من دوو كور ھەنە و ھەردوو كورێن من دەرچوویێن زانكویێ نە و دخانیڤە بەتال و عەتالن! دەست بگلەییا كر و چ د حكومەتێ و حوكمداریێ نەھێلا. راستی ئەز وی ھندەكێ مافدار دبینم، ژبەركو ئەو كورێ جیرانێ خوە دبینیت، بتنێ ھەتا سیێ ناڤنجی یا خواندی و نوكە خودان ماركێتە و داھاتێ وی بتنێ دشێت خێزانەكێ ب زێدەھی ڤە برێڤە ببەت و ھەردوو كورێن وی، ئەوێ وی خەون ل سەر ئاڤاكرین، دخانیڤە د روونشتینە و وەكو من ل رێزێن ئێكێ گوتی (بەتال و عەتالن).

دا بھێمە سەر بابەتێ من مەبەست پێ:

زانكویێن مە باوەرنامان دكەنە ددەستێ مەدا و دەما پشتا خوە ددەینێ، ئەم نزانین كارەكی بۆ خوە پەیدا بكەین. باشە د نوكەدا ب سەدان دەرچوویێن پەیمانگەھـ و زانكوییان ل جاددێن دھوكێ پیاسا بێكاریێ دكەن و نزانن دێ چكەن! نەزانینا وان ژی بۆ چەند خالان ڤەدگەریت، ئەز بەحسا دامەزراندنێ ناكەم، لێ ئەز بەحسا پەیداكرنا كاری دكەم و چاوان مفای ژ شیانێن خوە یێن سالێن خواندنێ وەربگرن، ئایا كێماسی ژ وانە، خوە ناھاڤێژن چ كاران یان د لێگەریانێن واندا كار بدەست ناكەڤن؟!!

نەخێر، زانكوو و پەیمانگەھێن مە ھەمی تشتان نیشا خوێندكاران ددەن، ئەز بخوە چ رەخنەیان ل سەر ڤێ چەندێ ناگرم و بلا ئەو بابەتێ من نەبیت، لێ فەرە ماموستایێن زانكویێ ب ھەڤكاری دگەل كەساتییان، كەساتی مەبەستا من پیشەداران و وان مێھڤان بكەن و خویندكار گوھدارییا چیرۆكێن وان بكەن، خوێندكار دگەل بكەڤنە دان و ستاندنێ، زەحمەتییا كاری، پەیداكرنا كاری، بەردەوامی دگەل كاری، ھینگێ ئەزموونا قوتابی ژ چوار سالێن زانكویێ وەرگرتی و فێربووی دگەل پێنگاڤێن وی یێن بچووك ژبۆ ڤەدیتنا كاری تێرا وی ھەنە، بشێت بۆ خوە كارەكێ پەیدا بكەت.

مە نەزانی كی خائینە و كی كورد پەروەر؟!!

 عبدالرحمن بامەرنی

بلا ھەمیێ بكەین، بتنێ كوردینیێ ب ئێك نەفروشین! ئەڤە كومكرن و ڤێكخستن و دوبارە لێكدانەڤەییا رێژەيا زێدەترا ھەمی وان پوستانە، ئەڤێن ئەڤرو ل سەر سوشیال میدیایێ ب بەرچاڤێن من كەفتین، ببورن ئەڤێن ب بەرچاڤێن مە ھەمیان كەفتین، ژبەركو ھەر ئێك ژمە، خواندنا خوە یا تایبەت بۆ بوویەر و پێشھاتان ھەیە و ھەر ئێك دوێ پەنجەرەیێ را ل بارودوخێ دنێریت، ئەڤێ مە دڤێت ئەم ببینین!!

بتنێ وەك بیرئانین، د شەرێ ناڤخویێ سالێن نوتاندا، ھینگێ من دكانەكا سەعەتان ل نیڤا بازارێ دھوكێ ھەبوو و رۆژانە دەنگویێ كەتنا بریندارا و شەھیدێن شەرێ ناڤخو دھاتە گوھێن مە و د سەر گرانیێ و قەیران و ئابلوقێ را، شەرێ ناڤخویی بێھنا ھەمییان تەنگ كربوو و وەك نوكە كوردینی ب خەلكی دھاتە فروشتنێ، تایبەت ئەگەر دگەل لایەنێ وی یێ حزبی نەبایە. تا رێكەفتنا ستراتیژی دناڤبەرا ئێكەتیێ و پارتیێ دا ھاتیەكرنێ و ھەر دگەل ڤێ بیرئانینێ كو من مەبەست پێھەی. رۆژەكێ رۆژنامە ل دكانێ ل سەر مێزێ بوو و وێنێ رەحمەتی (مام جەلام و مەسعود بارزانێ) ل بەر پەرێ ئێكێ یێ رۆژنامێ ھاتبوونە دانان و كەنییا وان مزگینییا راوەستاندنا شەرێ ناڤخوە بوو و راگەھاندنا رێكەفتنناما ستراتیژی بوو دناڤبەرا ھەردوو حزباندا. دوو پیرەمێر ژی دروونشتی بوون و دەما چاڤێ ئێك ژوان ب وان وێنان كەفتی و گوت ئەڤە چییە، پا شەھید و بریندار و خوە كوژی و خایینكرنا ئێك دوو كیڤە چوون؟!!

ناڤێ تێكستی (سەربازەكێ سەقەت).. ژ نڤیسینا گابرێل گارسیا ماركیز

 وەرگێران: ع بامەرنی

سەربازەكێ ئەرجەنتینی ل بارەگایێ فەوجا خوە پەیوەندی ب دەیكا خوە كر، پشتی شەر ب دووماھی و ژ (گزیرتێن فوكولاند) بەرەڤ مال دھات و داخواز ژ وێ كر، كو رێ پێ بدەت ئەو ھەڤالێ خوە دگەل خوە بینیت، ئەڤێ چەند ئەندامێن لەشێ وی ھاتینە برین، ژبەركو خێزانا وی ل جھەكێ دوور دژین و ئەو ژی دھەمان تەمەنێ وی دایە 19 سالە و ئەوی ئێك ژ پێن خوە و دەستەكێ خوە و چاڤەكێ خوە ژی یێن ژ دەستداین.

سەرەرای كەیفخوەشییا دەیكا وی، كو كورێ وێ ب ساخی ڤەگەریایەڤە، بەلێ وێ ب ترسڤە بەرسڤا ویدا و گوتێ: ئەز نەشێم خوە ل بەر دیتنا وی گەنجی بگرم و رەتكر د خانیێ خوەڤە پێشوازییا وی بكەت.

كێ سەرھلدان كریە؟! ئەو پرسیارا ژ پوستەكی زێدەتر ب بەرچاڤێن من كەفتی

 عبدالرحمن بامەرنی

ئەز دێ ژ گوتنەكا رەحمەتی سەیدایێ (سەدیق شەروی) بابەتێ خوە نڤیسم، كو ماموستایێ من بوو و جارەكێ د پولێڤە بۆ مە گوت: "تا كولكا عەداڤێ دەر ببیت و شوینا وێ كول نەبیت! دڤێت ئەو كولكە باش بگەھیت و زەر ببیت و ھەر گاڤەكا دەربوو ژی، دێ ژ عەداڤێ پاقژ بیت و برینا وێ زوی خوە لێكدەتەڤە".

ھەمان تشت بۆ سەرھلدانێ ژی دروستە. ئەگەر بێژین حزبێن مە یا كری، چ راستیەك بۆ نینە و حزبێن مە یێن ھاتینە سەر سفرا حازر، لێ ئەو راستییا دڤێت بھێتە گوتن، پێشمەرگە و حزبێن كوردی ل چییا پشتەك بوون، كو خەلك زێدەتر و ب گەرم و گورتر ب سەرھلدانێ رابن.

ھەر چاوا بیت ئەڤە راستییە و ناھێتە ڤەشارتن، لێ یا ئەڤ راستییە تێكدایی، لێكڤەكرنا كێكێ و ئەنجامێ سەرھلدانێ بوو. خەلكی خوە كێم ددیت و ژبەركو خەلك یێ رێكخستی نەبوو و سەرھلدان یا رێكخستی نەبوو، خەلك نەشییا ببیتە خودانێ سەرھلدانێ و ژبەركو موستەشار و چەتە و سەرەرای رولێ وان یێ بەرچاڤ، لێ وان ھەست ب كێماتیێ دكر، ھەستدكر كو ئەو ل ئالیێ دوژمنی نە زێدەتر ژ یێ پێشمەرگەی و ئەو نەشییان خوە ل ھیچ تشتەكی بكەنە خودان، بتنێ دەستێ وان ب سەرێ وانڤە بوو.

(200) ملیارێن بەغدا و ھزار عەیب

 عبدالرحمن بامەرنی

راستی (200) ملیار دینار گەلەكن و ئەگەر ئەز ژی بام شوونا حكومەتێ، دا ھەمان رەفتارێ كەم و دا موچێن فەرمانبەران گیروكەم، ژبەركو ھەر مییەك ژ پشتا ماری بھێتە كێشان، ب گەلەكێ یە! ئەڤا (200) ملیاران ب سەرێ خوە و حكومەت بابێ فەقیر و ھەژارانە و ئەو بۆ مە باشتر دزانیت، كا خێرا مە د چدایە! مانێ ھوسا ئەم یێن فێركرین و پارێ كارەبێ و كارەبا موەلیدەی چەند گران بیت، بازار لدویڤ سەرێ خوە بیت و دەرمانخانە و پشكنینا نوژداری و لیستە درێژە....، لێ ئەم یێن ھی كرین (د خەونێن حێشتران دا بنڤین)، حكومەتا مە یا حەكیمە و موچێن مە یێ بۆ مە پاشكەفت كرین، دێ دەینێن خوە خرا دەین و ماچەكێ ژی ل پشتا ئەنیا خوە دەین؟!!

لێ كێشا مە دگەل گوتنێن مەزنایە و ئەوا ھەتا نوكە ئەم پێ دھاتینە خاپاندن، دەما دگوتن گوتنێن مەزنا نەخشێ ل بەرینە و دگوتن یێ گوھێ خوە نەدەتە مەزنا دێ لێ ھێن شاخێن بزنا و ئەڤە ھەمی ژی ب سەرێ خوە، بتنێ گوتنەك من د حەلینیت ئەوا دبێژیت (ئەگەر خێر ھاتە وەلاتی دێ گەھیتە ھەمی مەخلوقاتی).

ئێ باب نێ ئەز ژی كچا تەمە؟!!

 عبدالرحمن بامەرنی

ئەز بەحسا جوداهییا دناڤبەرا كور و كچاندا ناكەم، كانێ دەیبابان دڤێت ببنە دایك و بابێن كوران یان ژی كچان! ئەڤە بۆ وان ڤەدگەریت و تێگەهشتنا وان بۆ ئایندێ وان و كاریگەرییا داب و نەریتان ل سەر وان و بخوە ئەڤە بابەتەكێ ب سەرێ خوەیە و ب كورتە گوتارەكێ، ئەز ژ دەرحەق دەرناكەڤم...! لێ یا من مەبەست پێهەی، چاوان تو بۆ كورێ خوە ل هەڤژینەكێ دگەری، دڤێت ب هەمان پیڤەر، تو بۆ كچا خوە ژی ل هەڤژینەكی بگەری.

دا باشتر بێژم، رەنگە دكومەلگەهێ مە یێ كوردی دا جارێ ئەڤ پێنگاڤە یا زوی بیت، ئەوێن نەشیاین یان نەشێن خوە ژ داب و نەریتان رزگار بكەن، لێ دڤێت بزانین، هەر كچەكا هەبیت دوو تەمەن یێن هەین، تەمەنەك هەتا پێدگەهیت و باشی و خرابییان ژ ئێك جودا دكەت، دڤێت باب و دایك و برا، پارێزییا وێ ژ هەر دەست درێژیەكێ بكەن و دتەمەنێ دوویێ دا، دڤێت باب و دایك و برا هاریكارییا هەمان كچ بكەن، ژ ئەوا وان ژێ د پاراست و چاڤێن وێ ژبەر دگرتن، كو ئێدی ئەو بخوە یا بەرهەڤ بیت ب رێكەكا دروست و رێگە پێدای وی كەسێ هەلبژێریت، ئەڤێ دێ دگەلدا بیتە ئێك نڤین (من سور و سور گوت، دا بابەت بێ چەپ و چیر بگەهیت).

من رۆندكێن (حەسەن عەلی خەنجەر)ی دیتن!!

 عبدالرحمن بامەرنی

ھندەك كەس نەیێن خوەنە! نەیێن خوەنە یان كو نە ملكێ خونە و مرۆڤ كوردینییا پاقژ دواندا دبینیت. من حەسەن عەلی خەنجەر د بەرنامێ ژیما دا دگەل میدیاكار ھەرمانی ل سەر كەنالێ كورد ماكس ھوسان دیت. ھەر كەسێ حەسەن عەلی خەنجەر ناس نەكربیت، تایبەت نفشێ نوی، ئەو سترانبێژەك بوو، ئەز ژخوە بێژم، ئەوا من د زارۆكینییا خوەدا ئەڤ سترانبێژە ناسكری، گوھدارییا دەنگێ وی كری، سترانێن وی، چ یێن كوچك و دیوانا و بیرا من دھێت، كا چاوان دڤیابا ھەر كەسی كاسێتەك یان چەند كاسێتێن وی یێ مسەجلێ د مالێدا ھەبانە، بەرێ دوو مسەجلان ددانە ئێك و ژوور ھەمی بێدەنگ دكرن و سترانێن وی ژ كاسێتێ بۆ كاستێی دوبارە توماردكرن، برێكێن دەستپێكی.

ئەڤا من دڤێت بێژم ئەڤە ھەمی نینە و دوو تشتان ددیدارا ویدا ئەز پالدامە ڤێ نڤیسینێ، ئێك دەما پرسیارا بەرپرسان ژێھاتیكرنێ و وی ناڤێ ھندەكان ب ناڤ و نیشان گوتی و گوت: من پارێ وە نەڤێت؟ مەبەستا وی ھەڤالێن خوە یێن شورەشێ ژبیرنەكەن. من نمونا دەھان دەیكان، دەھان خێزانێن ھەژار یێن گوندان ئیناینە بەرچاڤێن خوە، دەھان پێشمەرگەھێن ئەڤرو دخانیێن كرێڤە و كەتینە بەر نەخوشییان، دەھان دایكێن شەھیدا و زیندانیێن سیاسی! ئەڤان پارە نەڤێن و ئەڤێن كوردینی كرین و خوشی ھێلاین و ب چول و چیا كەفتین، وان پارە نەڤێن وان بەھایێ خوە دڤێت بەھایێ وان رێزگرتنە و بەھایێ وان كێمكرن نینە، ئەڤرو بچن خوە ل بەر كەسەكی ب چەمینن و دەستێ خوە درێژ بكەن، كو رۆژەكێ ئەو ب دوژمنێن خوە دزانین، ئەو د خوشیاندابوون و پارە بۆ گرتن و خوینا وان و كوشتنا وان وەردگرن و ب جاش و خو فروش ناڤدگرن و ئەڤرو ھەمی تشتن!!

من ژی عەشقا كری

 عبدالرحمن بامەرنی

من عەشقا كری و ئەز بەھایێ عەشقێ دزانم و رۆژا عاشقان ل ھەر كەسی پیروزدكەم، یێ رێزێ ل عەشقا خوە بگریت. من گوت یێ رێزێ ل (عەشقا خوە) بگریت! نەك عەشقێ بكەتە ترانە و بتنێ تێركرنا حەزان.

دوەسفا عەشقێ دا پرسیار ژ فەیلەسوفەكی ھاتە كرنێ، عەشقێ لدەف تە چ پێناسە ھەیە؟

گوت: "دەما پارە د بەریكا تەدا ھەبیت و تو و ھەڤالا/ێ خوە ل ناڤ پاركەكێ بتنێ و ل سەر تەختەكێ دەبی یێ رەق و ل بەر بارانێ دروینە خارێ و لەفەكا ب ترسی دخوون و ل نزیك وە، خوشترین خارنگەھـ ھەبیت و ئەو جھـ بۆ ھەوە خوشتر بیت، ئھا دبێژنە ڤێ عەشق".

دا بزڤرمە بابەتێ خوە و رۆژا عاشقان و ئەڤێن ڤێ رۆژێ پیروزدكەن و ئەڤێن بەر باران دكەن و ئەڤا من دڤێت بێژم. زورا ئاساییە مە رۆژەك بۆ ھەمی تشتەكی ھەبیت، دڤان رۆژاندا ئەم پێداچوونێن خوە بكەین و ئەگەر رۆژا دایكێ بیت، ئایا یا پێدڤی مە بۆ دایكا خوەكریە؟ ئەگەر رۆژا زارۆكان بیت، ئایا ئەم شیاینە پەروەردەكا جوان بدەینە زارۆكێن خوە و داخوازیێن وی بۆ بەردەست بكەین؟ ئەگەر وەك ئەڤرو ژی و رۆژا عاشقان بیت، ئایا ئەز دگەل خوە و دگەل ئەڤا/ ئەڤێ عەشقێ دكەم، مەبەستا من دناڤبەرا دناڤبەرا دوو كەڤاناندا (حەزكرن/ تێركرنا شەھوەتان و خاپاندن) یان ژی (حەزژێكرن/ عەشق) و ئەم كیشكێ ژ ھەردووكان دكەین و پێنەڤێت تێگەھێ عەشقێ یان كو خوە گوریكرن؟!

خوە ئەم نزانین مریێن خوە ژی ب رێبێخین؟!!

 عبدالرحمن بامەرنی

هندەك تشت دناڤمەدا دبنە كەلتور و خوە ئەم نزانین، سەرەدەریەكا دروست ژی دگەلدا بكەین. بۆ نمونە، دەما كەسەك لبەر مرنێ بیت، شوونا ئەم خاترخاستنەكا جوان دگەلدا بكەین، جوان ب رێبێخین و دل بدلی بدەین و چركەیێن دووماهیێ ژ ژیێ وی چركەیێن خوش بن. خوش بوون ب واتەیا كو هەست بكەت چ تشت ل پاش نەمایە ژێ پەشیمان بیت یان هێلابیتە نیڤەروو و ئەم دەستێ وی بگرین، ژبەركو دوان چركاندا مرۆڤ پێدڤی هەر تشتەكییە دگەل مرۆڤیدا بیت، تایبەت كەسێن نزیكی مرۆڤی!

دێ رابین بخوە دادەین، پرچا خوە ڤەچرین، دێ پێ بێژین و هەیلا بۆ تە و زارۆكێن تە بۆنە ئێتیم و كی دێ چاڤێ خوە دەتێ؟ كی دێ خێزانا تە ب خودان كەت؟ كی دێ جهێ تە گریت و ئەو هەمی گری و نەخوشی و نە ئارامی و خوە ئەگەر ئەو كەسێ ل بەر مرنێ نە یێ مرنێ ژیبیت و دلێ وی هاتبیتە گرتنێ بۆ نمونە یان خوە ئەگەر مر بیت ژی، پشتی مرنا خوە روحا وی ئاگەهـ ژ وێ قەرەبالغیێ هەبیت، ئایا دێ ئەو روح چەند یا ئارام بیت و دێ بارێ وی/ وێ چەند دووقاتی گران و ب زەحمەت كەڤیت؟!!

ژ ھەولێرێ بۆ بەغدا (مونافسە) یا بەردەوامە!!

 عبدالرحمن بامەرنی

تە راستی بڤێت (مونافسە) یا خوشە، تایبەت ئەگەر مرۆڤ دگەل خوە و دەوروبەرێن خوە بكەت، ھەر چنە بیت دێ پاشی پێكھێینە ڤە و دێ ئێك و دوو حیل كەین! ڤێجا ئەو مونافسە وەكی سالێن شێستان كابانێ و كت و جوتانێ بیت سەرا مازییان یان وەكی سالێن حەفتییان شەرە كەو و شەرە دیكلانێ بیت یان وەكی سالێن ھەشتییان تەبەلانێ و كوركێ و چیڤ و پلیتانێ بیت یان ژی وەكی سالێن نوتان كرینا كادرێن حزبی بیت یان ژی وەكی سالێن دوو ھزارێ دامەزراندنا فەرمانبەران بیت یان ژی وەكی ئەڤروكە، مونافسە دناڤبەرا (ھشیار و بەرھەم)دا بیت.

گرنگ مونافسەیە و تشتێ خوش ل دەف مە كوردان، (من بەحسێ قوناغێن زارۆكینیێ یە)، كێشە نە بوو كی كولند بیت و كێ بلند بیت، كی ب سەركەڤیت و كی ژ بن بچیت و كی بكەڤیتە چینگێ و یا گرنگ، ل دووماھیا ھەر یاریەكێ دا تبلێن خوە كەینە دناڤ ئێكرا و بێژین (حیل حیل نە لمن و نە ل تە و ھەمی بۆ دوژمنێن كوردان).

بەری سەرھلدانێ ئەز باش نزانم، لێ پشتی سەرھلدانێ حزبێن مە چەندین جاران یێن رابووینە بەر سینگا ئێك و لدووماھیێ تبلێن خوە یێن قەلیچێ یێن كرینە دناڤ ئێكرا و ئێك و دوو یا حیل كری و ل ڤانە ھەمیان ژی، كورد بخوە بوونە و گورەپانا ھەڤركیێ(مونافسێ) یان بەردەرێ مالێ بۆیە، یان دناڤبەرا زارۆكێن تاخی دا بۆیە یان دناڤبەرا حزبان دابۆیە یان دناڤبەرا دەڤەران دابۆیە و یان دناڤبەرا زوناندا بۆیە و پشتی حیلكرنێ، ئەم یێن چوینە سەر و ستویێن ئێك دوو و ھەر وەكو چ چێنەبووی!.